Panangusar a Naimbag iti Ti Pagwanawanan ken Agriingkayo!
1 Dagiti Ti Pagwanawanan ken Agriingkayo! isudat’ kapatgan ken kangrunaan a makagunggona a magasina a mabasa dagiti tattao kadagitoy nga aldaw. Apay? Gapu ta ti espiritual a linaonda ket addaan iti agnanayon a naimbag nga epekto iti biag dagiti tattao. Nupay kasta, adu dagiti saan a naan-anay a sipupuot iti espiritual a kasapulanda, wenno saanda nga ammo no sadino ti pangkitaan iti pakapnekanda iti dayta. Pribilehiotayo a tuladen ni apostol Pablo babaen ti panangtulong iti tattao a manglukat kadagiti matada ti naespirituan.—Mat. 5:3; Ara. 26:18.
2 Agpositibo ken Agsaganakayo a Naimbag: Awan duadua nga adda marakarnero a tattao idiay teritoriayo a mangipangag iti kinapudno. Kasapulan dagiti dadduma ti bassit a pammaregta a basaenda dagiti magasina. Gapuna, agpositibo ken naallukoykayo koma a mangitukon iti Ti Pagwanawanan ken Agriingkayo! Addaankayo koma ti abasto a magasina ken gundawayanyo iti kada oportunidad a mangiwaras kadakuada, uray no dagiti dadduma a publikasion ti dakamatenyo.
3 Ania ti mamagbalin kadatayo a mas epektibo nga agiwaras iti magasina? Kas pangirugi, masapul a pudno a tagipatgen a mismo iti balorda. Kabisadotayo koma dagidiay artikulo dagiti magasina nga itukontayo, ket daytoy ti mangpatured iti talek ken gagartayo a mangiparang kadakuada. Adda koma daytoy iti panunotyo bayat a damo a basaenyo. Nasiputkayo koma a mangpili kadagiti puntos a mailawlawag iti ministerio. Salusodanyo ti bagiyo: ‘Siasino ngata a tao ti kangrunaan a maawis iti daytoy nga artikulo? Patgen ngata ti maysa nga asawa a babai, maysa nga agtutubo, wenno maysa a negosiante? Daytoy ngata a puntos ket makatukay iti maysa nga estudiante, dagiti naasawaan a tattao, wenno iti maysa a maseknan maipapan ti aglawlawtayo?’ Tapno pudno nga epektibotayo, masapul a kabaelantayo nga irekomenda dagiti magasina a maibatay iti personal nga ammo ken pananggusto kadagiti naintiempuan nga artikuloda.
4 Usarenyo a Naimbag Dagiti Daan a Ruar: Laglagipenyo, dagitoy Ti Pagwanawanan ken Agriingkayo! ket saan nga agbaaw ti pategda, nupay saanda a maipaima iti las-ud ti maysa wenno dua a bulan iti petsa ti ruarda. Ti damag a linaonda ket saan a maksayan iti pategda babaen ti panaglabas iti tiempo, ket saantayo nga agkedked a mangitukon kadagiti daan a kopia no nasayaat ti langada. No ipalubos a maurnong dagiti magasina ken saan nga usaren ida maipakita a kurang ti panangipateg kadagitoy a nabalor nga instrumento. Kada magasina ti naglaon iti kinapudno nga addaan ti bileg a mangriing ken mangpennek iti espiritual a gana. Imbes ngarud nga ipuera dagiti daan a magasina ken lipatenen ida, saan ngata a nasaysayaat no ikagumaan nga ipaima kadagiti interesado a tattao wenno uray ibati kadakuada no awanda iti pagtaenganda?
5 Ti Agriingkayo! a magasina isut’ nakatulong iti adu a tattao nga idi damo ket saanda a nairuam kadagiti espiritual a kasapulanda. Daytoy Ti Pagwanawanan isut’ panulbek nga instrumento iti programa a panangtaraon ti naespirituan kadagiti tattao ni Jehova. Dagitoy a magasina ti nasayaat iti panagdinnanggayda, ket adda papel nga akmenda iti naimbag a damag a maikasaba.
6 Bayat a gundawayan iti kada oportunidad a mangipaima ti magasina, agtalektayo a naan-anay iti kaepektiboda a mangyeg ti espiritual a kasapulan dagiti marakarnero a tattao. Kayattayo a salimetmetan ti positibo a kababalin, agsagana a naimbag, ken agregulartayo iti ministerio. Kas agibumbunannag ti naimbag a damag, sapay koma ta amintayo ket regulartayo a mangusar a naimbag iti Pagwanawanan ken Agriingkayo! a magasina.