Baro a Programa iti Asamblea Sirkito

¹ Ti tema a maisagananto iti baro a programa iti asamblea sirkito a mangrugi inton Pebrero ket “Agsalukag, Agtibker, Agmaingelkayo.” Naibatay dayta iti pammabileg a sasao ni Pablo iti 1 Corinto 16:13.

² Mangruginto ti programa babaen ti pannakaitampok ti kanayon a panagkasapulantay iti naespirituan a panangsukimat iti bagitayo. Ti panangsalimetmet iti natibker a takder no ania ti nalinteg kadagitoy “maudi nga al-aldaw” birokenna ti panangusig iti relasiontay ken Jehova ken iti takdertay iti naindagaan nga organisasionna. (2 Tim. 3:1) Kasapulan a maiwardastay kadagiti wagas a mangparang-ay iti Nakristianuan a kualidadtayo ken mangtaginayon iti mapagwadan a kababalin.

³ Maipaganetgetto met ti panagbalin a naregta iti trabaho a panagaramid ti adalan bayat a gunggun-oden ti naespirituan nga irarang-ay ken annongen. Mapagminarto dagiti praktikal a singasing no kasano a masalimetmetan dagiti indibidual ken pamilia ti regular a programa iti naespirituan a pannanganda, babaen iti nagduduma a palpalawag, demostrasion, ken panagsasarita.

⁴ Iti Sabado itungpalto dagiti kualipikado a kandidato ti publiko a deklarasion ti dedikasionda babaen iti pannakabautisar iti danum. Sa, iti Domingo kayattayto amin a mapan denggen ti palawag publiko, a napauluan “Aniat’ Takderyo iti Dios?”

⁵ Maserraanto ti programa babaen iti pammaregta nga agtalinaed a nabileg iti pammati, kanayon a makilangen iti isuamin iti espiritu ti ayat ken kappia. Ti asamblea sirkito ket maysa kadagiti gundaway nga insagana ni Jehova kadatayo tapno ‘mangparegta ti maysa ken maysa iti ayat ken nasayaat nga ar-aramid.’ (Heb. 10:24, 25) Mangaramidkayon ti masinunuo a plano tapno addakayto iti intero a programa iti dua nga aldaw.