Ti Asamblea Sirkito a Tumulong Kadatayo a Mangsaluad iti Espiritualidadtayo
1. Ania ti maysa a probision nga impaay ni Jehova a tumulong kadatayo a mangitungpal iti annongentayo a mangisaknap iti naimbag a damag?
1 Siwawadwad nga ipapaay ni Jehova ti impormasion, pannakasanay, ken pammaregta a kasapulantayo iti inted-Dios nga annongentayo a mangisaknap iti naimbag a damag. (Mat. 24:14; 2 Tim. 4:17) Ti tinawen nga asamblea sirkito ti maysa a probision tapno magun-odantayo dagita. Ti baro a programa para iti 2010 a tawen serbisio ilawlawagna ti tema a “Saluadanyo ti Espiritualidadyo,” a naibatay iti Roma 8:5 ken Judas 17-19. Mangruginto daytoy baro a serye iti maikatlo a lawas ti Enero 2010.
2. (a) Kadagiti ania a pamay-an a makagunggona kadatayo ti asamblea sirkito? (b) Kasano a nakatulong iti ministeriom dagiti asamblea sirkito iti napalabas?
2 No Kasano a Makagunggona: Ti programa pagbalinennatayo a nasiput kadagiti peggad, kas kadagiti pakasingaan a mangibus iti tiempotayo ken mangisiasi iti atensiontayo iti napatpateg a banag. Maammuantayto no kasano a labanan ti napanuynoy a kababalin ken usigentayo no ania ti ramanen ti panagbalin a naespirituan a tao. Ti simposium iti Domingo ipakitana no ania ti aramiden dagiti indibidual ken pamilia tapno bumileg ti espiritualidadda iti sango ti kumarkaro nga ibubusor ken nakaro a suot iti pammati. Ti programa tulongannatayo a mangsaluad iti pusotayo, mangtaginayon iti natibker nga espiritualidadtayo, ken tulongannatayo nga agtalinaed a sipapanunot kadagiti nadayag a bendision nga agur-uray kadagidiay mangsaluad iti espiritualidadda.
3. Kaano ti sumaganad nga asamblea sirkitoyo, ken ania ti rumbeng a siguraduenyo?
3 Apaman a maammuanyo no kaano ken sadino a maangay ti sumaruno nga asamblea sirkitoyo, mangaramidkayon kadagiti plano tapno matabunuan ken maimdenganyo a naimbag ti amin a sesion iti dua nga aldaw. Namnamaenyo a bendisionan ni Jehova dagidiay nasaet.—Prov. 21:5.
4. Ania ti sigurado a maawattayo iti sumaganad nga asamblea sirkitotayo?
4 Pudno a ni Jehova ti Manangipaay iti daytoy a nagsayaat a sagut. Ti programa nga insagana ti klase matalek nga adipen ket isu ti eksakto a kasapulantayo tapno makapagtultuloytayo kas Kristiano a ministro. Agyamantayo ken Jehova gapu kadagiti amin a naayat a probisionna a tumulong kadatayo a ‘mangpetpet a siiirut iti publiko a panangideklara iti namnamatayo nga awan panagpangadua.’—Heb. 10:23-25; Sant. 1:17.