Saluadam ti Panunotmo

1. Ania ti tema ti asamblea sirkito iti 2013, ken ania ti panggep ti programa?

¹ Insuro ni Jesus dagiti adalanna nga ayatenda ni Jehova iti intero a puso, kararua, ken panunotda. (Mat. 22:37, 38) Ti tema ti kombension distrito, asamblea sirkito ken aldaw ti espesial nga asamblea iti daytoy a tawen ket nairanta a tumulong kadatayo a mangpabileg iti makin-uneg a kinataotayo. Kas pagaammoyo, ti tema ti kombension distritotayo ket “Saluadam ta Pusom!” Ti programa iti aldaw ti espesial nga asamblea iti 2013 ket natemaan iti “Saluadam ti Konsiensiam.” Ken dagiti serye ti asamblea sirkito a mangrugi kadagiti sumaganad a bulan ket natemaan iti “Saluadam ti Panunotmo,” a naibatay iti Mateo 22:37. Daytoy a programa ket nairanta a tumulong iti tunggal maysa kadatayo a mangusig iti panagpampanunottayo tapno agbalin nga ad-adda a makaay-ayo dayta ken ni Jehova.

2. Siputantayo ti sungbat dagiti ania a saludsod kabayatan ti programa?

² No Ania ti Mailawlawag: Bayat a dumngegtayo iti asamblea sirkito, masapul a siputantayo ti sungbat dagiti sumaganad a saludsod, a mangipakita kadagiti kangrunaan a punto:

• Kasanotayo a maliklikan ti ‘pampanunot ti tao’?

• Kasanotayo a makatulong a mangikkat iti abbungot a nangbulsek iti panunot dagiti di manamati?

• Ania a kababalin ti isip ti kayattayo a maadda kadatayo?

• Ania dagiti gunggona nga itden ti umiso a panagmennamenna?

• Kasano a maipalubostayo a sukogen ni Jehova ti panunottayo?

• Kasano a makatulong ti assawa a lallaki, assawa a babbai, nagannak, ken annak iti kinaragsak ti pamilia?

• Kasanotayo nga agbalin a nakasagana iti aldaw ni Jehova?

• Ania ti kaipapanan ti panangpatibker kadagiti panunottayo maipaay iti trabaho?

• Ania ti magunggona dagidiay mangyaplikar kadagiti naadalda?

3. Apay a napateg a tumabuno, dumngeg a naimbag, ken iyaplikartayo dagiti masursurotayo iti dua nga aldaw nga asamblea sirkito?

³ Ikagkagumaan ni Satanas nga impluensiaan ti panagpampanunottayo. (2 Cor. 11:3) Gapuna, masapul a salakniban ken kontrolentayo ti panagpampanunottayo. Nasken nga itultuloytayo nga iparangarang ti panunot ni Kristo ken labanantayo dagiti impluensia daytoy dakes a lubong. (1 Cor. 2:16) Ikagumaanyo ngarud ti tumabuno ken dumngegkayo a naimbag iti dua nga aldaw ti asamblea sirkito. No iyaplikartayo dagiti napateg nga impormasion a mailawlawag iti programa, masalakniban ti panagpampanunottayo ket agbalintayo a naregta nga agserbi iti Pagarian.—1 Ped. 1:13.