Probision Para Kadagiti Kristiano a Ministro
1. Ania a baro nga urnos ti nairugi idi 1938, ken ania ti panggepna?
1 Idi 1938, adda baro nga urnos nga inrugi ti organisasion ni Jehova. Naawis dagiti kongregasion a tumabuno kadagiti zone assembly, a maawagan itan iti asamblea sirkito. Iti ania a panggep? Kuna ti Enero 1939 a ruar ti Informant (Ti Ministeriotayo iti Pagarian itan): “Dagitoy nga asamblea ket paset ti Teokratiko nga Organisasion ni Jehova para iti pannakaorganisar ti trabaho mainaig iti Pagarian. Dagiti instruksion a maawat sadiay ket napateg iti tunggal maysa tapno maaramidda a naimbag ti naituding a trabaho.” No usigentayo ti iyaadu dagiti manangiwaragawag iti Pagarian a 58,000 laeng ti bilangda idi 1938 ngem nasuroken a 7,000,000 iti 2010, nabatad a dagiti asamblea sirkito maibambanagna ti panggepna a tumulong kadagiti ministro a ‘mangaramid iti trabaho a naituding kadakuada’!
2. Ania nga impormasion ti maidatag iti asamblea sirkito iti umay a tawen?
2 Tema Inton Umay a Tawen: Segseggaantayo ti asamblea sirkito a mangrugi inton Pebrero agraman dagiti maipaay a pammaregta. Ti tema a “Saankayo a Paset ti Lubong,” ket naadaw iti Juan 15:19. Ania ti sumagmamano kadagiti palawag a sigurado a pakagunggonaan dagiti Kristiano a ministro? Iti Sabado, mangngegtayto ti palawag a napauluan iti “Salaknibannatayo ti Panagserbi iti Amin a Tiempo—Kasano?” Tagiragsakentayto met a denggen ti nagkatlo ti pasetna a simposium a “Dikay Patulawan iti . . . ” “Atap nga Animal,” “Dakkel a Balangkantis,” ken kadagiti “Agdaldaliasat a Komersiante.” Iti Domingo, mailawlawagto ti simposium a napauluan iti “Ayatenyo ni Jehova, Saan a ti Lubong.” Dagiti dadduma pay a palawag ket “Agtultuloykayo kas ‘Ganggannaet ken Temporario nga Agnanaed,’” ken “Bumilegkayo! Kabaelanyo a Parmeken ti Lubong.”
3. Kasanotayo a mabenepisiaran no tumabunotayo iti asamblea sirkito?
3 Kalpasan a timmabuno iti nabiit pay nga asamblea sirkito, ti kabsat a babai a bimmaaw ti regtana iti ministerio insuratna a ti programa ti nakatulong kenkuana a mangsukimat manen iti kasasaadna ken agbalin a determinado a “rummuar a mangasaba ken saanen nga agpampambar!” Awan duadua a ti programa ti asamblea sirkito iti umay a tawen tulongannatayo amin a mangayat ken Jehova imbes a ti lubong. (1 Juan 2:15-17) Siguraduenyo a tabunuan dayta ken dumngegkayto a naimbag tapno naan-anay a magunggonaankayo iti daytoy a naayat a probision para kadagiti Kristiano a ministro!