Baro a Programa ti Asamblea Sirkito
Kadagitoy “napeggad a tiempo a narigat a pakilangenan,” kasapulantayo ti nadiosan a sirib tapno magun-od ken mataginayontayo ti anamong ni Jehova. (2 Tim. 3:1) Ti programa ti asamblea sirkito iti 2005 a tawen serbisio ikkannatayo iti praktikal a balakad ken pammaregta bayat nga ibuksilanna ti tema nga “Agpaiwanwankayo iti ‘Sirib Manipud Ngato.’”—Sant. 3:17.
Ti umuna a simposium a “Panangiparangarang iti ‘Sirib Manipud Ngato’ iti Biagtayo” tulongannatayo a mangkita no ania ti ramanen ti panagbalin a nadalus, mannakikappia, nainkalintegan, ken sisasagana nga agtulnog. Kalpasanna, ti manangaywan iti sirkito iturongna ti atension iti tallo a dadduma pay nga aspeto ti nailangitan a sirib. Ti manangaywan iti distrito ingudona ti umuna nga aldaw babaen ti panangipakitana no kasano a masursuruan dagiti Kristiano a ministro nga agsao iti sirib ti Dios, nupay ibilang ida dagiti dadduma kas “awan adalna ken gagangay.”—Ara. 4:13.
Iti maikadua nga aldaw, ti simposium a napauluan iti “Aramidenyo Dagiti Banag a Makapabileg” tulongannatayo a mangilasin ken mangliklik kadagiti banag a mangdadael iti espiritualidadtayo. Ipakitana met no kasanotayo a mapabileg dagiti dadduma kadagiti gimong ti kongregasion, iti ministerio iti tay-ak, ken iti uneg ti pamilia. Ti palawag publiko a, “No Kasano a Makagunggona Kadatayo ti Nadiosan a Sirib,” parayrayenna ti panangipategtayo kadagiti gunggona nga itden ti panangyaplikar kadagiti nadiosan a prinsipio iti biagtayo. Ti pangserra a palawag a, “Ti Panangipakat iti Nadiosan a Sirib Salaknibannatayo,” pabilgenna ti determinasiontayo nga agpannuray iti sirib nga aggapu ken ni Jehova kadagitoy maudi nga aldaw.
Napateg a paset ti tunggal asamblea ti panagpabautisar dagiti baro nga adalan. Ti Teokratiko nga Eskuelaan ti Panagministro ken ti Panagadal iti Pagwanawanan ket karaman met iti programa. Tarigagayan ni Jehova a magunggonaantayo amin iti sirib nga ipapaayna. Sigurado a pabaknangennatayo iti naespirituan dagiti balakad ken pammaregta nga agur-uray kadatayo iti asamblea sirkitotayo.—Prov. 3:13-18.