Baro a Programa ti Asamblea Sirkito

Ti tema ti dua nga aldaw a programa ti asamblea sirkito a mangrugi inton Pebrero ket “Salimetmetanyo Dagiti Bilbilin ti Dios ket Agbiagkayo.” (Prov. 4:4) Ipaganetgetna no apay a saan a makapadagsen ti panagtulnog kadagiti bilin ti Dios. Maysa pay, ipakitana no kasano a ti panagaramid iti pagayatan ti Dios mangyeg iti bang-ar ken napaypayso a kinaragsak kasta met ti namnama para iti masanguanan.—Mat. 11:28-30; Juan 13:17.

Dagidiay agtultulnog iti bilin ni Kristo nga agtarigagay nga agpabautisar iti dayta nga asamblea makisaritada koma iti mamangulo a manangaywan, ket isu ti mangaramid kadagiti nasken nga urnos.—Mat. 28:19, 20.

Addanto simposium a mangilawlawag kadagiti praktikal a wagas a pangipakitaantay ti ayat iti Dios ken kadagiti kakabsattayo. (Juan 13:34, 35; 1 Juan 5:3) Mairamanto iti programa ti makatukay-puso a balakad manipud iti Salmo 19 ken 119. Nupay rinibu a tawenen ti napalabas manipud idi naisurat ti naipaltiing a balakad kadagitoy a salmo, makitatayto no kasano a magunggonaannatayo dayta a personal itatta.

Ti palawag publiko nga ipaay ti manangaywan ti distrito ket napauluan iti “Agbutengkayo iti Dios ket Salimetmetanyo Dagiti Bilbilinna.” (Ecl. 12:13) Ipakitanto ti maudi a palawag ti manangaywan ti sirkito no kasanot’ kasayaatan a panangtagiragsak ita dagiti agtutubo iti biag ken no apay a makapagtalekda iti agnanayon a masanguanan. Ingudo ti manangaywan ti distrito ti programa babaen ti panangibinsabinsana iti adu a pagimbagan ti panagbiag babaen “iti naarian a linteg” ti ayat. (Sant. 2:8) Wen, maysa daytoy a programa ti asamblea nga awan mayat a manglangan!