Saludsod
◼ Ania dagiti kasapulan nga itugottayo kadagiti gimong?
Kada lawas umaw-awattayo iti makagunggona a pannursuro ken pammaregta kadagiti gimong ti kongregasion. (Isa. 48:17; Heb. 10:24, 25) Nupay kasta, ti kawadwad ti magunggona agpannuray iti panagsagana a naimbag kadagiti gimong.
Nasayaat no kada miembro ti pamilia ket maaddaan iti personal nga alikamen a maipaay kadagiti gimong. Iramanna daytoy ti Biblia, pagkantaan, dagiti publikasion a maadal, kuaderno, ken pagsurat wenno lapis.
Maipaay iti Teokratiko nga Eskuelaan ti Panagministro, kasapulan ti School Schedule ken Giya ti Eskuelaan. Dagitoy a bambanag ti tumulong kadatayo a sipapanunot iti tema kadagiti palawag a maited iti estudiante ken iti panangsurot iti manangaywan ti eskuelaan no mangbalakad. Mabalintay a yaplikar dagiti balakad ken singasing tapno maparang-ay dagiti bukodtayo a palawag ken panangiparang iti tay-ak ti serbisio. Manipud idi Enero, naibasar ti kaaduan kadagiti makaisuro a palawag iti Dagiti Saksi ni Jehova—Manangiwaragawag iti Pagarian ti Dios. Nalabit a saan a praktikal nga itugot ti kada miembro ti pamilia ti bukodna a kopia; mabalin a maysa a tomo ti maitugot nga agpaay iti intero a pamilia.
Maipaay iti Gimong ti Serbisio, kasapulantayo ti kaudian a Ti Ministeriotayo iti Pagarian ken Panakirinnason a libro. Itugotyo dagiti aniaman a publikasion a maaramat bayat ti gimong, kas kadagiti literatura a mausar iti presentasion a maidemostra. Masapul nga addaan dagiti panglakayen iti kopia ti Organisado a Mangitungpal ti Ministeriotayo.
Ikagumaan koma dagiti nagannak a katugaw dagiti annakda a siuulimek ken agimdeng kadagiti gimong ti kongregasion. Ti panangipaay kadakuada iti bukodda a kopia Ti Pagwanawanan ken dadduma a publikasion, uray pay sakbay a makabasada, paregtaenna ida nga aginteres, ken tumulong a mangsukog iti naimbag a kababalin iti naespirituan iti unos ti panagbiagda.
Dakkel a rag-o ken pannakapnek ti magun-odtayo manipud kadagiti gimong ti kongregasion no tumabunotayo a naan-anay a nakabalan.—2 Tim. 3:17.