Naballigi a Sangalubongan nga Eskuelaan

SAAN a nangina daytoy a pribado nga eskuelaan wenno agdindinamag nga unibersidad a ti sumagmamano laeng a napili ti makapageskuela. Saan, awan ti matrikula nga ipabayad daytoy nga eskuelaan kadagiti estudiantena. Nalabit maang-angay iti lugar nga asideg iti ayanyo dagiti sesionna. Maawagan dayta a Teokratiko nga Eskuelaan ti Panagministro, ket maidadaulo dayta kadagiti paggigimongan dagiti Saksi ni Jehova. Agarup lima a milion a tattao iti intero a lubong ti tumabtabuno iti daytoy nga eskuelaan.

Mabalin a mapanunotyo, ‘Ania dagiti maikalikagum iti panagpalista? Aniat’ maisuro iti eskuelaan? Kasanot’ pannakaidaulona? Ket kasano a magunggonaan ti tattao manipud iti dayta?’

Dagiti Makalikaguman

Nupay maawat amin a tattao a tumabuno iti Teokratiko nga Eskuelaan ti Panagministro, masapul a makitunos dagidiay agpalista kadagiti pannursuro ti kangrunaan a libro ti eskuelaan, ti Biblia. Maikalikagum a matungpalda dagiti moral a kalikagum ti Biblia iti biag. Isu a di mapalubosan nga imoral ti panagbiag dagiti estudiante. Rumbeng a saanda nga agtatakaw, mammartek, mannakiabig, managsigarilio, ken dadduma pay.​—1 Corinto 6:9-11.

Adu kadagiti eskuelaan ita ti nangilaksiden kadagiti pagannurotan maipapan iti panagkawkawes, ngem manamnama kadagiti estudiante nga agpalista iti Teokratiko nga Eskuelaan ti Panagministro nga agkawesda a sitatakneng iti nadalus a lupot. (1 Timoteo 2:9, 10) Awan ti maikalikagum nga edad para iti daytoy nga eskuelaan. Maipalista ken regular a maikkan iti assignment dagiti ubbing nga agtawen iti uppat wenno lima a kabaelandan ti agbasa, agraman ti lallaki ken babbai a nasurok a 90 ti tawenda.

Leksion ken Kurikulum

Tapno kombiniente kadagiti tumabuno, kanayon a maangay ti 45-minuto ti kapautna a sesion ti Teokratiko nga Eskuelaan ti Panagministro iti ngalay ti lawas. Kalpasan ti ababa a mangkablaaw a komento ti instruktor ti eskuelaan, ti umuna nga agpalawag iti dayta a rabii ti mangted iti 10 agingga iti 15 minuto a palawag a naikugnal iti maysa kadagiti libro ti eskuelaan. Kalpasanna, masansan nga idauluanna ti tallo agingga iti lima minuto a pannakarepaso ti material a sinaklawna.

Sumaganad, maysa a kualipikado a mannursuro ti mangsaklaw iti tampok ti assignment a linawas a panagbasa iti Biblia, a kaaduanna, buklen ti dua agingga iti uppat a kapitulo ti Biblia. Innem a minuto ti maipalubos iti daytoy a panagrepaso. Dagiti estudiante a kanayon a mangaramid iti daytoy a linawas nga assignment idiay pagtaengan ti makairingpasto nga agbasa iti Biblia iti naituding a tiempo.

Kalpasan iti tampok ti Biblia, maiparang ti tallo a presentasion ti estudiante, a nalimitaran ti tunggal maysa iti lima a minuto. Panagbasa iti Biblia ti maysa manipud iti paset ti naituding nga assignment idiay pagtaengan. Naikugnal ti sabali pay a dua a presentasion iti material ti libro ti eskuelaan a maiparegta a basaen ti amin nga estudiante kas panagsagana iti klase. Kalpasan ti assignment ti tunggal estudiante, mangitukon ti instruktor ti eskuelaan iti komendasion ken, masansan a singasing a pangparang-ay.

Naikugnal ti balakad ti instruktor ti eskuelaan iti publikasion a Giya ti Teokratiko nga Eskuelaan ti Panagministro, a manamnama a basaen a naimbag ti tunggal estudiante. Tapno rumang-ay iti partikular a kualidad ti panagsao agpaay iti sumuno nga assignment-na, makiddaw ti estudiante a repasuenna ti maysa a kapitulo manipud iti giya, kas iti “Panangmatmat kadagiti Dumngeg ken Usar iti Notas,” “Mayataday nga Ilustrasion,” “Panangulit-ulit ken Panagkompas,” ken “Ipaganetget ti Kababagasna ken Panagbaliw ti Tono.”

Iti dadduma a komunidad, adda kanayonan ti Teokratiko nga Eskuelaan ti Panagministro a klase ti literasia ken panangpasayaat iti panagbasa. Pinullo a ribun ti nakasursuro nga agbasa wenno nangpasayaat iti panagbasada kadagita a klase ti literasia. Kas pagarigan, idiay Mexico, manipud 1946 aginggat’ 1994, nasurok a 127,000 ti natulonganen nga agbasa ken agsurat.

Panangtulong iti Minilion

Iti intero a lubong ti Teokratiko nga Eskuelaan ti Panagministro ti mangsupsuporta iti panagregget dagiti nagannak a mangipaay iti nasayaat nga edukasion kadagiti annakda. Kinuna ti 16-ti-tawenna a ni Moriah: “Nasursurok ti agsirarak kadagiti impormasion ken ensayuen dagiti presentasionko. Ita, laklakaekon ti tunggal assignment-ko iti high school.”

Insurat ti 15-ti-tawenna a ni Matthew, a nagpalista iti Eskuelaan ti Panagministro idi agtawen iti pito: “Adda dakkel a bentahek kadagiti kapatadak no kinalaing iti panageskuela ti pagsasaritaan. Nagbalinak a nasigo nga agadal ken agimdeng ken agpalawag a sieepektibo.” Innayon ti 17-ti-tawenna a manongna a ni Phil: “Ti Teokratiko nga Eskuelaan ti Panagministro ti namagbalin kaniak a naturtured. Ammok a no maikkanak iti assignment, kabaelak dayta.”

Sinursuruan metten ti Teokratiko nga Eskuelaan ti Panagministro dagiti adulto. Inlawlawag ni Michael, a nakaragpat kadagiti kalat kas iti panangiparang kadagiti presentasion maipapan iti panangaywan: “Managbabainak unay idi nagpalistaak iti Eskuelaan ti Panagministro. Ita saanakon a managbabain. Ti eskuelaan ti nangipaay iti natalged nga aglawlaw, pannakaammo, kinasigo, ken ti personal a pammaregta a kasapulak tapno maparmekko ti kinamanagbabainko.” Insurat ti maysa a naganak: “Patiek a naabrutkon dagiti nasaaw a gundaway ti panagsursuro idi agtutuboak pay laeng.”

Iti maysa a bassit nga away iti Latin-America, tinabunuan dagiti miembro ti Departamento ti Edukasion ti Teokratiko nga Eskuelaan ti Panagministro. Kalpasan ti panagimdengda iti lokal a nagpalawag, indir-i ti prinsipal, a maysa kadagiti sangaili: “Imposible a kabaelanen daytoy a tao, a sigud nga am-ammotayo kas iliterado, ti makisarita iti Español [imbes a ti nakayanakanna a pagsasao], ti pay ngata agbitla iti saklang ti tallaong, ngem kabaelannan.”

Kinapudnona, ti Teokratiko nga Eskuelaan ti Panagministro ti maysa kadagiti kasayaatan nga eskuelaan iti lubong! Makatulong dayta nga agpadpada iti agtutubo ken nataengan a makagun-od iti nasayaat nga edukasion. Kas kinuna ti maysa nga agtutubo: “Isingasingko iti asinoman a mayat nga agatender iti eskuelaan a dagus nga aramidennan dayta.”

[Ladawan iti panid 13]

Ti Teokratiko nga Eskuelaan ti Panagministro ti tumultulong iti minilion a makagun-od iti nasayaat nga edukasion