No Kasano a Magunggonaantayo iti Teokratiko nga Eskuelaan ti Panagministro
1 Addaan dagiti adipen ni Jehova iti naisangsangayan a pribilehio nga agpaisuro kenkuana. (Isa. 54:13; Juan 6:45) Ngem ti pannakagunggonatayo iti daytoy ket agdepende a nangnangruna iti kinapingettayo. Makitam kadi dagiti positibo nga epekto ti Teokratiko nga Eskuelaan ti Panagministro iti espiritualidadmo?
2 Nasayaat a Komento: Nadlaw ti adu a manangaywan iti eskuelaan a ti nauneg a panangadal kadagiti kualidad ti panagpalawag pinarang-ayna ti kinaepektibo ti kongregasionda iti ministerio iti tay-ak. Mainayon pay, napaliiw ti maysa a manangaywan iti eskuelaan a gapu ta adda pannakipaset ti tallaong kadagiti tampok ti panagbasa iti Biblia, ad-adun ti mangsursurot iti eskediul iti panagbasa iti Biblia. Maipapan iti Paset Num. 2, adu a kakabsat ti nagkomento maipapan kadagiti pagsayaatan ti panangipamaysa iti material a dida mangisaganan iti introduksion ken konklusion. Dagidiay matudingan iti daytoy a paset ad-adda itan a maipamaysada a naimbag no kasanoda a parang-ayen ti abilidadda nga agbasa.—1 Tim. 4:13.
3 Magunggonaan ti Amin: Makaparagsak ti agkomento kadagiti gimong. (Prov. 15:23) Ti nasapa a pannakaited dagiti saludsod iti oral a repaso ket makatulong kadatayo nga agsagana ken sidadaan a makipaset iti repaso. Maysa pay, nangrugi iti Enero 1, 2004 a ruar Ti Pagwanawanan, adda dagiti artikulo maipapan kadagiti tampok a paset dagiti libro iti Biblia a maitunos iti naituding a basaentayo iti Teokratiko nga Eskuelaan ti Panagministro. Dagitoy nga artikulo ket nakatulong iti adu a mangipaay kadagiti makapabileg a komento bayat dagiti tampok iti panagbasa iti Biblia. Kadagiti sumarsaruno a ruar Ti Ministeriotayo iti Pagarian, addanto dagiti saludsod iti oral a repaso a naibatay kadagitoy nga artikulo iti Pagwanawanan.
4 Amin a nagpasalista iti eskuelaan ket addaan iti naisangsangayan a pribilehio nga agsagana ken mangiparang kadagiti pasetda. Magunggonaantayo amin kadagiti positibo a komento nga ibaga ti manangaywan iti eskuelaan iti plataporma. Ad-adda a magunggonaan ti tunggal estudiante manipud kadagiti kanayonan a balakad a mabalin nga ipaayna bayat ti panagsaritada a dua kalpasan ti gimong. Mangipaay met iti kanayonan a tulong dagiti ensayo a mangisalsalaysay kadagiti kualidad ti panagpalawag nga adda iti ngudo ti tunggal kapitulo iti libro a Magunggonaan iti Edukasion nga Ipaay ti Teokratiko nga Eskuelaan ti Panagministro.
5 No adda dagiti praktikal ken Nainkasuratan a punto a maiturong iti imatangmo bayat ken kalpasan ti eskuelaan, isuratmo dagita iti bukodmo a kopia ti libro nga Eskuelaan ti Panagministro. Mennamennaem dagiti nasursurom, ken usigem no kasano a daytoy nga aspeto ti edukasion nga ipapaay ti Dios, tultulongannaka a mangparang-ay iti espiritualidadmo.