Dagiti Manangaywan a Mangidadaulo—Ti Manangaywan iti Teokratiko nga Eskuelaan ti Panagministro
1 Ti manangaywan iti Teokratiko nga Eskuelaan ti Panagministro ket lalaki a nataengan iti naespirituan a naregta nga agpalawag ken mangisuro ken maikari iti pammadayaw ken pannakikooperartayo. (1 Tim. 5:17) Ania dagiti rebbengenna?
2 Aywananna ti libraria ti Teokratiko nga Eskuelaan ti Panagministro idiay Kingdom Hall. Interesado unay a mangparegta kadagiti amin a maikari nga agpasalista iti eskuelaan. Siguraduenna a masalimetmetan ti umiso a rekord tapno naurnos ti pannakaaramid dagiti paset ken saan a naladladaw ngem tallo a lawas sakbay ti kada sesion ti eskuelaan. Masapul a kabesaduenna a naimbag ti kongregasion, a sipapanunot iti kada estudiante ken iti kabaelanna. Nupay mabalin a tulongan ti sabali a kabsat a mangisagana iti eskediul ti eskuelaan, ti manangaywan a mismo ti mangasikaso iti umiso a panangdutok kadagiti agpaset.
3 Tapno epektibo ti panangisurona iti eskuelaan, masapul nga agsagana a siaanep ti manangaywan iti kada lawas, nga adalenna a naimbag ti naituding a material. Makatulong daytoy tapno maparayrayna ti panaggagar ti kongregasion iti maadal, tapno matingitingna no umiso ti pannakasaklaw ti naituding a material, ken tapno maitampokna dagiti napapateg a punto a mairaman iti panagrepaso.
4 Kalpasan ti palawag ti kada estudiante, komendaran ti manangaywan ti estudiante ken ilawlawagna no apay a nasayaat ti impakitana a kualidad ti panagpalawag wenno no apay a kasapulan a parang-ayenna dayta. No adda makasapul iti kanayonan a tulong iti pannakaisagana iti pasetna iti eskuelaan, mabalin a personal a tumulong ti manangaywan wenno asinoman a dutokanna.
5 Tapno magunggonaantayo a naan-anay iti kinasaet ti manangaywan iti Teokratiko nga Eskuelaan ti Panagministro ken dadduma pay a dutokanna a mammagbaga, tumabunotayo koma a regular iti eskuelaan. Masapul met nga itungpaltay amin a pasettayo ken iyaplikartay ti maibalakad kadatayo agraman ti balakad kadagiti sabsabali nga estudiante. Iti kastoy a wagas, in-inut a maparang-aytay ti abilidadtayo a mangisango iti mensahe ti Pagarian iti publiko ken iti binalaybalay.—Ara. 20:20; 1 Tim. 4:13, 15.