Kayatko ti Mangirugi iti Panangyadal iti Biblia!
1 Adu kadatayo ti agtarigagay a maaddaan iti iyad-adalan iti Biblia, ket nasayaat dayta. Maragpattay ti kalattayo a panagaramid kadagiti baro nga adalan babaen ti trabaho a panangyadal iti Biblia. (Mat. 28:19, 20) Ngem adu kadatayo ti saan pay a nakapadas iti naisangsangayan a rag-o nga ibunga ti panangisuro iti kinapudno kadagiti sabsabali, idinto ta bulbulan wenno nalabit tawtawenen ti napalabas. Aniat’ maaramidantay iti daytoy ita a Nobiembre? Tangay maitampok ti libro a Pannakaammo ita a bulan, mabalintay ti mangaramid iti naisangsangayan a panagregget a mangusar iti dayta a pangirugi kadagiti baro a panangyadal iti Biblia.
2 Mangilasin iti Maysa Wenno Ad-adu Pay a Ngudo ti Lawas: Paregtaenmi ti tunggal maysa a mangilasin iti tiempo ita a bulan tapno ipamaysada ti mangirugi iti baro a panangyadal iti Biblia. Mangpili koma dagiti konduktor ti Panagadal iti Libro ti Kongregasion kadagiti ngudo ti lawas nga espesipiko a mausar iti daytoy a panggep sada organisaren dagiti grupoda tapno pagreggetanda ti agdadanggay a makiraman iti trabaho a panagsarungkar.
3 Itugotyo dagiti rekordyo iti panagsarungkar kabayatan dagiti taripnong sakbay ti panangasaba. Kalpasanna sarungkaranyo amin a nangipakita iti interes, nangala iti literatura, wenno timmabuno kadagiti gimong. Espesipiko nga irantayo ti mangirugi iti panangyadal iti kada panagsarungkar.
4 Idemostra ti Panagadal iti Biblia: Kadagiti napili a pagtataripnongan sakbay ti panangasaba, adda koma maiparang a nasayaat ti pannakaisaganana a demostrasion, a mangipakita no kasano ti mangirugi iti panangyadal iti panagsarungkar. Mabalinyo a kunaen: “Adu a tattao ti addaan iti Biblia, ngem dida mabigbig nga adda dita ti sungbat dagiti napapateg a saludsod a sangsanguentay amin. [Ipakita dagiti linaon ti libro a Pannakaammo, ket basaenyo dagiti tema ti kapitulo 3, 5, 6, 8, ken 9.] Babaen ti maysa nga oras wenno nasursurok pay iti makalawas a panangusar iti daytoy a katulongan iti panagadal, magun-odyo ti pamunganayan a pannakaawat kadagiti linaon ti Biblia iti sumagmamano laeng a bulan. No kayatyo ti mangpili iti maysa kadagitoy a tema, maragsakanak a mangipakita kadakayo no kasano ti pannakaaramid dayta a programa.” No agalikaka nga agadal gapu ta okupado, ilawlawag nga addaantay met iti napaababa a programa. Ipakitayo ti broshur a Kalikaguman, ket ibagayo nga adalenyo iti 15-30 a minuto ti maysa nga ababa a leksion iti kada lawas.
5 No pagreggetantay amin ti agkaykaysa a mangirugi iti panangyadal ken no ikararagtayo a bendisionan ni Jehova ti panangikagumaantayo, sigurado a makasaraktayo kadagiti baro a mayadalan! (1 Juan 5:14, 15) No kayatyo nga adda iyadalanyo iti Biblia, nalabit gundawayyo itan ti mangirugi iti maysa.