Sarungkaran Dagidiay Nangipakita ti Interes
1 Ti kalattayo no interesado dagiti tattao isut’ panangtulong kadakuada a mangadal ti ad-adu pay maipapan ken Jehova ken ti Anakna. Nupay adut’ maadalda no isuda a mismo ti mangbasa, kaskasdi a kasapulanda ti tulongtayo tapno magun-odda ti umiso a pannakaammo. Ngarud, masapul a sarungkarantay ida.
2 No nagsaritaanyo ti petsa ti pannakaipasngay ni Jesus iti immuna nga ibibisita, mabalinyo a rugian ti panagsarungkaryo iti panangikuna:
◼ “Idi kallabes a kaaddak ditoy, kinitatayo daytoy ilustrasion maipapan ken Jesus idi naipasngay, ditoy kapitulo 5 ti libro. Nadlawyo kadi a masansan nga ibilang dagiti tattao ni Jesus a kas maysa a maladaga wenno tao a matmatayen iti maysa nga istaka? Ania ti pagarupyo a sasaaden ni Jesus itatta? [Palubosan a sumungbat.] Ditoy kapitulo 133 iti umuna a parapo iladawanna ni Jesus a kas Mannakigubat nga Ari a nakatugaw iti trono ti Dios. [Basaen ti Apocalipsis 11:15.] Saan nga agbayag ipungetnan ditoy daga ti kinadakes ken ipasdekna dagiti kasasaad a makita iti ilustrasion ti panid 2 iti daytoy a kapitulo. Tapno magun-od ti agnanayon a biag, kasapulantayo ti umiso a pannakaammo ken Jesus ken ni Amana. [Basaen ti Juan 17:3.] Nalabit nga ad-adu pay ti mapagsaritaantayo iti daytoy a libro inton sumaruno nga isasarungkarko.”
3 No agsublikayo tapno ituloy a pagsaritaan maipapan iti maudi nga al-aldaw, mabalinyo a kunaen:
◼ “Iti daydi maudi a kaaddak ditoy, nagsaritaantayo maipapan ti [no ania daydi a pasamak]. Timmaud ti saludsod no apay a dagitoy a bambanag ket mapaspasamakda itatta. Malagipyo kadi no ania ti kinuna ni Jesus? [Palubosan a sumungbat.] Wen, dagitoy a bambanag ti ebidensia nga addatayon iti maudi nga al-aldaw. Naited ti kanayonan pay nga ebidensia ditoy 2 Timoteo 3:1-5. [Basaen sa pagsaritaan ti nadumaduma a punto.] No kayatyo, mabalintay a repasuen dagiti kanayonan a punto ditoy kapitulo 111 iti libro a naibatik kadakayo.” [Basaen ken pagsaritaan dagiti sumagmamano a parapo, sa iyurnos ti panagsubli iti sumaruno a lawas maipaay iti kanayonan a panagsarita.]
4 No agsublikayo a bumisita iti naganak a maseknan kadagiti problema ti pamilia, mabalinyo a sawen daytoy:
◼ “Ammok a dakayo, kas naganak, kayatyo ti kasayaatan nga agpaay iti annakyo. Tangay ditay masaluadan ida manipud iti tunggal banag a dakes, masapul nga isuroyo ida no kasano a sarangtenda dagiti problema ti biag. Ania ti pagarupyo a maaramidan? [Palubosan a sumungbat.] Maysa kadagiti kangrunaan a banag a maaramidan dagiti nagannak isu ti panangbusbosda ti tiempo kadagiti annakda. Inaramid ni Jesus daytoy, kas nairekord iti Lucas 18:15-17. [Basaen.] Nasarakan dagiti adu a nagannak a ti panangbusbos iti sumagmamano a minutos iti kada aldaw a mangbasa a kadua dagiti annakda iti maysa a kapitulo daytoy a libro, Ti Katan-okan a Tao a Nagbiag Pay Laeng, ket makagunggona unay iti nasapa a pannakasanay dagiti agtutubo. No kayatyo, maragsakanak a tumulong kadakayo a mangaramid iti daytoy.”
5 Sapay koma ta bendisionan ni Jehova ti reggettayo a mangimula ti pannakaammo ken Jehova ken ti Anakna babaen ti epektibo a panagsarungkar iti Disiembre.