Paset 3—Magunggona Manipud Teokratiko nga Eskuelaan ti Panagministro iti 1996
1 Kayat ni apostol Pablo idi nga isu ikararagan dagiti kakabsatna tapno maaddaan koma iti abilidad a mangisao ti naimbag a damag a situtured. (Efe. 6:18-20) Kayattayo met a masukay ti kasta nga abilidad. Iti dayta a panggep, ipategtayo ti tulong nga ipaay ti Teokratiko nga Eskuelaan ti Panagministro.
2 Kas estudiante, umawattayo iti personal a balakad tapno tulongannatay a rumang-ay iti abilidadtayo nga agsao ken mangisuro. (Prov. 9:9) Magunggonaantayo met babaen ti panagimdeng iti balakad nga awaten ti dadduma nga estudiante, nga iyaplikar iti bagbagitayo. No agisaganakayo iti paset, masapul a siaannad nga adalenyo ti pangadawan a material tapno manamnama nga umiso ti panangisalaysaytayo. Masapul a maitutop iti intero a tema dagiti kangrunaan a punto ken kasuratan nga usarentayo. No mairaman ti sabali a tao iti paset, nasakbay koma ti pannakaensayona a naimbag. Bayat nga agprogresotayo, ikagumaan koma ti panagsao iti ekstemporaneo, nga usaren dagiti nota imbes a manuskrito.
3 Sumangpet koma a nasapa dagiti amin nga agpaset iti pagadalan, itedda iti manangaywan ti pagadalan ti Speech Counsel slip-da, sa agtugawda iti asideg ti sango ti paggigimongan. Nasakbay koma nga ipakaammo dagiti kakabsat a babbai iti manangaywan ti pagadalan ti parang (setting) ti pasetda ken no agtakder wenno agtugawda. Tumulong daytoy kadagidiay mangyur-urnos iti plataporma tapno maisagana a nasakbay dagiti amin a bambanag.
4 Panagsagana iti Paset Num. 2: Ti panggep iti panagbasa ti Biblia isut’ panangtulong iti estudiante a mangparang-ay iti abilidadna nga agbasa. Kasano ti kasayaatan a pannakaragpat iti daytoy? Ti napigsa a maulit-ulit a panangbasa iti material ti kasayaatan a wagas tapno makabesado dayta. Tapno maammuan ti kaipapanan ken umiso a panangyebkas iti aniaman a karkarna a sasao, masapul a kitaen ti estudiante ida iti diksionario.
5 Makatulong ti New World Translation iti umiso a pannakayebkas dagiti nagan ken karkarna a sasao a masarakan iti Biblia. Babaen daytoy a magenne-gennedna iti silsilaba dagitoy ken ikkanna kadagiti marka ti bengngat. (Kitaenyo ti “Amin a Kasuratan Impaltiing ti Dios ket Naimbag,” pinanid 325-6, parapo 27-8.) Gagangay a nagangganetget ti pannakaisao ti silaba a sarunuen ti marka ti bengngat. No ti nabengngatan a silaba ket agngudo iti bokales, mayatiddog ti pannakayebkas ti bokales. No agngudo iti konsonante ti silaba, ababa ti bokales iti dayta a silaba. (Maidilig ti Saʹlu iti Salʹlu.) Tapno matulonganda nga agsagana kadagiti pasetda iti panagbasa ti Biblia, dumngeg ti dadduma a kakabsat kadagiti audiocassette ti Sosiedad.
6 Matulongan nagannak dagiti agtutuboda nga agsagana iti pasetda ti panagbasa. Mabalin nga iraman daytoy ti panagimdeng no agensayo ti ubing sa maipaayan kadagiti makatulong a singasing a pammarang-ay. Ipalubos ti naituding nga orasna ti ababa nga introduksion ken maitutop a konklusion a mangyaplikar kadagiti panulbek a punto. Iti kasta mapatanor ti estudiante ti abilidadna nga agsao iti ekstemporaneo.
7 Sikakararag a nagkiddaw ti salmista: “O Jehova, luktam koma dagiti bibigko, tapno ti ngiwatko iparangarangna ti pannakaidaydayawmo.” (Sal. 51:15) Tumulong koma kadatayo ti intay pannakipaset iti Teokratiko nga Eskuelaan ti Panagministro a mangpennek iti isu met laeng a tarigagay.