Umariwekwek ti Mainaynayon
1 Kas idi umuna a siglo, nakaskasdaaw ti panagrang-ay ti kongregasion Kristiano ita. (Ara. 2:41; 4:4) Idi napan a tawen, 366,579 a baro nga adalan ti nabautisaran, agpromedio iti nasurok a 1,000 kada aldaw! Nasurok a maysa a milion ti nabautisaran iti napalabas a tallo a tawen. Wen, umariwekwek dagiti manamati nga agtultuloy nga inaynayon ni Jehova.—Ara. 5:14.
2 Kasapulan dagiti adu nga agdadamo ti tulong ken pannakasanay manipud kadagidiay napigsa iti pammati. (Roma 15:1) Kadagiti nagkauna a Kristiano, adda dagidiay saan a ‘rimmang-ay iti kinanataengan’ uray adun a tawen a nabautisaranda. (Heb. 5:12; 6:1) Dayta ti gapuna nga, iti suratna kadagiti Hebreo, impaganetget ni Pablo dagiti banag a makasapul iti atension tapno rumang-ay dagiti Kristiano iti naespirituan. Ania dagitoy, ket kasano a maipaay ti kasapulan a tulong?
3 Panangpatanor Kadagiti Nasayaat nga Ugali iti Panagadal: Maitunos iti bilin ni Pablo, ti panagbalin a nasayaat nga estudiante ramanenna ti aktibo a panagsursuro, panangulit-ulit, ken panangusar iti “nakired a taraon” nga ipapaay ti organisasion ni Jehova. (Heb. 5:13, 14; kitaenyo ti Agosto 15, 1993, Pagwanawanan, panid 12-17.) No iranudyo kadagiti kabbaro a manamati dagiti napateg a gameng ti kinapudno a nakaliyo babaen ti personal a panagsukisok, mabalin a magutugotyo ida a mangpatanor kadagiti nasayaat nga ugali iti panagadal. Nalabit mabalinyo nga awisen sagpaminsan ti maysa nga agdadamo a makikadua kadakayo iti personal wenno sangapamiliaan a panagadalyo.
4 Regular nga Itatabuno Kadagiti Gimong: Ti di agbalbaliw nga ulidan ken naayat a pammaregtayo tulonganna dagiti baro a miembro ti kongregasion a mangliklik iti “kaugalian” dagiti dadduma a lumangan kadagiti Nakristianuan a gimong. (Heb. 10:24, 25) Tulonganyo ida a mangapresiar a dagiti gimong ti naespirituan a tali a pagkaptanda iti kongregasion. Ipariknayo kadakuada a maawatda kas paset ti panagkakabsattayo.
5 Iyaadani ken Jehova a Buyogen ti Panagtalek: Tapno maparmek dagiti nainlasagan a pagkapuyan ken dakes a kababalin, masapul nga umadanitayo ken Jehova iti kararag. Masapul a masursuro dagiti agdadamo a babaen ti panagdawat iti tulong ken Jehova, kas indagadag ni Pablo, dida koma bumdeng. (Heb. 4:15, 16; 10:22) Ti panangisalaysay kadagiti personal a kapadasanyo iti daytoy a banag papigsaenna ti panagtalek ti agdadamo nga ipangag ni Jehova dagiti napasnek a kararag.
6 Panangilasin iti Tiempo Para iti Ministerio: Impakita met ni Pablo a no ‘kankanayon nga idatontayo iti Dios ti sakripisio ti panagdaydayaw,’ makapabileg dayta iti naespirituan. (Heb. 13:15) Mabalinyo kadi nga awisen ti baro nga agibumbunannag a makikadua kadakayo iti linawas nga urnosyo iti tay-ak ti serbisio? Nalabit mabalinyo nga isagana a dua dagiti presentasionyo wenno padasen ti maysa a benneg ti ministerio a di pay napadasan ti baro nga agibumbunannag.
7 Ti panangikagumaantayo a mangsanay ken mangparegta kadagiti baro a miembro ti kongregasion tulonganna ida a mangpatanor iti natibker a pammati a kasapulan tapno ‘mataginayon a sibibiag ti kararuada.’—Heb. 3:12, 13; 10:39.