Kasapulandakayo!
1 Pasaray malanganantayo ti maysa wenno ad-adu pay a gimong ti kongregasion, a kunatayo ‘saandak a kasapulan; dida pay ketdi madlaw nga awanak sadiay.’ Saan a pudno dayta! Kas iti aniaman a paset ti pisikal a bagitayo, adda napateg a maaramidan ti tunggal maysa kadatayo iti panagandar ti kongregasion. (1 Cor. 12:12) Ti kaawantayo iti linawas a gimong maapektaranna ti naespirituan a salun-at dagiti sabsabali a tumabuno. No awankayo sadiay, namnamaenyo—kasapulandakayo!
2 Ti Napateg nga Akemyo: Sinegseggaan ni Pablo ti makitimpuyog kadagiti kakabsatna. Ilawlawag ti Roma 1:11, 12 no apay: “Tapno maiburayko kadakayo ti sumagmamano a naespirituan a sagut . . . tapno adda koma panagpipinnaregta kadakayo, iti tunggal maysa babaen ti pammati ti sabali, agpadpada iti pammatiyo ken kaniak.” Umasping iti dayta, babaen kadagiti komentotayo, dagiti pasettayo iti gimong, ken ti mismo a kaaddatayo, dakkel ti maaramidantayo iti pannakapabileg ti tunggal maysa tapno makapagtultuloytayo a matalek.—1 Tes. 5:11.
3 Diyo kadi segseggaan dagiti sabsabali kadagiti gimong ti kongregasion? Imdenganyo a naimbag dagiti komentoda ken apresiarenyo dagiti ebkas ti pammatida. Mapabilegkayo kadagiti naespirituan a talugadingda. No awanda iti gimong, mariknayo nga adda napateg a banag a kurang. Kasta met laeng ti panagrikna kadakayo dagiti kakabsatyo no awankayo.
4 Ti Napateg nga Akem Dagiti Gimong: Iti naminsan nagkomento Ti Pagwanawanan iti kinapateg dagiti gimong iti naespirituan a pannakaisalakantayo a kunana: “Iti daytoy nariribuk, imoral a lubong, ti kongregasion Kristiano ket pudno a maysa a naespirituan a kamang . . . , maysa dayta a taklin a napnuan talna ken ayat. Gapuna, regular a tumabunokayo kadagiti amin a gimong.” (w93-IL 8/15 11) Iti inaldaw, maipasangotayo kadagiti kasasaad a mangpakapsut kadatayo iti naespirituan. No ditay agannad, makumikomtayo unay kadagiti bukodtay a pakaringgoran agingga a maliwayantayon dagiti napatpateg a naespirituan a pakaseknan. Kasapulantayo amin ti pammaregta ti sabsabali tapno makapagtalinaedtayo a nagkaykaysa ken naregta nga agserbi iti Dios.—Heb. 10:24, 25.
5 Napateg ti itatabunotayo kadagiti gimong. Mabalin a ditay makatabuno sagpaminsan gapu iti sakit wenno di mapakpakadaan a pasamak. Ngem no awan kakasta a parikut, kanayon koma a determinadotayo a maibilang iti timpuyog dagiti agkaykaysa a mangidaydayaw ken Jehova!—Sal. 26:12.