Nagsayaat Ketdin ti Tumabuno a Kanayon!
1 Iti adu a dekada idiay Makindaya a Europa, adu kadagiti patpatgentayo a kakabsat ti napawilan nga agtataripnong iti publiko. Agasenyo ti rag-oda idi nagpatingga ti pannakaipawil ken nawayadan a makapagtataripnong!
2 Maipapan iti bisitana iti maysa kadagita a kongregasion, nagsurat ti manangaywan iti sirkito: “Iti rabii ti Martes, iti mismo a rugi ti panagbisitak, nadadael ti heating system. Iti ruar, kasla iti freezer ti kalam-ekna, ket iti uneg, napudpudot bassit nga agarup 5 degrees Celsius. Nakatugaw dagiti kakabsat a nakasuot iti amerikana, dalungdong, guantes, kallugong, ken botas. Awan makadanggay nga agbasa iti Biblia, ta narigat ti aglukib. Bayat a nakatakderak a nakaamerikana iti plataporma, simmikkilakon gapu iti lammin, ket kada agsaoak, makitak nga umasuk ti ngiwatko. Ngem ti nakasdaawak ket awan a pulos ti nangngegko a reklamoda. Amin a kakabsat kinunada nga anian a nagragsak ken nagsayaat ketdin ti tumabuno!” Di pulos pinanunot dagidiay a kakabsat ti naglangan iti dayta a gimong!
3 Kasta Kadi ti Panagriknayo? Tagipatgentay kadi ti gundaway a makapagtataripnong a nawaya kadagiti linawas a gimongtayo? Wenno laglag-anentay kadi dagiti gimong bayat a nasayaat dagiti kasasaad? Nalabit saan a nalaka ti makigimong a regular, ken mabalin nga addada tiempo a nainkalintegan a ditay tumabuno. Nupay kasta, ditay liplipatan nga iti nagtetengngaantayo addada dagidiay makabigbig iti pateg dagiti gimong ken gistay kanayon a tumabunoda nupay lallakay ken babbaketdan, nakaro ti sakitda, baldado, makabannog ti eskediulda iti trabaho, ken dadduma pay a nadadagsen a responsabilidad. Anian a nagsasayaat nga ulidan a tuladentayo!—Idiligyo ti Lucas 2:37.
4 Iyugalitayo a suportaran ti pudno a panagdayaw babaen ti itatabuno kadagiti amin a Nakristianuan a gimongtayo, manipud iti bassit a grupo ti panagadal iti libro agingga iti dakkel a kombension. Apay a rumbeng a saetantay unay a tabunuan dagitoy a taripnong? Gapu ta nadibinuan a bilin ti panagtataripnongtayo a sangsangkamaysa. Ngem adda pay sabsabali a napapateg a rason. Kasapulantay amin dagiti pagsayaatan ti nadibinuan nga instruksion ken ti tulong ti nasantuan nga espiritu, a magun-od kadagiti gimong. (Mat. 18:20) Mapabilegtayo babaen ti panagpipinnaregta no makitimpuyogtayo kadagiti kakabsattayo.—Heb. 10:24, 25.
5 Iti daydi panagbalbaliw ti langa ni Jesus, kinuna ni Pedro, “Manangisuro, nasayaat no ditoytayo.” (Luc. 9:33) Kasta koma met ti panagriknatayo maipapan iti amin a Nakristianuan a gimongtayo. Wen, nagsayaat ketdin ti tumabuno a kanayon!