Ti Ibibisita a Pakabendisionan
1 Naragsakan ni Zaqueo a nangsangaili ken Jesus iti pagtaenganna. Ket anian a bendision ti imbunga dayta nga ibibisita!—Luc. 19:2-9.
2 Itatta, kas Ulo ti kongregasion, iturturong ni Jesu-Kristo dagiti panglakayen nga ‘ipastoranda ti arban ti Dios.’ (1 Ped. 5:2, 3; Juan 21:15-17) Mainayon pay iti panangisuro kadagiti gimong ken panangidaulo iti tay-ak ti serbisio, mangipaay dagiti manangaywan iti kongregasion iti naayat, personal a tulong kadagiti indibidual a kameng ti kongregasion. Gapuna, mabalin a namnamaenyo a sagpaminsan personal a kasaritadakayo dagiti panglakayen, idiay man pagtaenganyo, idiay Kingdom Hall, bayat nga agkakaduakayo idiay tay-ak ti serbisio, wenno iti sabsabali pay nga okasion. Rumbeng kadi a pagdanaganyo ti ibibisita dagiti panglakayen? Saan. Ti ibibisitada kadakayo dina kayat a sawen nga adda dakes a naaramidanyo. Ania ngarud ti panggep ti panangipastor nga isasarungkar?
3 Kinuna ni Pablo a kayatna a sarungkaran dagiti kakabsat ‘tapno kitaenna ti kasasaadda.’ (Ara. 15:36) Wen, kas naayat a papastor, interesado unay dagiti panglakayen iti kasasaadyo. Kayatda ti mangitukon iti naespirituan a saranay a makatulong ken makapabileg kadakayo. Tarigagayan ti naayat a Pastortayo a ni Jehova a magun-odan ti tunggal maysa kadatayo ti kasta a personal a pannakaseknan.—Ezeq. 34:11.
4 Apresiarenyo ti Ibibisita Dagiti Panglakayen: Ti panggep ni Pablo a nangbisita kadagiti kakabsatna ket tapno ‘mangiburay kadakuada ti sumagmamano a naespirituan a sagut tapno mapatibkerda; ken tapno adda koma panagpipinnaregta.’ (Roma 1:11, 12) Kasapulantay amin ti naespirituan a pammaregta kadagitoy narikut a maudi nga al-aldaw, ken kasapulantay ti tulong tapno makapagtultuloy a natibker iti pammati. Di pagduaduaan a ti pudno a panangapresiaryo iti panangipastor mangibunga iti nasayaat a panagpipinnaregta.
5 Apresiarenyo dagiti adu a pagimbagan a magun-od iti panangipastor dagiti panglakayen. No adda parikut wenno saludsod a pakaseknanyo, laglagipenyo nga adda dagiti panglakayen iti kongregasion a tumulong. Dikay agalikaka a mangibaga kadakuada dagiti aniaman a parikut a mabalin a mangapektar iti naespirituan a salun-atyo. Apresiarenyo daytoy naayat nga urnos ni Jehova, ket pagragsakanyo dagiti bendision nga iyeg ti kasta nga ibibisita.