Usarentayo a Nainsiriban Dagiti Literaturatayo

¹ Idi Setiembre ken Oktubre iti daytoy a tawen, naangay dagiti espesial a miting dagiti panglakayen ken ministerial nga ad-adipen iti intero a Pilipinas tapno pagsasaritaanda ti baro nga urnos para iti napasimple a panagiwaras iti literatura a mangrugi inton Enero 10, 2000. Simmaruno kadagitoy a miting, kalpasan ti Panagadal ti Pagwanawanan iti lawas ti Nobiembre 1, adda surat a naibasa kadagiti amin a kongregasion tapno mapagsasaritaan dagiti saludsod a mainaig iti daytoy baro nga urnos. Kalpasanna, idi lawas ti Nobiembre 8, naangay ti espesial a Gimong ti Serbisio iti amin a kongregasion tapno ipakita no kasanonto a maaramid ti trabahotayo a panangasaba iti sidong ti baro nga urnos. Sigurado a nakasaganatayo aminen a mangirugi iti daytoy baro nga urnos inton Enero 10, apaman a malpas ti maudi a kombension distritotayo.

² Yantangay ipaimatayo iti publiko dagiti literatura ken magasintayo a di madakamat ti masinunuo a gatadna, nasken unay nga usarentayo ti pannakaawat iti panagiwaras kadagiti publikasiontayo. Itultuloytayo ti mangtukay iti interes babaen ti panangusar iti maysa kadagiti introduksion iti libro a Panakirinnason. No awan makita nga interes, saan a kasapulan nga itukon ti literatura. Ditay kayat a sayangen ti aniaman a literaturatayo babaen ti panangitukon kadagidiay saan nga interesado. Ngem no adda makita nga interes ket umanamong ti bumalay a mangbasa iti literatura, mabalin nga itukon dayta. Kayattayo nga usaren a nainsiriban dagiti literaturatayo.

³ Adtoy ti sumagmamano a mabalinyo a kunaen kalpasan a maipakitayo ti literatura: “No maragsakankayo a mangbasa iti daytoy a publikasion, pagragsakak nga ibati kadakayo.” Nalabit isaludsod ti bumalay: “Mano ti bayadna?” Mabalinyo a sungbatan: “Saan a negosio daytoy trabahomi. Saanmi nga ilaklako daytoy a literatura. Ti trabahomi ket maar-aramid a boluntario iti 233 a pagilian iti intero a lubong tapno matulongan dagiti tattao a mangammo iti dalan nga agturong iti biag nga agnanayon. No kayatyo ti agdonar iti daytoy a trabaho, maragsakanak a mangawat iti dayta.”

⁴ Iti dadduma a kaso, mabalin a di maitutop a pagsaritaan ti maipapan kadagiti donasion para iti sangalubongan a trabahotayo. Kas pagarigan, mabalin nga iyimtuod ti interesado a bumalay: “Ipaayyo kadi a libre?” Mabalin nga isungbattayo: “No kayatmo a basaen ti publikasion ken kayatmo nga alaen, wen, kukuamon. Kayatko ti agsubli inton umay a lawas tapno ilawlawagko ti napagsaritaanta ken tapno ad-adda pay a maisalaysayko kenka ti maipapan iti sangalubongan a trabahomi.” Iti sumaganad nga isasarungkar mabalin a mailawlawag iti bumalay no kasano a masupsuportaran iti pinansial ti trabahotayo.

⁵ Wenno mabalin nga awaten a dagus ti bumalay ti literatura sa kunaenna, “Pagyamanan.” Mabalinyo a sungbatan iti kastoy: “Awan aniamanna. Ammok a tagiragsakemto dayta. Adu ti masdaaw no kasano a masupsuportaran iti pinansial daytoy a trabaho, yantangay ar-aramidenmi daytoy iti sangalubongan. Dagiti adu nga agbasbasa kadagiti publikasionmi inyebkasda ti panangapresiar kadagiti naammuanda ken nagboluntarioda a mangted iti bassit a donasion tapno ad-adu pay ti maipaayan iti publikasion. No kasta ti aramiden dagiti tattao, maragsakankami a mangawat iti dayta.”

⁶ Nabatad a saantay a basta ited lattan dagiti literatura iti asinoman. Kayattayo a dagiti literatura tulonganna koma dagiti napasnek a tattao a mangammo iti ad-adu pay maipapan kadagiti panggep ni Jehova. Sayang laeng nga ibati ti literatura kadagiti tattao a di mangapresiar iti naespirituan a bambanag. (Heb. 12:16) Kasanotay nga ammo no adda naipakita nga interes? No sidadaan ti tao a makisarita kadakayo, nasayaat daytoy a pagilasinan. No dumdumngeg bayat nga agsasaoka, wenno iyebkasna ti kapanunotanna, wenno agsaludsod, mangipakita nga aginteres. No nasayaat ken nadayaw ti pannakisaritana kadakayo, mangipasimudaag daytoy iti kinaimbag. No napasnek nga agdengngeg bayat a basaenyo ti Biblia ipasimudaagna ti panagraem iti Sao ti Dios. No makitayo dagita nga ebidensia ti napasnek a panaginteres, nalabit basaen ken apresiarento dayta a tao ti literatura nga alaenna.

⁷ Aniaman a kontribusion a maawat iti publiko ket maipisok koma iti kahon ti kontribusion idiay Kingdom Hall a namarkaan iti “Contributions for the Society’s Worldwide Work.​—Matthew 24:14.” Apresiarentayo dagita a kontribusion, ngem kinapudnona, dagita a kontribusion nga aggapu iti publiko dina masulnitan amin a paggastuan. No kasta, siasino ita ti nangnangruna a makinresponsabilidad iti pannakasuporta ti sangalubongan a trabaho, a pakairamanan ti pannakaaramid, pannakaipatulod, ken pannakaiwaras dagiti literatura ken magasin? Ti mismo nga ili ni Jehova ti mangsuporta iti sangalubongan a trabaho. Gapuna, mangrugi iti Enero, nasken a sipapanunottayo amin ken sistematiko koma ti panagdonartayo. Kaykayat dagiti adu ti agdonar bayat a mangalada iti literatura ken magasin idiay counter ti Kingdom Hall, yantangay iti kastoy a wagas mapalagipanda nga adda paggastuan iti pannakapataud dagiti literatura ken kinapudnona maysa daytoy a paset ti sangalubongan a trabaho a panangasaba.

⁸ Nupay kankanayon a boluntario dagiti kontribusion, daytoy nga urnos ket palubosanna ti indibidual nga agtignay ken agpanunot no kasano a makitinnulong kadagiti paggastuan ti organisasion nga idaldalan ti espiritu ni Jehova. Ita, nanayonanen ti moral a responsabilidad ken pribilehio ti tunggal maysa kadatayo a mangidayaw ken Jehova babaen kadagiti napapateg a sanikuatayo. (Prov. 3:9) Ti panagtignaytayo iti panangidalan ti espiritu ni Jehova bayat nga ipaaytayo dagiti kontribusiontayo ket iyanninawna nga ammotay unay nga ibilangnatayo ni Jehova a mapagtalkan.​—1 Cor. 4:1, 2.

⁹ Daytoy a panagbalbaliw iti metodo ti panangasabatayo ket mangipaay iti kanayonan nga ebidensia kadagiti tattao a ‘saantayo a managlako iti sao ti Dios.’ (2 Cor. 2:17) Ipaneknekna met a naidumatayo unay ken naisinatayo iti lubong.​—Juan 17:14.

¹⁰ Manginanamatayo a dagidiay mangapresiar kadagiti napateg a kinapudno iti Sao ti Dios ken ti pateg dagiti probision ti Sosiedad, a pakairamanan ti pannakapataud dagiti publikasiontayo, ket agtultuloy a matukay ti pusoda a tumulong a sipaparabur iti daytoy a trabaho agingga iti panungpalan daytoy a sistema. (2 Cor. 9:6-14) Makapagtalektayo a naan-anay ken Jehova, yantangay ammotayo a kabaelanna ti “mangaramid ti ad-adda pay a siwawadwad unay ngem kadagiti isuamin a bambanag a dawaten wenno panunotentayo.” (Efe. 3:20) Ngem tapno awatentayo ti naan-anay a pamendision ni Jehova, siguraduentayo nga aramidentay ti pasettayo babaen ti nainsiriban a panangusartay kadagiti literaturatayo ken babaen ti ‘panangyeg iti amin nga apagkapullo iti kamalig.’ (Mal. 3:10) Sapay koma ta bendisionan ni Jehova ti nagkaykaysa a panagreggettayo a mangaramid iti daytoy ita a tawen.