Maysa a Pribilehio a Silulukat Kadagiti Ubbing
1 Maay-ayatan dagiti adu a nagannak itan no lagipenda ti maysa a pribilehio a tinagiragsakda idi ubbingda pay bayat nga agmatmataenganda iti kinapudno—ti Panagiwaras iti Magasin. Nayussuat dayta a trabaho iti amin a kongregasion idi 1949. Maysa nga aldaw iti kada lawas, impamaysa ti isuamin ti agiwaras iti Pagwanawanan ken Agriingkayo! kadagiti lansangan, iti binalaybalay, tiendaan, ken iti dadduma pay a wagas. Nangnangruna a sinegseggaan dagiti ubbing nga agibumbunannag ti makiraman iti daytoy a trabaho gapu ta impaayanna ida iti gundaway a makiraman iti isu met laeng a trabaho nga ar-aramiden dagiti nataengan iti kongregasion. Kastakay kadi idi ubbingkayo?
2 Iramanyo Dagiti Annakyo: Dagiti ubbing unay nga annak a di pay makairugi iti Nainkasuratan a saritaan iti ruangan mabalinda pay laeng ti agitukon kadagiti magasin. Kasapulan laeng iti dayta ti panangadal iti simple a presentasion babaen ti sumagmamano nga ababa a sasao. Mabalin nga umdasen ti ababa a komento, nalabit iti ilustrasion nga adda iti akkub. Adu dagiti bumalay a maragsakan a mangawat kadagiti magasin nga ited dagiti ubbingtayo, a masansan a nasayaat ti komentoda maipapan iti kinapasnek ken nasayaat a kababalin dagitoy nga agtutubo. Babaen ti sangkabassit a tulong, nalaka laeng kadagiti ubbing daytoy a serbisio, a dakkel ti maitulongna iti pannakairakurak ti mensahe ti Pagarian. Siempre, bayat nga agmataengan dagiti ubbing, kayat dagiti nagannakda ti tumulong tapno agtultuloyda nga agprogreso a mangparang-ay iti laingda a mangasaba.
3 Nangrugi ni Manuel a mangasaba iti binalaybalay idi agtawen iti tallo. Insuro dagiti dadakkelna a mangikabesa iti ababa a presentasion. Sireregta a mangasaba a kaduada, agipaima iti adu a magasin, broshur, ken tract. Mangasaba met iti impormal. Iti naminsan nga intugot dagiti dadakkelna tapno aglinglingayda iti maysa a parke, ginundawayanna ti nagipaima iti sumagmamano a tract kadagiti tattao nga adda sadiay. Nupay nakaub-ubing pay, ti kinagagar idi ni Manuel iti ministerio ket gubuayan ti napaypayso a pammaregta kadagiti nagannak kenkuana ken iti intero a kongregasion.—Prov. 22:6.
4 Naituding ti kada Sabado a “Magazine Day” iti 2000 Calendar of Jehovah’s Witnesses. Dakayo a nagannak, isingasingmi a parayrayenyo ti interesyo iti daytoy a trabaho, a tulonganyo dagiti annakyo a makiraman a regular no mabalbalin iti daytoy a pribilehio iti serbisio.