Agpegpeggad ti Adu a Biag!
1 Ibatad ti Biblia ti pagayatan ni Jehova a “maisalakan koma dagiti amin a kita ti tattao.” Nupay kasta, agpayso met a ti masanguanan a biag dagiti binilion ditoy daga ket agpannuray iti panangmatmatda ken Jehova a Dios ken iti Pagarianna nga iturayan ni Jesu-Kristo. Ti “umiso a pannakaammo iti kinapudno” ti kakaisuna a pakaibatayan ti umiso a panangmatmat. (1 Tim. 2:3, 4) Bayat nga ipakpakaammotayo a dandanin madalusan ti daga kadagiti amin a kinadakes tapno maipasdek ti nalinteg a baro a lubong ti Dios, naipaannong met kadatayo a makiramantay iti nagpateg a trabaho a mangispal iti biag.—Mat. 24:14; 28:19, 20; Roma 10:13-15.
2 Apay a Naganat Unay? Namakdaar ni Jesus maipapan iti “dakkel a rigat a ti kasta di pay napasamak nanipud idi pangrugian ti lubong.” (Mat. 24:21) Dumtengto ti kangitingitan dayta a rigat inton Armagedon. (Apoc. 16:16) Dagiti tattao a maikisap no dida ipangag ti naimbag a damag ramanenna dagiti di manamati a kabagian, kaarruba, katrabahuan, kaeskuela, ken gagayyemtayo. Ngem maseknantayo a mangtulong iti “amin a kita ti tattao” kas panangtuladtay iti Dios, a nangiparangarang iti ayatna iti intero a lubong ti sangatauan babaen ti panangipaayna iti Anakna, ni Jesu-Kristo, kas subbot nga agpaay iti amin. (Juan 3:16) Masapul a sireregta nga ikagumaantayo nga awisen ti amin nga agkamang iti natalged a lugar nga insagana ti Dios. Babaen ti naan-anay a panangitungpaltay iti trabaho a panangasaba, saantayo a makabasol iti dara.—Eze. 33:1-7; 1 Cor. 9:16.
3 Ania ti Panggeptayo? Naipaganetget iti intero a Sao ti Dios ti kinapateg ti trabaho a panangasaba. Kas kinuna ni apostol Pablo, “ti ayat nga adda ken Kristo pilitennakami” nga agbiag a maitunos kadagiti dalan ti Dios. (2 Cor. 5:14) Kasta met, masansan nga ipaganetget ti Pagwanawanan ti obligasiontayo a mangasaba. Naynay a mangipapaay iti instruksion ti Ministeriotayo iti Pagarian no kasanotay nga aramiden ti trabaho a panangasaba. Dagiti panglakayen ti mangorganisar iti trabaho ket paregtaendatayo a makiraman iti dayta. Awisendatay dagiti padatayo nga agibumbunannag a makikadua kadakuada iti ministerio. Adu ti maad-adaltayo maipapan iti panangisagana kadagiti presentasiontayo, panagitukon kadagiti magasin ken dadduma pay a literatura, panagsarungkar, panangyadal iti Biblia, ken panangusar iti amin nga oportunidad a mangasaba. Amin dagitoy ti tumulong kadatayo a mangitungpal iti panggep a panangispal iti adu a biag.—1 Cor. 9:22, 23; Efe. 1:13.