Damag Maipapan iti Konstruksion iti Bethel
1 Ammomi nga interesadokay amin a mangammo iti nagrang-ayan ti agdama a trabaho a panagibangon iti Bethel, isu a maragsakankami a mangipaay kadakayo iti kaudian a damag. Adda iti baba ti bassit a modelo dagiti patakder ti Bethel a mangipakita iti naan-anay a langana inton malpas ti amin a maibangbangon.
2 Nairugi ti trabaho idi Marso 1999 ket iti agdama nalpasen dagiti sumaganad a proyekto: Naipasdeken ti baro a planta a pakadalusan ti nausar a danum; nakalin ti baro nga ubbog ti danum; naibangonen ti baro a 240,000-litro a tangke ti danum; naipasdeken ti baro a Literature Reception; naaramiden dagiti baro a pagparadaan ken nalinongan a pagnaan. Nalpasen ti kaaduan kadagitoy a proyekto sakbay a naibangon ti baro a sangapulo-kadsaaran a residence building.
3 Ti makinruar a balabala ti sangapulo-kadsaaran a residence building ket binangon ti taga ruar a kontratista. Nairugi idi Nobiembre 1999 ken nalpas idi Oktubre 2000. No kasta, nalpas ti kontrata iti kurang a makatawen. Ti pannakairingpas ti makin-uneg a paset ti building, agraman ti amin a koneksion ti tubo, koriente, ken air-conditioning, ket ar-aramiden dagiti mismo a kakabsattayo. Iti agdama addada 18 nga International Servant a naggapu iti 10 a nagduduma a pagilian nga agserserbi iti proyektotayo. Kaduada ti 40 nga amin-tiempo a lokal a boluntario ken 9 a trabahador ti Bethel.
4 Iti pannakaibangon daytoy sangapulo-kadsaaran a pasdek, 4,254 metro kubiko a konkreto ti nausar. No daytoy a kaadu ti konkreto ket pagibangon iti kalsada a 3 metro ti kaakabana ken 150mm ti kaunegna, makadanon iti agarup sangapulo a kilometro! Kanayonanna, agdagup iti 775 tonelada a reinforcing steel ken 42 tonelada nga structural steel ti nausar iti building. Amin a muebles iti 130 a kuarto ket ar-aramiden dagiti mismo a kakabsattayo iti bukodtayo a karpinteria.
5 Ania ti pakausaran ti baro a residence building? Addaan dayta iti 130 a kuarto ti Bethel, isu a mabalin a pagnaedan ti 260 a trabahador ti Bethel. Kanayonanna, mayakarto iti baro a building ti Bethel infirmary, paglabaan, siled a pagadalan iti Ministerial Training School, libraria, ken sumagmamano pay nga opisina. Kalpasanna, mapalawanto ti kosina ken siled a panganan iti sigud a residence building tapno makalaon iti agingga iti 600 a tattao. Gapuna, nupay manamnama a malpas ti baro a residence building inton Oktubre 2001, nalabit makatawen pay ti mabusbos iti dakkel a panangtarimaan iti immuna a residence building.
6 Kayatdakay amin a pagyamanan gapu iti agtultuloy a pinansial a kontribusionyo iti daytoy a proyekto. Yantangay manamnama nga agtultuloy daytoy agingga iti tawen 2002, paregtaendakayo nga agtultuloy nga agipatulod iti boluntario a tulongyo agingga a malpas ti proyekto. Pangngaasiyo ta itultuloyyo met nga ikararag ti pamendision ni Jehova iti proyekto, yantangay no awan dayta awan pagmamaayan daytoy.—Salmo 127:1.