Baro a Programa ti Asamblea Sirkito

Ammotayo a maikari ni Jehova a Dios iti ayat ken naipamaysa a debosiontayo. Nupay kasta, ikagumaan ti lubong a gupden ti nasinged a relasiontayo kenkuana. (Juan 17:14) Tapno rumayray ti ayattayo ken Jehova ken bumileg a mangsaranget kadagiti bambanag iti lubong a mamagpeggad iti espiritualidadtayo, ti baro a programa ti asamblea sirkito iti 2001 ket natemaan iti “Ayatem ti Dios​—Saan a ti Bambanag iti Lubong.”​—1 Juan 2:15-17.

No ay-ayatentay unay ni Jehova, matignaytayo a mangisarita ti maipapan kenkuana. Kaskasdi, adu nga adipen ti Dios ti marigatan a mangasaba. Iti paset a “Ti Ayat iti Dios Tignayennatay a Mangasaba,” mangngeganyo no kasano a pinarmek ti adu a tattao ti kinamanagbabain ken dadduma pay a tubeng tapno naan-anay a makiramanda iti daytoy a trabaho.

Kasanonatay nga impluensiaan ti agrakrakaya a pagalagadan ti lubong? Mamatmatan ita a gagangay dagiti dati a maibilang kas dakes nga aramid. Ti palawag a “Dagiti Agayat ken Jehova Guraenda ti Kinadakes” ken ti simposium a “Bambanag iti Lubong​—Ania ti Panangmatmattayo Kadagita?” patibkerenda ti determinasiontayo a mangiwaksi kadagiti di umiso a tarigagay.

Maiparang iti programa dagiti mapagwadan a Teokratiko nga Eskuelaan ti Panagministro ken Gimong iti Serbisio, agraman ti sumario ti maadal nga artikulo ti Pagwanawanan iti dayta a lawas. Iti palawag publiko a “No Kasano a ti Ayat ken Pammati Parmekenda ti Lubong,” maparegtatay a mangtulad ken Jesus iti panangsarangetna kadagiti impluensia ti lubong. (Juan 16:33) Siguraduenyo nga awisen a tumabuno dagiti iyad-adalanyo iti Biblia. No adda asinoman nga agngayngayangay nga agpabautisar, nasaksakbay koma nga ipakaammona iti mamangulo a manangaywan tapno maaramid dagiti nasken nga urnos.

Daytoy nga asamblea sirkito iturongna ti atensiontayo iti rumbeng a pangipamaysaantayo iti ayattayo tapno matagiragsak dagiti nabaknang a bendision ni Jehova. Diyo koma liwliwayan ti aniaman kadagitoy!