Maksayan Dagiti Suskripsion

Maragsakan nga ipakaammo kadakayo ti sanga nga opisina nga inanamongan ti Bagi a Manarawidwid ti panangkissay iti suskripsion a tamingen dagiti sanga iti sangalubongan. Kas nailawlawag iti suratmi kadagiti amin a kongregasion iti Enero 1, 2002, maigapu iti kinangina ti panangibuson iti indibidual a kopia dagiti magasin, manipud ita, tamingen laengen ti sanga nga opisina ti limitado a bilang dagiti suskripsion. Nupay kasta, agtultuloy dagiti agdama a suskripsion agingga nga agpaso dagitoy.

Amin a kakabsat, agraman dagiti interesado a tattao nga adda am-ammona iti lokal a kongregasion, maawatda itan dagiti personal a kopiada kadagiti suplay a magasin ti kongregasion ket saanen a babaen ti suskripsion. Maigapu itoy, rumbeng a siguraduen ti amin a kongregasion nga umaw-awatda iti umdas a magasin tapno makagun-od ti amin a mayat a maaddaan iti kopia. No maipapan kadagiti tattao iti ruar, paregtaenmi dagiti agibumbunannag nga irekordda dagidiay agtarigagay a makaawat a regular iti magasintayo ket kalpasanna, personal nga itulodda dagitoy. Iti kastoy a pamay-an, kanayon a personal a makasarita dagiti agibumbunannag dagitoy a tattao, a mabalin nga agresulta iti ad-adu a panagadal iti Biblia.

Iti sumagmamano a naisangsangayan a kasasaad, adda dagiti interesado a tattao nga agnanaed iti naiputputong a lugar a narigat a danonen, wenno addaan iti post office box a pakaitulodan ti surat. Kadagita nga indibidual, agtultuloy nga ipatulod ti sanga nga opisina dagiti suskripsionda. Manmano laeng koma dagitoy, iti kasta makaekonomia iti gastos iti panagipatulod ken kadagiti masapul nga agtrabaho kadagiti opisina a mangtaming iti dati nga urnos iti suskripsion.