Dagiti Palagip iti Memorial

Maangay ti pannakarambak ti Memorial iti daytoy a tawen iti Huebes, Marso 28. Asikasuen koma dagiti panglakayen dagiti sumaganad:

◼ Iti panangikeddeng iti oras ti taripnong, siguraduenyo a maipasa laeng ti emblema no limneken ti init.

◼ Mapakaammuan koma ti amin, agraman ti ispiker, iti eksakto nga oras ken lugar a pakaangayan ti selebrasion.

◼ Magun-od ken maisagana koma ti maitutop a kita ti tinapay ken arak.—Kitaenyo ti Pebrero 15, 1985, a Pagwanawanan, panid 19.

◼ Maiyeg koma a nasaksakbay iti Kingdom Hall dagiti maitutop a plato, baso, lamisaan ken mantel.

◼ Madalusan koma a naimbag ken nasaksakbay ti Kingdom Hall wenno ti sabali a lugar a pagtataripnongan.

◼ Mapili koma a nasaksakbay dagiti attendant ken mangipasa, ken maisuro kadakuada dagiti annongenda ken ti umiso a pamay-an a masurot. Rumbeng a nanakman ti kawes ken langada.

◼ Mayurnos koma a maserbian ti asinoman a napulotan a masakit ken saan a makatabuno.

◼ No saan laeng a maymaysa a kongregasion ti nakaeskediul a mangusar iti isu met la a Kingdom Hall, adda koma nasayaat nga urnos kadagiti kongregasion tapno maliklikan ti panaglilinnetlet iti lobby wenno pagserkan, iti pagnaan, ken iti pagparadaan.