Dagiti Palagip Mainaig iti Memorial

Maangay ti Memorial iti daytoy a tawen inton Domingo, Abril 8. Asikasuen koma dagiti panglakayen dagiti sumaganad:

◼ Iti panangikeddeng iti oras ti taripnong, siguraduenyo a sa la maipasa dagiti emblema no nakalneken ti init.

◼ Mapakaammuan koma ti amin, agraman ti ispiker, maipapan iti eksakto nga oras ken pakaangayan ti okasion.

◼ Maisagana koma ti maitutop a klase ti tinapay ken arak.—Kitaenyo ti Agosto 15, 1985, a Pagwanawanan, panid 19.

◼ Maipan koma iti hall ken maiplastar a nasaksakbay dagiti plato, kopa, ken ti mayanatup a lamisaan ken mantel.

◼ Madalusan koma a nalaing ken nasaksakbay ti Kingdom Hall wenno ti sabali a lugar a pagtataripnongan.

◼ Nasaksakbay koma a madutokan dagiti attendant ken mangidiaya kadagiti emblema sa maikkanda koma iti instruksion maipapan iti annongenda ken iti umiso a panangaramid kadagiti bambanag.

◼ Adda koma maaramid nga urnos tapno maserbian ti asinoman a napulotan a masakit ken saan a makatabuno.

◼ No saan a maymaysa a kongregasion ti nakaeskediul iti maymaysa a Kingdom Hall, adda koma nasayaat a koordinasion dagiti kongregasion tapno maliklikan ti panaglilinnetlet iti pagserkan, kalsada, ken iti paradaan ti lugan.