Parayrayenyo ti Rag-oyo a Mangasaba
1 Mapaspasaranyo kadi iti ministerioyo ti rag-o nga itden ti panangikasaba iti naimbag a damag? No ditay naannad, ti dakes a lubong iti aglawlawtayo ti mamagbalin kadatayo a managbabain maipapan iti panangasaba, a mangikkat iti rag-otayo. Mabalin met a makapaupay ti mangasaba iti teritoria a di mangipangag dagiti tattao. Ania dagiti praktikal nga addang a mabalintay nga aramiden tapno maparayray ti rag-otayo a mangasaba?
2 Agbalinkayo a Positibo: Makatulong unay ti panangtaginayon iti positibo a kababalin. Ti maysa a pamay-an tapno maaramidan dayta ket babaen ti panangutob iti naindaklan a pribilehio nga agbalin a ‘katrabahuan ti Dios.’ (1 Cor. 3:9) Adda met kadatayo ni Jesus iti panangibanagtayo iti daytoy a trabaho. (Mat. 28:20) Ken tulongannatayo pay babaen dagiti anghel. (Mat. 13:41, 49) Makasiguradotayo ngarud nga iwanwanwan ti Dios ti panagreggettayo. (Apoc. 14:6, 7) Isu nga aniaman ti reaksion ti dadduma a tattao iti trabahotayo, maragsakan unay dagidiay adda sadi langit!
3 Agsaganakayo a Naimbag: Mangnayon met iti rag-otayo ti panagsagana a naimbag. Ti panagsagana iti ministerio dina sapulen ti adu a trabaho. Kasapulan laeng ti sumagmamano a minuto a mangusig iti mapagsaritaan a punto manipud iti agdama a magasin wenno ti tukon a literatura iti kada bulan. Mangpilikayo iti maysa a presentasion iti “No Ania ti Ibagayo Maipapan Kadagiti Magasin,” iti Ti Ministeriotayo iti Pagarian, wenno mangbirokkayo iti epektibo nga introduksion iti libro a Panakirinnason. No malapdankayo iti masansan a panagkedked dagiti bumalay, mangisaganakayo iti sungbat a mangikonsiderar iti komentoda ken mangiturong iti atensionda iti maysa a makapainteres a topiko. Makatulong unay iti daytoy ti libro a Panakirinnason. Ti panangusar kadagitoy a katulongan ti mangipaay kadatayo iti kasapulantayo a panagtalek tapno naragsak ti panangasabatayo.
4 Agkararagkayo a Sipapasnek: Nagpateg ti panagkararag tapno saan a maawan ti rag-otayo. Yantangay ar-aramidentayo ti trabaho ni Jehova, nasken nga umararawtayo a dumawat iti espirituna, a ti maysa a bunga daytoy ket rag-o. (Gal. 5:22) Pabilgennatayo ni Jehova tapno makapagtultuloytayo a mangasaba. (Fil. 4:13) Ti panangikararag iti ministeriotayo matulongannatayo a mangsalimetmet iti umiso a panangmatmat no addaantayo iti negatibo a kapadasan. (Ara. 13:52; 1 Ped. 4:13, 14) No agamaktayo, makatulong kadatayo ti kararag tapno makapagtultuloytayo a situtured ken siraragsak.—Ara. 4:31.
5 Mangparnuaykayo Kadagiti Gundaway: Siempre, ad-adda a makaparagsak ti ministeriotayo no makasaraktayo kadagiti tattao ken makasabaantay ida. Mabalin a nasaysayaat ti resultana no baliwbaliwanyo ti eskediulyo a mangasaba iti binalaybalay iti nadumaduma nga oras, nalabit iti mumalem wenno iti sardam. Makasarakkayo kadagiti tattao tunggal magnakayo iti lansangan, makitienda, aglugan iti bus, wenno no agpasiar iti parke. Apay a dikay mangisagana iti ababa a pangirugi iti saritaan ket gundawayanyo nga asitgan dagidiay nainggayyeman ti langada? Wenno mabalinyo ti mangasaba iti lugar ti pagtrabahuan wenno publiko nga eskuelaan, a sadiay makasaritayo nga inaldaw dagiti sabsabali. Nalabit maaddaankayo iti gundaway a mangasaba babaen laeng ti panangibangon iti Nainkasuratan a topiko a mangtukay iti interes. Dakkel ti maaramidan ti aniaman kadagitoy a panagregget tapno maparayray ti rag-oyo a mangasaba.
6 Yantangay ti rag-o tulongannatayo nga agibtur, anian a nagpateg a taginayonentayo dayta! No aramidentayo ti kasta, agapittayto iti dakkel a gunggona inton agngudo daytoy dinto pulos mauliten a trabaho. Dayta a mismo a namnama maparayrayna ti rag-otayo a mangasaba.—Mat. 25:21.