Agtutunostayo Koma
1 Namin-ano a nagsiddaawanyo ti nagsayaat a pannakadisenio ti bagi ti tao? (Sal. 139:14) Sangsangkatunos nga agtrabaho ti tunggal kameng ti bagi. Ti Sao ti Dios inyaspingna ti kongregasion Kristiano iti bagi nga adda panagtutunosna. Iti sidong ti Ulo, ni Kristo, amin a kameng ti kongregasion ket “natunos ti pannakasangalna ken naaramid nga agtitinnulong babaen ti tunggal nagsuopan a mangipaay iti kasapulan.” (Efe. 4:16a) Gapuna, mausar ni Jehova ti nagkaykaysa nga ilina a mangaramid kadagiti nakaskasdaaw a banag.
2 Dagiti kameng ti kongregasion idi umuna a siglo ket ‘sangsangkamaysa’ a nangipaay iti naespirituan ken material a kasapulan ti tunggal maysa. (Ara. 2:44-47) Iti tulong ni Jehova, sangsangkamaysa a sinango ken dinaeranda dagiti nakaro nga ibubusor. (Ara. 4:24-31) Iti sadinoman a napananda, inkasabada ti mensahe maipapan iti Pagarian, nga insaknapda ti naimbag a damag kadagiti pagaammo idi a paset ti daga. (Col. 1:23) Iti moderno a panawen, sangsangkamaysa ti kongregasion Kristiano a nangibanag kadagitoy met laeng a gapuanan iti dakdakkel a kaitungpalan. Ania dagiti nangyeg iti daytoy a panagkaykaysa?
3 Pinagmaymaysanatayo ti Pannursuro ti Dios: Iti intero a lubong, agkaykaysatayo gapu iti panagdayawtayo. Kasano a posible dayta? Bigbigentayo ti makitkita a kalasugan nga us-usaren ni Jehova a mangipaay iti naespirituan a ‘taraon iti umiso a tiempo.’ (Mat. 24:45) Apresiarentayo met dagiti “sagut a tattao” nga impaayna a mangisuro iti kongregasion. Bayat a sipapakumbaba nga awatentayo dagiti probision ni Jehova a mangtaraon kadatayo iti naespirituan, rumang-ay ti pannakaawattayo iti Sao ti Dios ken tignayennatayo a padapada nga agtarigagay a mangtulad ken ni Jesus kas ad-adalanna. Nasken nga itultuloytayo nga adalen ti Sao ti Dios, a sipapasnek nga ikagumaantayo a ‘makagteng iti panagmaymaysa iti pammati.’ (Efe. 4:8, 11-13) Itantandudoyo kadi ti naespirituan a panagkaykaysatayo babaen ti inaldaw a panagbasa iti Biblia?
4 Pinagkaykaysa ti Nakristianuan a Timpuyog: Ti ayat pasingedennatayo iti maysa ken maysa bayat dagiti Nakristianuan a gimong. ‘Mapampanunottayo ti maysa ken maysa’ babaen dagitoy a gimong. (Heb. 10:24, 25) Iramanna ti naun-uneg a panangam-ammo iti kakabsattayo, a matmatantayo ida kas matarigagayan a bambanag yantangay kasta ti panangmatmat ni Jehova kadakuada. (Hag. 2:7) Bayat nga imdengantayo dagiti ebkas ti pammatida, rumayray ti panagayattayo kadakuada ken mapalagda ti panagkaykaysatayo. Am-ammodakayo kadi kas maysa a regular a tumabtabuno kadagiti gimong ti kongregasion?
5 Katrabahuan iti Tay-ak: Ti pannakidanggay kadagiti kapammatian a mangikasaba iti naimbag a damag pagkaykaysaennatayo a mangaramid iti pagayatan ti Dios. Impateg ni apostol Pablo dagiti ‘katrabahuanna maipaay iti pagarian ti Dios.’ (Col. 4:11) Ti panangisalaysay kadagiti kapadasan ken panagtinnulong bayat ti panangasaba tulongannatayo a mangitungpal iti Nakristianuan nga annongentayo ken palagdaenna ti singgalut ti panagkaykaysatayo.—Col. 3:14.
6 Mamagkaykaysa nga Impluensia ti Nasantuan nga Espiritu: Bayat a pagregreggetantayo nga aramiden ti pagayatan ni Jehova, paraburannatayo iti espirituna. Daytoy ti tumulong kadatayo a mangrisut kadagiti ditay pagkikinnaawatan ken makapagtitimpuyog a sangsangkamaysa. (Sal. 133:1) Tignayennatayo a ‘mangsalimetmet iti panagmaymaysa ti espiritu iti mamagkaykaysa a singgalut ti talna.’ (Efe. 4:3) Maitandudo ti tunggal maysa kadatayo ti panagtutunos nga agraraira iti ili ti Dios babaen ti panangiparangarang kadagiti bunga ti espiritu no aglalangentayo.—Gal. 5:22, 23.
7 Ti panagserbi a sangsangkamaysa iti sidong ti panangidaulo ni Kristo ket ‘agpaay iti idadakkel ti bagi maipaay iti mismo a pannakapabileg iti ayat.’ (Efe. 4:16b) Maysa pay, idayawna ni Jehova, “ti Dios a mangipaay iti talna.”—Roma 16:20.