Ipakitayo ti Nakristianuan a Kinasungdo No Nailaksid ti Kabagianyo
1. Ania a kasasaad ti mabalin a mangsuot iti kinasungdo ti maysa a Kristiano?
1 Mabalin a nakasingsinged dagiti kameng ti pamilia. Daytoy ti makagapu a masuot ti maysa a Kristiano no ti asawa, anak, nagannak, wenno asideg a kabagianna ket mailaksid wenno sumina iti kongregasion. (Mat. 10:37) Kasano ti rumbeng a panangtrato dagiti nasungdo a Kristiano iti kasta a kabagian? Naiduma kadi ti panangtrato no kabbalayyo dayta a tao? Umuna, repasuentayo ti kuna ti Biblia maipapan iti daytoy a banag, a dagiti prinsipio maipapan iti daytoy ket agaplikar agpadpada kadagidiay nailaksid ken kadagidiay nangisina iti bagbagida.
2. Sigun iti Biblia, kasano ti rumbeng a panangtrato dagiti Kristiano kadagidiay nailaksid iti kongregasion?
2 No Kasano a Tratuen Dagiti Nailaksid: Ti Sao ti Dios ibilbilinna kadagiti Kristiano a saanda a makikadua wenno makitimpuyog iti tao a nailaksid iti kongregasion: “Isardengyo ti makikadkadua iti asinoman a maaw-awagan kabsat a maysa a mannakiabig wenno naagum a tao wenno managrukbab iti idolo wenno manangrabngis wenno managbarbartek wenno manangkikil, saan uray makipangan iti kasta a tao. . . . Ikkatenyo ti nadangkes a tao iti tengngayo.” (1 Cor. 5:11, 13) Maitutop met ti sasao ni Jesus a nailanad iti Mateo 18:17: “[Ti tao a nailaksid] agbalin koman kenka a kas maysa a tao dagiti nasion ken kas maysa nga agsingsingir iti buis.” Pagaammo unay dagiti agdengdengngeg ken ni Jesus a di makilanglangen dagiti Judio kadagiti Gentil ken liklikanda dagiti agsingsingir iti buis ta imbilangda ida kas nailaksid iti kagimongan. No kasta, bilbilinen ni Jesus dagiti pasurotna a dida makilangen kadagiti nailaksid.—Kitaenyo Ti Pagwanawanan a Marso 15, 1982, panid 12-14 (Setiembre 15, 1981, p. 18-20 iti Ingles).
3, 4. Ania ti maiparit a pannakitimpuyog iti tao a nailaksid wenno simmina?
3 Kayat a sawen daytoy a dagiti nasungdo a Kristiano saanda a makisarita maipapan kadagiti naespirituan a banag iti asinoman a nailaksid iti kongregasion. Ngem saan la a dayta ti ramanenna. Ibaga ti Sao ti Dios a ditay aramiden ‘uray makipangan la koma iti kasta a tao.’ (1 Cor. 5:11) No kasta, liklikantayo met ti makipulapol iti nailaksid a tao. Kayatna a sawen a ditay iraman iti piknik, party, ay-ayam, wenno panag-shopping wenno ipapan iti teatro wenno pannakipangan kenkuana iti man pagtaengan wenno restawran.
4 Ti ngay pannakisarita iti nailaksid a tao? Nupay saan a dakamaten ti Biblia ti tunggal posible a kasasaad, tulongannatayo ti 2 Juan 10 a mangammo iti panangmatmat ni Jehova iti bambanag: “No ti asinoman umay kadakayo ket saanna nga iyeg daytoy a sursuro, dikay pulos awaten kadagiti pagtaenganyo wenno sawen ti maysa a kablaaw kenkuana.” Maipapan iti daytoy, kuna Ti Pagwanawanan a Marso 15, 1982, panid 19 (Setiembre 15, 1981, p. 25 iti Ingles): “Ti basta panangibaga iti ‘Komusta’ iti maysa a tao ti mabalin nga umuna nga addang a mangirugi iti panagsarita ken nalabit iti panaggayyem pay ketdi. Kayattay kadi nga aramiden dayta nga umuna nga addang iti maysa a nailaksid a tao?”
5. Ania ti mapukaw ti maysa a tao no mailaksid?
5 Kinapudnona, dayta ti ibagbaga ti panid 26 (p. 31 iti Ingles) ti isu met laeng a ruar Ti Pagwanawanan: “Iti kinapudnona, no agbasol ti maysa a Kristiano ket masapul a mailaksid, adu ti mapukawna: ti naanamongan a takderna iti Dios; . . . ti makaay-ayo a pannakitimpuyog kadagiti kakabsat, agraman ti naynay a pannakilangenna kadagiti Kristiano a kabagianna.”
6. Masapul kadi nga interamente nga isardeng ti maysa a Kristiano ti makilangen iti nailaksid a kabagianna no kabbalayna daytoy? Ilawlawagyo.
6 No Kabbalay: Kayat kadi a sawen daytoy a dagiti Kristiano saanda a makisao, makipangan, wenno makilangen iti nailaksid a kapamilia a kabbalayda bayat dagiti inaldaw nga aktibidadda? Kuna Ti Pagwanawanan nga Abril 15, 1991, iti footnote ti panid 22: “No adda nailaksid a kabagian iti maysa a Kristiano a sangakabbalayan, isu ket paset pay laeng ti normal, inaldaw a panaglalangen ken aktibidad iti sangakabbalayan.” No kasta, adda kadagiti kameng ti pamilia a mangikeddeng no iramanda ti nailaksid a kameng ti pamilia iti pannangan wenno no mangaramidda iti dadduma nga aktibidad ti pamilia. Ngem kaskasdi a saanda a kayat nga ipamatmat kadagiti kakabsat a kapulpulapolda nga awan ti panagbalbaliw iti pannakilangenda kenkuana kalpasan ti pannakailaksidna.
7. Kasano nga agbaliw ti naespirituan a panaglalangen iti pagtaengan no adda nailaksid a miembro ti pamilia?
7 Nupay kasta, maipapan iti tao a nailaksid wenno simmina, kastoy ti kuna Ti Pagwanawanan a Marso 15, 1982, panid 22, 23 (Setiembre 15, 1981, p. 28 iti Ingles): “Naan-anay a nagsaten ti dati a naespirituan a singgalut. Pudno daytoy uray kadagiti kakabagianna, agraman dagiti mismo a kapamiliana. . . . Kaipapananna dayta ti panagbalbaliw ti naespirituan a panaglalangen a nalabit sigud nga adda iti pagtaengan. Kas pagarian, no ti asawa a lalaki ket nailaksid, saan a komportable ni baketna ken dagiti annakna no isu ti mangidaulo iti sangapamiliaan a panagadal iti Biblia wenno isu ti mangidaulo iti panagbasa iti Biblia ken panagkararag. No kayatna nga isu ti mangikararag, kas iti pannangan, kalinteganna nga aramiden dayta iti mismo a pagtaenganna. Ngem mabalinda ti siuulimek nga agkararag a bukodda iti Dios. (Prov. 28:9; Sal. 119:145, 146) Kasanon no ti kabbalay a nailaksid kayatna ti makiraman bayat ti sangapamiliaan a panagbasa wenno panagadal iti Biblia? Mabalin nga ipalubos ti dadduma ti kaaddana tapno agdengngeg, saanna la ketdi a padpadasen nga isuro wenno iranud kadakuada dagiti narelihiosuan a kapanunotanna.”
8. Ania ti pagrebbengan dagiti Kristiano a nagannak iti nailaksid a menor de edad nga anak a kabbalayda?
8 No nailaksid ti maysa a menor de edad nga anak a kabbalayda, pagrebbengan latta dagiti Kristiano a nagannak ti mangpadakkel kenkuana. Kuna Ti Pagwanawanan a Nobiembre 15, 1988, panid 20: “No kasano a kasapulan nga itultuloyda nga ipaayan iti taraon, kawes, ken pagtaengan, kasapulan met nga isuro ken disiplinaenda maitunos iti Sao ti Dios. (Proverbio 6:20-22; 29:17) No kasta, dagiti naayat a nagannak mabalinda nga iyadalan iti Biblia iti pagtaengan, uray no nailaksid. Nalabit mabenepisiaran unay no iyadalanda nga is-isuna. Wenno nalabit ikeddengda a mabalinna ti agtultuloy a makiraman iti panagadal ti pamilia.”—Kitaenyo Ti Pagwanawanan nga Oktubre 1, 2001, panid 16-17.
9. Kasano kainget ti di pannakilangen ti maysa a Kristiano iti nailaksid a kabagian a saanna a kabbalay?
9 Di Kabbalay a Kabagian: “Naiduma ti kasasaad no ti nailaksid wenno simmina ket maysa a kabagian a saan a kabbalay ti mismo a kapamiliana,” kuna Ti Pagwanawanan nga Abril 15, 1988, panid 28. “Mabalin a posible ti nganngani di pulos pannakisarita wenno iyaasideg iti kabagian. Uray no adda banag a masapul nga iyasideg ti pamilia kenkuana, manmano koma a maaramid dayta,” maitunos iti bilin ti Dios nga ‘isardeng ti makikadkadua iti asinoman’ a nakabasol a di agbabawi. (1 Cor. 5:11) Dagiti nasungdo a Kristiano rumbeng nga ikagumaanda a liklikan ti di kasapulan a pannakilangen iti kasta a kabagian, uray ti sagpaminsan laeng a pannakitransaksion kenkuana iti negosio.—Kitaenyo Ti Pagwanawanan a Marso 15, 1982, panid 25-6 (Setiembre 15, 1981, p. 29-30 iti Ingles).
10, 11. Ania ti utoben ti maysa a Kristiano sakbay nga ipalubosna a makikabbalay ti maysa a nailaksid a kabagian?
10 Dinakamat Ti Pagwanawanan ti sabali pay a kasasaad a mabalin a tumaud: “Kasanon no ti maysa nga asideg a kabagian, kas iti anak wenno maysa a nagannak a di kabbalay, ket kayatna ti makikabbalay kalpasan a nailaksid? Adda iti pamilia a mangikeddeng no ania ti aramidenda depende iti kasasaad. Kas pagarigan, ti nailaksid a nagannak ket nalabit masakit wenno saannan a masuportaran ti bagina iti pinansial wenno iti pisikal. Addaan dagiti Kristiano nga annak iti Nainkasuratan ken moral nga obligasion a tumulong. (1 Tim. 5:8) . . . Ti maaramid ket mabalin nga agdepende kadagiti bambanag a kas kadagiti pudpudno a kasapulan ti nagannak, ti kababalinna ken ti pannakaseknan ti ulo ti sangakabbalayan iti naespirituan a pagimbagan ti pamilia.”—Ti Pagwanawanan a Marso 15, 1982, panid 23 (Setiembre 15, 1981, p. 28-9 iti Ingles).
11 No ti nailaksid ket anak, kuna ti isu met laeng nga artikulo: “No dadduma, dagiti nagannak a Kristiano pagnaedenda manen iti pagtaenganda iti sumagmamano a tiempo ti nailaksid nga anak gapu iti pisikal wenno emosional a sakitna. Ngem iti tunggal kaso, mabalin a tingitingen dagiti nagannak dagiti indibidual a sirkumstansia. Ti kadi nailaksid nga anak ket nagbiag a bukbukodna, ket saanna itan a kabaelan dayta? Wenno kayatna laeng ti agsubli gapu ta nanamnam-ayto ti biagna? Ti ngay moralidad ken kababalinna? Mangiserrek ngata iti ‘lebadura’ iti pagtaengan?—Gal. 5:9.”
12. Ania ti sumagmamano a gunggona nga itden ti urnos a panangilaksid?
12 Dagiti Gunggona iti Panagbalin a Nasungdo ken ni Jehova: Makagunggona ti panangsurot iti Nainkasuratan nga urnos a panangilaksid ken iyaadayo kadagiti nakabasol a di agbabawi. Taginayonenna ti kinadalus ti kongregasion ken ipabigbignatayo kas manangitandudo kadagiti nangato a moral a pagalagadan ti Biblia. (1 Ped. 1:14-16) Salaknibannatayo manipud kadagiti dakes nga impluensia. (Gal. 5:7-9) Ipaayanna met ti managbasol iti gundaway a magunggonaan a naan-anay iti pannakadisiplinana, a makatulong kenkuana a mangpataud iti “natalna a bunga, awan sabali, ti kinalinteg.”—Heb. 12:11.
13. Ania a panagbalbaliw ti inaramid ti maysa a pamilia, ket ania ti resultana?
13 Kalpasan a mangngegda ti maysa a palawag iti asamblea sirkito, naamiris ti maysa a lalaki ken ti kasinginna a babai a nasken a balbaliwanda ti panangtratoda iti inada, a sabali ti pagtaenganna ken innem a tawen idin a nailaksid. Kalpasan unay ti asamblea, ti lalaki inawaganna ti inana, ket kalpasan ti panangipatalgedna iti pammategda kenkuana, inlawlawagna a dida mabalinen ti makisarita kenkuana malaksid no adda dagiti napateg a banag a pagsasaritaanda a sangapamiliaan. Di nagbayag kalpasanna, nangrugi a tumabuno ti inana kadagiti gimong ket naisubli a Saksi idi kamaudiananna. Kasta met, nangrugi nga agadal ti di manamati nga asawana ket nabautisaran idi agangay.
14. Apay a nasken a sisusungdo a suportarantayo ti urnos a panangilaksid?
14 Ti sisusungdo a panangitandudo iti urnos a panangilaksid a naituyang iti Kasuratan iparangarangna ti ayattayo ken ni Jehova ken mangipaay iti sungbat iti daydiay mangum-umsi kenkuana. (Prov. 27:11) No aramidentayo dayta, manamnamatayo ti pamendision ni Jehova. Maipapan ken Jehova, insurat ni Ari David: “No maipapan kadagiti paglinteganna, saanakto a sumiasi kadakuada. Iti daydiay nasungdo agtignaykanto a sisusungdo.”—2 Sam. 22:23, 26.