Dakayo nga Ulo ti Pamilia—Taginayonenyo ti Nasayaat a Naespirituan a Rutina
1 Iti laksid ti adu a dekada a panagbiagna iti tengnga ti idolatria ken kinalulok ti Babilonia, agdindinamag ti “patinayon” a panagserbi ni Daniel ken ni Jehova. (Dan. 6:16, 20) Kasano a nataginayonna ti espiritualidadna? Ipakita ti rekord ti Biblia nga adda naurnos a rutina ni Daniel kadagiti aktibidadna mainaig iti pudno a panagdayaw. Kas pagarigan, nayugalina ti agkararag iti mamitlo kada aldaw iti siledna. (Dan. 6:10) Awan duadua nga adda met eskediulna para iti dadduma a naespirituan nga aktibidad, kas iti panagbasa iti Linteg. Gapuna, idi naipasango iti suot a namagpeggad iti biagna, saan a kimmapuy ti debosionna ken ni Jehova, ket simimilagro a naispal.—Dan. 6:4-22.
2 Umasping iti dayta, nasken nga igaedtayo ita ti ‘agtalinaed a siririing buyogen ti isuamin a kinatibker.’ (Efe. 6:18) Ti lubong a pagbibiagantayo ket “adda iti pannakabalin daydiay nadangkes.” (1 Juan 5:19) Mabalin a di mapakpakadaan a tumaud dagiti ibubusor wenno suot ket masubok ti pammatitayo. Kabayatan ti dakkel a rigat, dagiti adipen ti Dios ti agbalin a puntiria ti sapasap nga iraraut ti Gog iti Magog, ket agparang a kasla awan ti makalibas. Agkalikagum ngarud dayta iti naan-anay a panagtalek ken ni Jehova.—Eze. 38:14-16.
3 “Daytoy ti maysa a napateg a tulbek: aramidenyo a wagas ti panagbiagyo ti epektibo a panagbasa, panagadal, ken panangusig iti Biblia.” Kasta ti kinuna ti introduksion ti drama iti 1998 a kombension distrito a napauluan “Dakayo a Pamilia—Aramidenyo a Wagas ti Panagbiagyo ti Inaldaw a Panagbasa iti Biblia!” Intuloyna: “No regular a suroten dagiti pamilia ti kasta a programa ken iti wagas a kasla nabnabiag ti Biblia, daytoy a naibatay iti Biblia a rutina ket mangyeg iti dakkel nga epekto iti pamilia. Parayrayenna ti pannakaammotayo, pabilgenna ti pammatitayo, ken mangipaay kadatayo kadagiti pagwadan—dagiti pudno a matalek a lallaki ken babbai idi un-unana—nga agbalin nga inspirasiontayo, a manggutugot kadatayo a mangitandudo iti kinapudno.” Bayat nga usigentayo ti nadumaduma nga aspeto ti nasayaat a naespirituan a rutina, nasken a mangbirok dagiti ulo ti pamilia iti maysa wenno dua a pamay-an a mangpasayaat iti naespirituan a programa ti pamilia.
4 Usigen ti Sao ti Dios iti Inaldaw: “Inton awanen ti bumusor iti turay ti Pagarian ti Dios ket maaramidto ti pagayatanna ditoy daga a kas sadi langit, awanto dagiti narungsot a tattao—uray animal—a ‘mangranggas wenno mangdadael.’ (Isa. 11:9; Mat. 6:9, 10)” Nagparang dagita a sasao iti Panangsukimat Kadagiti Kasuratan iti Inaldaw-aldaw—2001 iti komento para iti teksto ti Setiembre 11. Anian a makaliwliwa dayta a pammalagip! Kas ulo ti pamilia, nayugaliyo kadi nga inaldaw a sukimaten ti teksto ti Biblia ken ti kakuyogna a komento a kadua ti pamiliayo? Makagunggona unay daytoy. No saan a praktikal iti agsapa, nalabit iti rabiiyo a sukimaten a sangapamiliaan. Kinuna ti maysa nga ama: “Ti pangrabii ti kasayaatan a panawen tapno usigenmi ti inaldaw a teksto ti Biblia.”
5 Makomendarankayo no addaankayo iti nasayaat a rutina a mangusig iti inaldaw a teksto kas maysa a pamilia. Nalabit maparayrayyo dayta no adda maysa a paset ti Biblia a sangsangkamaysa a basaenyo. Nayugali ti dadduma a basaen ti intero a kapitulo a nakaadawan ti teksto dayta nga aldaw. Adda met dagidiay agsasaruno ti basaenda sigun iti pinilida a libro ti Biblia. Ti inaldaw a panagbasa iti Biblia tulonganna ti pamiliayo a mangpatanor iti umiso a panagbuteng a mapagura ni Jehova ken mangparayray iti tarigagayda a mangaramid iti pagayatanna.—Deut. 17:18-20.
6 Ti programa ti pamiliayo a panagbasa iti Biblia ken inaldaw a panangsukimat iti teksto ket ad-adda pay a makagunggona no mangiwayakayo iti sumagmamano a minuto a mangusig iti praktikal nga aplikasion ti impormasion. Isingasing ti libro nga Eskuelaan ti Panagministro, panid 60: “Mabalinyo . . . ti pumili iti sumagmamano a bersikulo ti Biblia a nayeskediul a mabasa iti lawas, a pagsasaritaanyo ti kaipapananda, ket iyimtuod dagiti kastoy a saludsod: ‘Kasano nga iwanwannatay daytoy? Kasanotay a mausar dagitoy a bersikulo iti ministerio? Ania ti ipalgakda maipapan ken ni Jehova ken ti wagas a panangtamingna kadagiti bambanag, ken kasano a pabilgen dayta ti panangapresiartayo kenkuana?’” Dagiti kasta a saritaan tulonganna ti amin a kameng ti pamiliayo nga ‘agtultuloy a mangilasin no ania ti pagayatan ni Jehova.’—Efe. 5:17.
7 Panagadal ti Pamilia: Ti regular a panangikondukta iti panagadal ti pamilia iti kada lawas ket maysa a nasayaat a pamay-an tapno maipakita dagiti ulo ti pamilia kadagiti annakda a maipangpangruna dagiti naespirituan a bambanag. Malagip ti maysa nga agtutubo a lalaki: “No dadduma, nabambannog ni Tatang manipud trabaho nga uray la makaturturogen, ngem agadalkami latta, ket daytoy ti timmulong kadakami a mangapresiar iti kinaserioso ti panagadal.” Makatulong met dagiti annak iti panagballigi dayta nga urnos. Iti maysa a pamilia nga addaan iti siam nga annak, bumangonda amin iti alas singko ti parbangon tapno agadal a sangapamiliaan yantangay dayta laeng ti kombiniente kadakuada.
8 Tapno epektibo ti panagadal ti pamilia, nasken a ti ulo ti pamilia ‘asikasuenna ti isursurona.’ (1 Tim. 4:16) Kuna ti libro nga Eskuelaan ti Panagministro, panid 32: “Maitutop a kunaen a ti epektibo a panagadal ti pamilia ket mangrugi iti panangusigmo iti mismo a pamiliam. Komusta ti naespirituan nga irarang-ay dagiti kameng ti pamiliam? . . . No kaduam dagiti annakmo iti tay-ak ti ministerio, mabainda kadi a mangipabigbig iti bagbagida kas Saksi ni Jehova iti imatang dagiti kapatadanda? Kaay-ayoda kadi ti urnos ti pamiliayo a panagbasa ken panagadal iti Biblia? Talaga kadi nga agbibiagda a mayannurot iti dalan ni Jehova? Ti naannad a panagpaliiw ipalgakna kenka no ania ti nasken nga aramidem, kas ulo ti pamilia, tapno maipasdek ken mapatanor dagiti naespirituan a galad iti tunggal kameng ti pamiliam.”
9 Dagiti Gimong ti Kongregasion: Ti panagsagana ken itatabuno kadagiti gimong ti kongregasion ket napateg koma a paset ti linawas a rutinayo. (Heb. 10:24, 25) No dadduma, mabalin a maisaganayo a sangapamiliaan ti dadduma a paset ti gimong. Imbes nga agpampamayan, mabalinyo kadi nga iyurnos ti nasakbay a panagsagana a naimbag? Ti naurnos a rutina iti daytoy a banag pasayaatenna agpadpada ti kalidad ti panagsaganayo ken dagiti magunggonayo kadagiti gimong.—Prov. 21:5.
10 Ti kalidad ken kinaregular ket pagilasinan iti epektibo a naespirituan a rutina. Kasano no adda dagiti kasasaad a mamagbalin a narigat ti agsagana para iti amin a gimong? Kastoy ti singasing ti Eskuelaan ti Panagministro, panid 31: “Dimo koma basta sidadaras a palabasan ti material tapno laeng mabasam wenno, nakarkaro pay, amangan ta saanmo nga adalen ti uray ania kadagita gapu ta dimo met la maadal amin. Imbes ketdi, ikeddengmo no kasano kawadwad ti mabalinmo nga adalen, ket ipasnekmo nga adalen dayta. Linawas nga aramidem dayta. Inton agangay, ikagumaam nga iraman ti maadal kadagiti dadduma pay a gimong.”
11 No nasapa dagiti pamilia a sumangpet iti gimong, daytoy ti tumulong kadakuada a maaddaan iti umiso a kondision ti isip a mangidayaw ken ni Jehova ken magunggonaan kadagiti instruksion nga ipapaayna. Managsapsapa met laeng kadi ti pamiliayo? Agkasapulan daytoy iti nasayaat a panagplano ken pannakitunos ti tunggal kameng ti pamilia. No masansan a madlawyo nga agdardaras ken marigatan ti pamiliayo iti aldaw ti gimong, apay a diyo balbaliwan ti rutinayo? Adda kadi dagiti banag a mabalin nga aramiden a nasakbay? No adu unay ti trabaho ti maysa a kapamilia, mabalin kadi a tumulong ti dadduma? Saan kadi a naragragsak no nasapa a nakasagana ti amin a makigimong? Ti nasayaat a panagplano ket mangyeg iti espiritu ti talna agpadpada iti uneg ti pamilia ken iti kongregasion.—1 Cor. 14:33, 40.
12 Tay-ak ti Serbisio: Ti panangyeskediul iti espesipiko a tiempo a pannakiraman iti ministerio ket sabali pay a paset ti nasayaat a naespirituan a rutina. Malagip ti agkabannuag nga agnagan iti Jayson: “Iti pamiliami, kanayon nga usarenmi a mangasaba ti bigat ti Sabado. Makagunggona daytoy kaniak gapu ta bayat nga ad-adda a mangasabaak, ad-adda met a makitak ti kinaimbag nga iyegna ken ad-adda a magustuak dayta.” Sigun iti adu a dimmakkel iti Saksi a pamilia, nakatulong iti panagrang-ayda kas Kristiano a ministro ti kaadda iti eskediulda a mangasaba iti linawas.
13 Ti naurnos a rutina ket tumulong met a mamagbalin a naragragsak ken mas nabunga ti tiempo a busbusbosen ti pamiliayo a mangasaba. Kasano a maibanag daytoy? Kastoy ti insingasing ti Hulio 1, 1999, Pagwanawanan, panid 21: “Bayat ti sangapamiliaan a panagadalyo, isapsaparanyo kadi no dadduma a tulongan dagiti kameng ti sangakabbalayanyo nga agsagana para iti serbisio iti tay-ak iti agdama a lawas? Mabalin a makagunggona unay ti panangaramid iti kasta. (2 Timoteo 2:15) Makatulong dayta a mamagbalin iti panagserbida a makapnek ken nabunga. No dadduma, mabalinyo nga usaren ti intero a panagadalyo iti kasta a panagsagana. Kaaduanna, mabalinyo a pagsasaritaan iti apagbiit dagiti aspeto ti ministerio iti tay-ak iti ngudo ti panagadal ti pamiliayo wenno iti dadduma nga aldaw ti lawas.” Pinadas kadin ti pamiliayo daytoy?
14 Itultuloyyo ti Rumang-ay: Iti daytoy a panangusig, nasiputanyo kadi dagiti benneg a positibo ti maar-aramidan ti pamiliayo? Komendaranyo ida, ket ikagumaanyo a pasayaaten pay dagitoy. No nakitayo ti sumagmamano a benneg nga agkasapulan iti panagrang-ay, mangpilikayo iti maysa wenno dua nga ipaayanyo iti atension. No nagbalindan a paset ti naespirituan a rutinayo, ipaayanyo iti atension ti maysa wenno dua manen a benneg. Agbalinkayo a positibo ken rasonable. (Fil. 4:4, 5) Tapno maipasdekyo ti nasayaat a naespirituan a rutina ti pamiliayo, agkasapulan dayta iti napudno a panagregget ngem saan a masayang dayta, ta impanamnama kadatayo ni Jehova: “No maipapan iti daydiay mangsalsalimetmet iti naipasdek a dalan, ipakitakto kenkuana ti panangisalakan ti Dios.”—Sal. 50:23.