Saludsod
◼ Maitutop kadi ti maaddaan kadagidiay maaw-awagan iti “isponsor” wenno “naisangsangayan a sangaili” kadagiti kasar dagiti Kristiano?
Ti kapanunotan maipapan kadagiti “isponsor” ket nagtaud iti narelihiosuan a kaugalian nga adda “ninong” wenno “ninang,” nga agserbi kas “isponsor” no adda agbuniag nga ubing. Iti Pilipinas, agaplikar met daytoy a kapanunotan kadagiti kasar, ket sigun iti nailubongan a kaugalian, agserbi met dagiti “isponsor” kas legal a saksi. Nupay kasta, saan a sumursurot dagiti adipen ni Jehova kadagiti nailubongan a kaugalian isu a dua laeng ti legal a saksi kadagiti kasartayo. Naibatad daytoy iti “Saludsod” iti Disiembre 1992 a Ti Ministeriotayo iti Pagarian.
Kadagiti adu a kasar dagiti Kristiano, masursurot pay laeng ti kaugalian a maaddaan kadagidiay maaw-awagan iti “isponsor” wenno “naisangsangayan a sangaili.” Mainaig iti daytoy, kastoy ti inyimtuod ti nadakamat a “Saludsod” idi 1992: “Saan ngata a sursurotentayo pay laeng ti nailubongan a kostumbre? Saan ngata nga agparparammagtayo iti imatang dagiti sabsabali?” No ibilangtayo dagiti dadduma kas “espesial” wenno “naisangsangayan” a sangaili, wenno awagantayo dagiti dadduma kas “kangrunaan” wenno “segundario” nga isponsor, saan kadi nga iparparegtatayo ti “panaglalasin” iti nagbabaetantayo?—1 Juan 2:15, 16; Sant. 2:1-4.
Iti dadduma a kasasaad, dagidiay maaw-awagan iti “isponsor” ket manamnama a mangted iti material a tulong kadagiti agkasar. Nupay personal a banag ti kasta a panangted, saanen a masapul pay a maipakaammo iti publiko. Laglagipenyo ti kuna ni Jesus iti Mateo 6:3, 4: “No mangmangtedka kadagiti sagut ti asi, dika palubosan a maammuan ti makannigid nga imam ti ar-aramiden ti makannawanmo, tapno dagiti sagutmo ti asi nalimed koma; iti kasta ni Amam a kumitkita iti nalimed supapakannakanto.”
No maipapan iti kaadu ti makiraman iti kasar, kastoy ti kuna Ti Pagwanawanan nga Abril 15, 1997, panid 26: ‘Dagiti abay iti kasar (dagiti gayyem ti nobio ken dagiti babbai a kadua ti nobia) ket saan a masapul nga adu. Saanda met a kayat nga alaen ti atension dagiti sabsabali babaen dagiti kawes ken tigtignayda.’ No maipapan kadagiti maawis iti kasar, kuna Ti Pagwanawanan nga Abril 15, 1984, panid 15, parapo 18: “Imbes a pilienda dagiti tattao a prominente wenno dagidiay mabalin a makaited iti nangina a regalo, adu dagiti agnobio a Kristiano (ken dagiti agpalawag) a kaykayatda nga adda iti kasarda dagidiay nasinged kadakuada nga agserserbi ken Jehova.”
Kastoy ti kuna ti Abril 15, 1997 a Pagwanawanan, panid 24: “Maysa a nasayaat a gundaway ti Nakristianuan a kasar tapno ipakita a datayo ket ‘saan a paset ti lubong.’” Sapay koma ta amintayo pagminarentayo, iti nakaimprenta nga imbitasion ken iti kasar a mismo, a naidumatayo iti lubong gapu iti nainget a panangsurottayo kadagiti prinsipio a linaon ti Sao ti Dios.