Panangrisut iti Panagkasapulan Kadagiti Kingdom Hall
1 Iti 2002 Tinawen a Libro Dagiti Saksi ni Jehova, panid 17-20, naipadamag ti baro a programa ti Sosiedad a “panagibangon kadagiti Kingdom Hall kadagiti napanglaw a pagilian.” Pinampanunotyo kadin no kasano a maaramid daytoy a programa ditoy Pilipinas? Iti daytoy a suplemento pakaammuandakayo a naan-anay maipapan iti dayta baro nga urnos.
2 Maipatpatungpalen daytoy baro a programa iti sangalubongan, nga as-asikasuenna ti kasapulan dagiti kakabsattayo iti 92 a pagilian a pakaibangonan ti rinibu a Kingdom Hall. Tapno marisut daytoy a panagkasapulan ken mausar a nainsiriban dagiti naidedikar a pondo, inyurnos ti Bagi a Manarawidwid a ti Design/Build Department idiay Brooklyn ti mangimaton iti daytoy a trabaho. Lima a Regional Kingdom Hall Office ti naipasdek tapno tumulong a mangorganisar. Ti Sanga nga Opisina idiay Australia ti mangimaton iti Sanga nga Opisina iti Pilipinas.
3 Adda Kingdom Hall Construction Desk a naipasdek iti kada sanga nga opisina a mangorganisar iti trabaho a panagibangon. Daytoy nga opisina tulonganna dagiti kongregasion kabayatan ti panagpili iti lote ken nangaramid kadagiti estandarte a plano a naibatay kadagiti lokal a materiales ken metodo iti panagibangon. Ti panggep ti programa ket agibangon kadagiti simple, nadayaw, ken saan unay a nangina a Kingdom Hall.
4 Kasapulan kadi ti kastoy a programa ditoy Pilipinas? Masiguradotayo a kasapulan dayta. Idi 2001, nagsurbey dagiti amin a manangaywan iti sirkito maipapan iti kasasaad dagiti Kingdom Hall iti sirkitoda. Idi nadagup dagiti report, kasapulan ti nasurok a 1,300 a baro wenno nasken a mapabaro a Kingdom Hall. Yantangay mabayag ti agibangon iti adu unay a Kingdom Hall, kasapulan ti anus gapu ta saan a mapaggigiddan amin dagitoy. Kabayatanna, nasken met ti nasayaat a panangmantener kadagiti agdama a Kingdom Hall-tayo.−Sant. 5:7, 8.
Ti Panggep ti Kingdom Hall Construction Desk
5 Ti Kingdom Hall Construction Desk ket direkta nga agtrabaho iti sidong ti panangiwanwan ti Branch Committee ken makitinnulong iti Service Department. Iti kastoy a pamay-an mayun-una a maasikaso dagiti kongregasion a kangrunaan nga agkasapulan iti baro a Kingdom Hall iti lugar nga ayan ti Kingdom Hall Construction Group.
6 Addada naisaganan nga estandarte a plano ti Kingdom Hall tapno makaibangon kadagiti maitutop a pasdek. Dagita a disenio kissayanna dagiti narikut a detalye ngem kaskasdi nga agusar kadagiti lokal a materiales ken metodo iti panagibangon. Pangngaasiyo ta kitaenyo dagiti dua a ladawan iti daytoy a suplemento. Ti maysa ipakitana ti kangrunaan nga estruktura a landok a mangsuporta iti patakder. Inaramid daytoy ti maysa a lokal a kompania ngem imbangon dagiti kakabsattayo iti dua laeng nga aldaw. Ti sabali pay a ladawan ipakitana ti nalpasen a Kingdom Hall iti sidong ti baro a programa. Naileppas daytoy a patakder iti dua laeng a bulan.
7 Responsabilidad ti Kingdom Hall Construction Desk nga imatonan amin nga aspeto ti proyekto ti Kingdom Hall. Karaman iti daytoy ti pannakimiting nga umuna iti Bagi Dagiti Panglakayen, panangpili iti disenio ken kadakkel ti Kingdom Hall, pananggatang ken umiso a panangirehistro iti lote a pagibangonan, kasta met ti aktual a panangibangon iti patakder. Sakbay a panawanda ti proyekto, sanayenda met dagidiay mangmantener tapno mataginayon ti nasayaat a kasasaad ti Kingdom Hall a mausar iti adu a tawen.
Kingdom Hall Construction Group
8 Kasano a maibangon ti Kingdom Hall? Inaprobaran ti Bagi a Manarawidwid ti pannakabuangay dagiti Kingdom Hall Construction Group. Dagita a grupo ti tumulong kadagiti panglakayen iti kongregasion a mangisagana ken mangibangon iti Kingdom Hall ken mangimaton iti magastos. Dagitoy a grupo ket buklen dagiti Kingdom Hall construction servant ken volunteer. Dakamatenmi ditoy ti ababa a deskripsion dagitoy a trabahador ken no kasanoda a makatulong iti panagballigi ti proyekto a panagibangon.
9 Dagiti Kingdom Hall construction servant: Kaaduanna, dagitoy ket naespirituan a lallaki nga adda kapadasanda iti panagibangon. Agtartrabaho met ti dadduma kadagiti assawada kas paset dagiti construction group. Maysa a Kingdom Hall construction servant ti agserbi kas manangaywan ken madutokan a kas katulonganna ti sabali pay a kualipikado a kabsat a lalaki. Isuda ti mangyeskediul, mangisagana, ken mangimaton iti kada proyekto. Dagitoy ti kualipikasion iti daytoy a kita ti serbisio: nasuroken a makatawen a nabautisaran, mabalinna ti agserbi iti naunday a tiempo, agedad iti nagbaetan ti 19 ken 55, nasalun-at, kabaelanna ti agtrabaho iti nadagsen, no mabalbalin agserserbin iti amin-tiempo kas payunir, ken nakapagserbin iti nasurok a dua a bulan kas Kingdom Hall construction volunteer. Dagiti Kingdom Hall construction servant ket masuportaran a kas met laeng kadagiti Bethelite, agdaldaliasat a manangaywan, ken special pioneer.
10 Dagiti Kingdom Hall construction volunteer: Idi Nobiembre 2001, napakaammuan amin a kongregasion maipapan iti daytoy a trabaho ken immawatda iti sumagmamano a pormas ti aplikasion (A-25) a suratan dagidiay interesado iti daytoy a trabaho. Nakaawatkamin iti nasurok nga 400 nga aplikasion ket apresiarenmi unay ti panaginteres dagiti kakabsat ditoy Pilipinas iti daytoy a serbisio. Agpada ti kualipikasion dagiti Kingdom Hall construction volunteer ken dagiti Kingdom Hall construction servant. Ti nagdumaanda ket temporario dagiti construction volunteer, nga agserbida laeng iti limitado a tiempo. No mabalin, aggapuda kadagiti lugar nga asideg iti proyekto tapno maksayan ti dakkel a gastos kadagiti pagdagusan ken transportasion.
Ti Panagibangon iti Kingdom Hall ket Proyekto ti Kongregasion
11 Ti panagibangon iti Kingdom Hall ket proyekto ti kongregasion. Manipud iti damo ikagumaan dagiti panglakayen a parayrayen ti gagar a mangibangon iti baro a Kingdom Hall. Ikeddengda no kasano kadakkel ti patakder ken ammuen dagiti panglakayen no ania ti maitulong ti kongregasion agpadpada iti pinansial ken panagboluntario.
12 Maiparegta iti intero a kongregasion a suportaranda a naan-anay ti bukodda a proyekto a Kingdom Hall. Mabalin a kabaelan dagiti dadduma ti agboluntario nga inaldaw agingga a malpas ti proyekto. Dagiti dadduma mabalin a maysa wenno dua laeng nga aldaw ti kabaelanda iti kada lawas. Ania ti aramidenda? Makatulongda nga agisagana iti taraon, mangilaba kadagiti trabahador, agidalimanek iti lugar a pagibangonan, agbantay iti rabii, ken tumulong iti aktual a panagibangon. Dagiti agboluntario ket imatonan dagiti kakabsat iti Kingdom Hall Construction Group. Saan a kasapulan ti aplikasion para kadagiti boluntario iti kongregasion ngem mapili koma dagidiay agibumbunannag a nasayaat ti rekordda, a di kumurang a 17 ti edadda, ken inanamongan ti komite ti serbisio ti kongregasion.
Dagiti Addang iti Panagibangon iti Baro a Kingdom Hall
13 Ania dagiti addang nga aramiden ti kongregasion no tarigagayanda ti maaddaan iti baro a Kingdom Hall? Umuna, agkiddawda babaen ti surat iti sanga nga opisina. Yantangay imbilin ti Bagi a Manarawidwid a maibangon laeng dagiti Kingdom Hall kadagiti kongregasion nga addaan iti 30 wenno nasursurok pay nga agibumbunannag, iti dadduma a kasasaad mabalin a kasapulan nga ammuen no posible ti makitipon iti sabali a kongregasion para iti maymaysa a proyekto. No adu a kongregasion ti mangusar iti Kingdom Hall, sigurado a nainsiriban daytoy a panangusar kadagiti limitado a pondotayo. Mayun-una a maaramid dagiti proyekto a pakagunggonaan ti kaaduan nga agibumbunannag. No posible ti kasta a panagtipon, dakamaten koma daytoy iti damo a surat a panagkiddaw ken pirmaan koma dagiti komite ti serbisio ti kada kongregasion a karaman iti proyekto.
14 Apaman nga addan maituding a Kingdom Hall Construction Group iti lugaryo, iyurnos ti Kingdom Hall Construction Desk ti pannakimiting iti lokal a bagi dagiti panglakayen, manangaywan iti sirkito no mabalin, ken dagiti kabangibang a bagi dagiti panglakayen no nasursurok ngem maysa a kongregasion ti magunggonaan iti proyekto. Dagitoy a pannakabagi ket mabalin nga aggapu iti sanga nga opisina wenno dagiti lokal a kakabsat a kas iti manangaywan ti maysa a Kingdom Hall Construction Group a nasanayen a tumulong kadagiti bagi dagiti panglakayen a mangtingiting iti panagkasapulanda iti baro a Kingdom Hall ken mangtarus kadagiti kangrunaan a prinsipio ti Biblia a mangiwanwan iti daytoy a trabaho.
15 Nasken met nga ammuen no manonto ti pondo a sisasagana para iti dayta a proyekto. Kinuna ni Jesus iti Lucas 14:28: “Asino kadakayo a kayatna ti mangbangon iti torre ti saan nga agtugaw nga umuna ket pattapattaenna ti magastos, tapno kitaenna no adda umanay a pangleppasna iti dayta?” Daytoy met laeng a prinsipio ti iyaplikar ti Kingdom Hall Construction Desk. Tapno maammuan no mano ti maitulong ti kongregasion iti proyekto a Kingdom Hall, mangaramid dagiti panglakayen iti surbey. Nasken a realistiko dagiti pamilia ken indibidual a mangikeddeng no mano ti maitedda. Ti dakamatenda a gatad ket paset koma ti normal a badyet ti pamilia.
16 Kasano a maited iti kongregasion ti kontribusion ti tunggal maysa? Kuna ti 1 Corinto 16:1 ken 2: “Ita no maipapan iti panagur-or a maipaay kadagiti sasanto . . . Tunggal umuna nga aldaw ti lawas tunggal maysa kadakayo mangilasin koma iti bukodna a balay iti idulinna a banag a kas iti irarang-ayna, tapno inton dumtengak saanton a maaramid dagiti panagur-or.” Maitunos iti daytoy, amin a kongregasion nga agtarigagay a maaddaan kadagiti baro a Kingdom Hall addaanda koma iti kahon ti kontribusion para iti pondo a pagpatakderda. Babaen ti ehemplo dagiti panglakayen ken ministerial nga adipen, masiguradomi a nasayaat ti panangsuporta ti kongregasion iti proyekto.
17 No mangrugin ti operasion ti Kingdom Hall Construction Group iti lugaryo ken mabalinen nga isaruno ti Kingdom Hall-yo, maipaayto ti ad-adu pay nga instruksion.
Dagiti Nagsayaat a Resulta ti Baro a Programa
18 Iti agdama, adda innem a Kingdom Hall Construction Group nga agan-andar iti Pilipinas. Agingga iti Abril 2003, 13 a baro a patakder ti naibangonen. Nagsayaat unay daytoy a pangrugian ket namnamaenmi a maileppas ti 24 pay agingga iti ngudo daytoy a tawen. Nupay kasta, gapu ta 1,300 a Kingdom Hall ti kasapulan, mapalagipantayo manen a masapul nga aganustayo amin bayat nga ikagumaantayo a risuten ti panagkasapulantayo iti ad-adu pay a Kingdom Hall.
19 Sipud pay idi Nobiembre 1999, a panangrugi ti programa a panagibangon iti Kingdom Hall kadagiti pagilian a limitado ti pondoda, nakaibangonen iti 5,542 a baro a Kingdom Hall iti 88 a pagilian. Gapu iti naayat a kontribusion dagiti kakabsattayo iti sangalubongan, nagbalin a posible daytoy a “panamagpapada,” tapno “ti [kongregasion] nga aduan saan a naaddaan iti adu unay, ket ti [kongregasion] a bassitan saan a naaddaan iti bassit unay.” (2 Cor 8:14, 15) Nupay kasta, adu pay ti trabaho nga iringpas ket karugrugi pay laeng dayta ditoy Pilipinas. Ti kapartak ti idudur-as daytoy a programa ket agpannuray unay iti pinansial a tulong ken ti kaadda dagiti kualipikado a mangidaulo. Segseggaantayo a makita ti panangbendision ni Jehova iti daytoy a programa ditoy Pilipinas.
[Ladawan iti panid 4]
Estruktura ti Kingdom Hall
[Ladawan iti panid 5]
Nalpasen a Kingdom Hall idiay Angat, Bulacan