Saludsod

◼ No mangaskasaba babaen iti telepono, nasken kadi nga ilawlawagtayo ti maipapan iti panagdonasion?

No mangasabatayo iti sangonsango, mabalintay nga ilawlawag a ti sangalubongan a trabaho dagiti Saksi ni Jehova a panangisuro iti Biblia ket supsuportaran a naan-anay dagiti boluntario a donasion ket maragsakantayo a mangawat kadagita a donasion. Nupay kasta, di rumbeng a dakamaten dagiti donasion wenno ti maipapan iti panagdonasion no mangaskasaba babaen iti telepono, di la ket ta ipagarup dagiti tattao a maysa daytoy a pamay-an ti panagur-or babaen iti telepono. Pulos a saan a nakomersialan ti ministerio dagiti Saksi ni Jehova.—2 Cor. 2:17.

◼ No mangaskasaba babaen iti telepono, ania ti rumbeng nga aramidentayo no kiddawen ti maysa a tao a saanen nga awagan dagiti Saksi ni Jehova?

Rumbeng a respetuentayo ti kiddawna. Mainotar koma ti naganna ken ti petsa a panagkiddawna iti dayta ken maidulin iti sobre ti teritoria tapno saan a mailaw-an nga awagan dagiti agibumbunannag dayta a numero iti masanguanan. Maminsan iti makatawen, marepaso koma ti listaan dagiti tattao a nagkiddaw a saantay idan nga awagan. Iti panangiwardas ti manangaywan iti serbisio, mabalin a tudingan dagiti aduan kapadasan, nataktika nga agibumbunannag a sumarungkar kadagitoy a tattao tapno ammuenda ti agdama a kaririknada.—Kitaenyo ti “Saludsod” iti Hunio 1994 a Ti Ministeriotayo iti Pagarian.

◼ Ania ti ibagatayo iti answering machine?

Diyo ibaba ti telepono. Imbes ketdi, adda koma nasayaat pannakaisaganana a naisurat a sungbat a mabalinyo a basaen iti telepono. Mabalinyo a kunaen: “Ladingitek ta didakay naranaan iti pagtaenganyo. No kayatyo ti dumngeg iti topiko a naibatay iti Biblia [paulo ti palawag publiko], mabalinyo ti mapan iti Kingdom Hall dagiti Saksi ni Jehova. Maawis ti amin. Awan ti maaramid a panagkolekta.” Kalpasanna, silalawag a dakamatenyo ti aldaw ken oras ti gimong, ken itedyo ti address wenno deskribirenyo ti lokasion ti Kingdom Hall.