Baldado—Ngem Nabunga

¹ No maysaka kadagiti adu a Saksi ni Jehova a baldado, mabalin a nabunga latta ti ministeriom. Kinapudnona, gapu iti kasasaadmo mabalin a maaddaanka kadagiti naisangsangayan a gundaway a mangasaba ken mangparegta kadagiti sabsabali.

² Panangasaba: Adu dagiti baldado a makiramraman a naan-anay iti ministerio. Kas pagarigan, idi naoperaan ti maysa a kabsat a babai, naapektaran iti kasta unay ti pannagna ken panagsaona. Ngem gundawayanna ti agitukon kadagiti magasin no iparada ni lakayna ti luganda iti asideg ti bangketa nga adu dagiti tao nga aglabas. Naminsan, nakaipaima iti 80 a magasin iti dua laeng nga oras! Gapu iti naidumduma a kasasaadmo, mabalin a makasaritam met dagiti tattao a narigat a madanon. No kasta, ibilangmo ida a kas espesial a teritoriam.

³ Mabalin nga epektibo unay ti panangasabam! No makita dagiti sabsabali ti determinasionmo ken ti nasayaat nga epekto ti kinapudno iti Biblia iti biagmo, mabalin nga aginteresda iti mensahe ti Pagarian. Maysa pay, no makasarakka kadagiti tattao nga adda sagsagabaenda, mabalin a matulongannaka ti kapadasam iti biag a mangipaay kadakuada iti liwliwa a naggapu iti Sao ti Dios.—2 Cor. 1:4.

⁴ Pabilgem Dagiti Sabsabali: Dika kadi naparegta iti pakasaritaan ti biag ni Laurel Nisbet, a naidalit iti iron lung iti 37 a tawen ngem 17 ti natulonganna a nakagun-od iti umiso a pannakaammo iti kinapudno iti Biblia? Kasta met, ti ulidan nga ipakpakitam mabalin a gutugotenna dagiti kapammatiam a mangaramid iti amin a kabaelanda nga agserbi ken Jehova.—g93 1/22 p. 18-21.

⁵ Uray no saanka unay a makaruar iti ministerio gapu iti kasasaadmo, mapabilegmo latta dagiti sabsabali. Kinuna ti maysa a kabsat: “Nasursurok nga uray ti baldado unay a tao mabalin a dakkel ti maitulongna kadagiti sabsabali. Nagserbikami ken ni baketko a kas pammabileg kadagiti dadduma iti kongregasion. Gapu iti kasasaadmi, kanayon nga addakami ditoy, madadaan a kanayon.” Nupay kasta, gapu iti kasasaadyo, mabalin a saanyo a kanayon a maaramid ti pagreggetanyo nga aramiden. Ngem iti tulong dagiti dadduma, mabalinyo ti siaaktibo a makiraman iti ministerio. Gapuna, no kasapulanyo ti tulong, dikay bumdeng a mangdakamat iti daytoy kadagiti panglakayen wenno kadagiti dadduma iti kongregasion a makatulong kadakayo.

⁶ Makita ni Jehova ti amin nga ar-aramidenyo tapno makapagserbikayo kenkuana, ken pagrag-oanna ti amin-kararua a panagserbiyo. (Sal. 139:1-4) No agpannuraykayo kenkuana, mapabilegnakayo a maaddaan iti nabunga ken napnuan kaipapanan a ministerio.—2 Cor. 12:7-10.