Saludsod
◼ Kasano ti rumbeng a panangasikasotayo kadagiti annongen iti kongregasion?
Ti naurnos a panagandar ti kongregasion dagiti adipen ni Jehova ket resulta ti nagkaykaysa a panagreggetda. (1 Cor. 14:33, 40) Panunotem dagiti ramanen ti maysa laeng a gimong ti kongregasion. Malaksid iti mismo a programa, adu pay dagiti aktibidad sakbay ken kalpasan ti gimong bayat nga asikasuen dagiti kakabsat dagiti nadumaduma nga annongenda. Napateg met dagiti dadduma pay nga annongen a maas-asikaso iti pribado. Kasano a makatulong ti tunggal maysa kadatayo iti daytoy nga urnos?
Sidadaanka a tumulong. Adu ti maaramidan dagidiay natulok. (Sal. 110:3) Mangipakitaka iti pannakaseknan kadagiti masakit ken nataengan. Tumulongka iti panagdalus iti Kingdom Hall. Adu ti maitulongtayo uray saan nga agkiddaw kadatayo dagiti dadduma. Masapul laeng a tarigagayantayo ti tumulong.
Agserbi a sieemma. Dagiti naemma a tattao pagragsakanda ti agserbi kadagiti sabsabali. (Luc. 9:48) Ti kinaemma ti manglapped kadatayo a mangawat iti ad-adu a responsabilidad ngem iti kabaelantayo nga asikasuen. Maysa pay, ti kinaemma ti tumulong kadatayo a di lumbes kadagiti limitasion ti autoridadtayo.—Prov. 11:2.
Agbalin a mapagpiaran. Nabilin idi ni Moises a mangpili kadagiti “mapagpiaran a lallaki” a mangasikaso kadagiti annongen iti nagkauna nga Israel. (Ex. 18:21) Kasapulan ita ti kasta met laeng a kualidad. Sipapasnek nga asikasuem ti tunggal annongen nga inawatmo. (Luc. 16:10) No saanmo a maasikaso ti maysa nga annongen, siguraduem nga adda dagiti naaramid a maitutop nga urnos tapno adda mangsandi kenka bayat ti kaawanmo.
Aramidem ti amin a kabaelam. Naidagadag kadagiti Kristiano nga agtrabahoda iti amin a kararua uray kadagiti sekular a bambanag. (Col. 3:22-24) Adda dakdakkel a rason iti panangaramidtayo iti daytoy no agtrabahotayo para iti pannakaidur-as ti pudno a panagdayaw. Uray no kasla nanumo wenno saan a napateg ti maysa a trabaho, mabenepisiaran ti kongregasion no nasayaat ti pannakaasikaso dayta.
Tunggal annongen ipaayannatayo iti gundaway a mangiparangarang iti ayattayo ken ni Jehova ken kadagiti kakabsattayo. (Mat. 22:37-39) Sapay koma ta simamatalek nga aramidentayo ti amin nga annongen a naitalek kadatayo.