Padasenyo ti Maibagaybagay a Pamay-an

Ti napasnek a pannakaseknantayo kadagiti tattao ti mangtignay kadatayo a mangammo kadagiti kasapulanda ken mangipakita kadakuada no kasano nga ipaay ti Pagarian ti naan-anay a solusion dagiti parikut a pakaipaspasanguanda. (Fil. 2:4) Ti maibagaybagay a pamay-an a natakuatan ti adu nga agibumbunannag nga epektibo ket ti panangawis iti bumalay a mangkomento kadagiti naikabil kadagiti publikasiontayo nga ilustrasion maipapan iti kasasaad iti Paraiso, kas kadagiti nailista iti makinkannawan a benneg daytoy a panid. Mabalinmo nga aramiden daytoy babaen ti panangusarmo iti maysa kadagiti sumaganad nga introduksion:

◼ “Panagkunayo, makitatayto ngata a tagiragsaken ti sangatauan dagiti kasasaad a nailadawan ditoy?”

◼ “Kayattayo amin a tagiragsaken dagiti annaktayo ti lubong a kas iti nailadawan ditoy. Ania ti ammoyo a kasapulan tapno mapasamak daytoy?”

◼ “Kastoyto ti buya ti daga inton maaramid ti pagayatan ti Dios ditoy daga a kas sadi langit. Ania ti makitayo ditoy a naiduma iti kasasaad ita?”

◼ “Kayatyo kadi ti agbiag iti kastoy a kasasaad? [Palubosanyo a sumungbat.] Panagkunayo mapasamak ngata daytoy bayat ti panagbiagtayo?”

Denggenyo a naimbag ti sungbat ti bumalay, ken siaanus nga ammuenyo ti kapanunotanna babaen ti panangyimtuodyo iti maysa wenno kanayonan pay a saludsod. No adda dagiti mangibaga a saanda a kayat ti agbiag kadagiti kasasaad nga adda iti ladawan wenno saanda a patien a mapasamak dayta, diyo a dagus nga ipapan a saanda nga interesado. Sitataktika a damagenyo no apay a kasta ti panagriknada. Mabalin nga ipamatmat dagiti sungbatda ti napasnek a pannakaseknanda kadagiti kasla saanen a marisut a parikut a pakaipaspasanguan ti sangatauan.—Ezeq. 9:4.

No ammoyon dagiti pakaseknan ti bumalay, ibagayyo ti presentasionyo. Itampokyo ti aspeto ti mensahe ti Pagarian a maitutop unay kadagiti kasapulanna. Mangibasakayo iti maysa wenno dua a teksto a mainaig iti banag a pakaseknanna. (Kitaenyo dagiti singasing iti makinkannawan a benneg.) Ipakitayo kenkuana a mismo no ania ti kuna ti Sao ti Dios. No mangipakita iti interes, itukonyo ti publikasion ken iyurnosyo ti panagsubliyo. Itultuloyyo a parayrayen ti interesna iti damo a panagsaritayo.

[Kahon iti panid 6]

Dagiti Pagarigan Maipapan iti Kasasaad iti Paraiso

Libro a Creation: panid 237, 243, 251

Libro a Mannursuro: panid 251-4

Libro a Pannakaammo: panid 4-5, 188-9

Broshur a Kalikaguman: panid 11, 13

Libro a Pudno a Talna: panid 98

Libro nga Agdayawkayo iti Dios: panid 92-3

[Kahon iti panid 6]

Dagiti Banag a Pakaseknan Dagiti Tattao

Kinadakes, kinaawan hustisia

Isaias 9:6, 7;

2 Pedro 3:13

Krimen, kinaranggas

Salmo 37:10, 11;

Proverbio 2:21, 22

Ipapatay, panagladingit

Isaias 25:8;

Apocalipsis 21:3, 4

Panagleddaang

Salmo 34:8;

Isaias 65:17-19

Kinakirang ti taraon, malnutrision

Salmo 72:16;

Isaias 25:6

Pagtaengan, parikut iti ekonomia

Isaias 65:21, 22

Di epektibo a gobierno

Salmo 146:3, 4;

Daniel 2:44

Panangranggas kadagiti animal

Proverbio 12:10

Panagrakaya ti moral

2 Timoteo 3:1-5

Kinapanglaw, pannakairurumen

Salmo 72:12-14;

Eclesiastes 8:9

Panangidumduma, di panagpapada

Isaias 11:3-5;

Aramid 10:34, 35

Pannakadadael ti daga

Apocalipsis 11:18

Sakit, pisikal a depekto

Isaias 33:24; 35:5, 6

Gubat, terorismo

Salmo 46:8, 9;

Mikias 4:3, 4