Idulinyo
Dagiti Presentasion a Mabalin nga Usaren iti Serbisio iti Tay-ak
Usarenyo dagiti sumaganad a singasing a makatulong iti panangisaganayo kadagiti presentasion a mangitampok iti literatura a tukon iti bulan.
Umadanika ken Jehova
“Adu a tattao a mamati iti Dios ti agtarigagay nga agbalin a nasingsinged kenkuana. Ammoyo kadi nga aw-awisennatayo ti Dios nga umadani kenkuana? [Basaenyo ti Santiago 4:8.] Nairanta daytoy a publikasion a tumulong kadagiti tattao a mangusar iti bukodda a Biblia tapno agbalinda a nasinged iti Dios.” Basaenyo ti parapo 1 iti panid 16.
“Agraraira ita ti kinaawan hustisia, kas nadeskribir ditoy. [Basaenyo ti Eclesiastes 8:9b.] Adu ti mangpampanunot no pudno met laeng a maseknan ti Dios. [Basaenyo ti umuna a dua a sentensia ti parapo 4 iti panid 119.] Ilawlawag daytoy a kapitulo no apay a temporario nga impalubos ti Dios ti kinaawan hustisia.”
Is There a Creator Who Cares About You?
“Pakasarakantayo iti kasayaatan a balakad no kasano a risuten dagiti makaburibor a parikuttayo? [Palubosanyo a sumungbat, sa basaenyo ti Mateo 7:28, 29.] Deskribiren dayta a teksto no ania ti reaksion dagiti tattao iti Sermon ni Jesus iti Bantay. Imutektekanyo no ania ti kinuna dagiti dadduma. [Itampokyo dagiti komento iti panid 152.] Ilawlawag daytoy a kapitulo ti biag ken pannursuro ni Jesus.”
“Naisalsaludsodyo kadin a no adda Dios, ikkatennanto ngata ti panagsagaba ken kinaawan hustisia ditoy lubong? [Palubosanyo a sumungbat, sa basaenyo ti Apocalipsis 21:3, 4.] Ilawlawag daytoy a libro no anianto ti aramiden ti Dios tapno maikkat ti panagsagaba ken maikkat ti gubuayanna.” Ipakitayo ti kapitulo 10.
Pannakaammo a Mangiturong iti Biag nga Agnanayon
“No awisendakayo nga agnaed iti nagpintas a lugar a kas iti daytoy, kayatyo kadi? [Ipakitayo ti ladawan iti panid 4-5, sa palubosanyo a sumungbat.] Imutektekanyo no ania ti kuna ti Sao ti Dios a masapul nga aramidentayo tapno matagiragsaktayo iti agnanayon daytoy a kita ti biag. [Basaenyo ti Juan 17:3.] Tulongannakayo daytoy a libro a manggun-od iti pannakaammo a mangiturong iti biag nga agnanayon.” Iyurnosyo a pagsaritaan ti umuna a lima a parapo ti kapitulo 1 iti sumaganad a panagsarungkaryo.
Ukagenyo ti ladawan iti panid 188-9. Babaen ti panangusar kadagiti sasao iti kapsion, iyimtuodyo iti bumalay: “Namnamaenyo kadi ti agbiag iti Paraiso, inton mapno ti daga iti pannakaammo iti Dios? [Palubosanyo a sumungbat, sa basaenyo ti Isaias 11:9.] Tulongannakayo daytoy a libro a mangammo no ania ti kuna ti Biblia maipapan iti Paraiso ken no kasano nga agbalintayo a paset dayta.” Iyurnosyo a pagsaritaan ti parapo 11-16 ti kapitulo 1 iti sumaganad a panagsarungkaryo.
Agsursuroka iti Naindaklan a Mannursuro
“Panagkunayo, sumayaat ngata ti kasasaad ditoy lubong no agbiag dagiti tattao a mayannurot iti daytoy a pagsasao? [Basaenyo ti Mateo 7:12a, sa palubosanyo a sumungbat.] Naglaon daytoy a libro iti adu a pannursuro ti kalaingan a mannursuro a nagbiag ditoy daga.” Itampokyo dagiti ladawan ken kapsion iti kapitulo 17.
“Ikagkagumaan ti kaaduan a nagannak ita nga itukit dagiti naimbag a pannursuro kadagiti annakda. Napateg kadi daytoy kadakayo? [Palubosanyo a sumungbat, sa basaenyo ti Proverbio 22:6.] Imutektekanyo ta naidagadag kadagiti nagannak nga irugida a suruan dagiti annakda manipud iti kinaubingda. Nairanta daytoy a libro a tumulong kadakuada a mangaramid iti dayta.” Itampokyo dagiti ladawan ken kapsion iti kapitulo 15 wenno 18.
“Masansan a masdaaw dagiti nagannak kadagiti saludsod dagiti annakda. Mabalin a narigat a sungbatan ti dadduma kadagita a saludsod, saan kadi? [Palubosanyo a sumungbat, sa basaenyo ti Efeso 6:4.] Makatulong daytoy a libro kadagiti nagannak ita a mangsungbat kadagiti saludsod ti annakda.” Itampokyo ti sumagmamano kadagiti ladawan ken kapsion iti kapitulo 11 ken 12 wenno 34 agingga iti 36.
Life—How Did It Get Here? By Evolution or by Creation?
“Maseknantayo amin iti krimen ken kinaranggas iti lugartayo. Panagkunayo, adda ngata asinoman a makaipaay iti napaypayso a solusion iti dayta a parikut? [Palubosanyo a sumungbat.] Adda solusion nga ipaay ti Dios.” Ukagenyo iti panid 196; basaen ken komentuanyo ti Proverbio 2:21, 22 iti parapo 19. Ipakitayo ti paulo ti kapitulo 16, sa itukonyo ti libro.
Ukagenyo ti panid 6, sa kunaenyo: “Adu ti mangipagarup a naiparparna laeng ti napintas a dagatayo ken ti biag nga adda ditoy. Ania ti ammoyo a nainkalintegan a panangilawlawag no kasano a timmanor amin dagitoy? [Palubosanyo a sumungbat.] Nawadwad ti ebidensia a mangpatalged iti salaysay ti Biblia maipapan iti Namarsua a mannakabalin unay ken mangipatpateg unay kadatayo. Isu ti pudno a Dios, ket Jehova ti naganna.” Basaenyo ti Salmo 83:18, ken ilawlawagyo iti apagbiit no kasano a panggepna a pagbalinen a paraiso ti intero a daga.
Ti Panangbiruk ti Sangatauan iti Dios
“Gapu iti kaadu ti relihion ita, pinampanunotyo kadin no kasanotayo a maammuan no ania kadagita ti anamongan ti Dios?” Kalpasan a sumungbat, ukagenyo ti panid 377. Itampokyo ti punto iti numero 7, sa isaludsodyo no umanamong ti bumalay a ti pudno a relihion rumbeng a pagkaykaysaenna amin a puli ti sangatauan. Kitaenyo ti maysa kadagiti naisitar a teksto, ket no ipalubos ti oras, pagsaritaanyo ti dadduma kadagiti sabali pay a punto iti listaan. No pudno nga interesado, itukonyo ti libro. Inton pumanawkayo, isaludsodyo, “Ania ti rumbeng nga epekto ti pudno a relihion iti kababalin ti maysa a tao?” Iyurnosyo ti sumarungkar tapno sungbatanyo ti saludsod.
No ibaga ti maysa a tao nga isu ket kameng ti maysa a kangrunaan a relihioso a grupo, mabalinyo a kunaen: “Makaparagsak a maam-ammo dagiti tattao a nadumaduma ti relihionda. Nadumaduma ti pamay-an ti sangatauan a mangbirok iti Dios. [No maitutop, basaenyo ti Aramid 17:26, 27.] Masansan a suroten dagiti tattao ti relihion dagiti nagannak kadakuada. [Basaenyo ti parapo 12 iti panid 8.] Malawlawagan ken makasursurotayo no ammuentayo ti ad-adu pay maipapan kadagiti dadduma a relihion. Ilawlawag daytoy a libro ti namunganayan, ar-aramid, ken sursuro dagiti kangrunaan a relihion iti lubong.” Mangipakitakayo iti pagarigan manipud iti libro maipapan iti relihion ti bumalay, a masarakan kadagiti sumaganad a panid: Sikhismo (100-1); Hinduismo (116-17); Budismo (141); Taoismo (164-6); Confucianismo (177); Shintoismo (190-5); Judaismo (220-1); ken Islam (289).
Apocalipsis—Ti Grande a Tampokna Asidegen!
“Mabalin a nadamagyon ti maipapan iti [mangdakamatkayo iti maysa a damag]. No nakaam-ames ti ipapatay ti maysa a tao, adu ti mangpampanunot no kasanoda a maliwliwa dagiti pamilia dagiti biktima. Ania ti makunayo?” Palubosanyo a sumungbat, sa ukagenyo ti panid 299, ken ipakitayo ti ilustrasion maipapan iti panagungar. Inayonyo: “Adu ti masdaaw a makaammo a dagiti nalinteg ken nakillo agpada a mapagungardanto iti Paraiso a daga. [Basaenyo ti Aramid 24:15 a naadaw iti parapo 9 iti panid 297, sa ilawlawagyo iti parapo 10.] Ilawlawag daytoy a libro ti adu pay a makapainteres a detalye maipapan iti panggep ti Dios iti masanguanan.”
Ti Biblia—Saot’ Dios Wenno iti Tao?
“Agbibiagtayo iti tiempo a gistay amin ket mapaspasanguan kadagiti serioso a parikut. Adu ti agpabpabalakad kadagiti amin a kita ti mammagbaga. Adda dagiti agpatpatulong kadagiti psychic. Sadino ti pagarupyo a pakasarakan iti nasimbeng a balakad a pudno a makatulong kadatayo? [Palubosanyo a sumungbat.] Adda ibagbaga ti Biblia a napateg a banag a nasken a matarusantayo. [Basaenyo ti 2 Timoteo 3:16, sa ukagenyo ti panid 187, ken basaenyo ti parapo 9.] Tulongannakayo daytoy a libro a mangapresiar no kasano a ti panangsurot iti kuna ti Biblia ket kanayon nga agpaay iti pagimbagantayo.”
Ti Katan-okan a Tao a Nagbiag Pay Laeng
“Iti daytoy a panawen, adu a tattao ti mangpampanunot ken ni Jesus. Ngem gapu kadagiti adu a dakes a pasamak iti intero a lubong, pampanunoten dagiti dadduma no pudno met laeng a maseknan ni Jesus kadatayo. Ania ti makunayo iti dayta?” Palubosanyo a sumungbat. Ukagenyo ti kapitulo 24, sa ilawlawagyo iti apagbiit no apay nga immay ni Jesus ditoy daga. Kalpasanna basaenyo ti Juan 15:13, nga ipaganetgetyo ti naimpusuan a panagayat ni Jesus kadagiti sabsabali.
“No madakamat ni Jesu-Kristo, adu ti mangpanunot kenkuana kas ubing wenno kas lalaki nga agsagsagaba a dandanin matay. Ti laeng pannakayanak ken ipapatay ni Jesus ti pampanunotenda. Masansan a dida malagip dagiti nakaskasdaaw a sinao ken inaramidna bayat ti panagbiagna. Ti naaramidanna apektaranna ti amin a tao a nagbiag ditoy daga. Dayta ti gapuna a nasken nga ammuentayo ti kabaelantayo nga ammuen maipapan kadagiti nakaskasdaaw a banag nga inaramidna nga agpaay kadatayo.” Basaenyo ti Juan 17:3. Ukagenyo ti umuna a panid ti introduksion, sa basaenyo ti maikapat a parapo.
Ania ti Kalikaguman ti Dios Kadatayo?
“Iti panagkunayo, inranta ngata ti Dios nga agbiagtayo iti nariribuk a kasasaad a kas iti mapaspasarantayo ita? [Palubosanyo a sumungbat, sa basaenyo ti Mateo 6:10.] Napampanunotyo kadin no ania a talaga ti Pagarian ti Dios?” Iturongyo iti leksion 6, sa basaenyo dagiti saludsod iti pangrugian ti leksion. Irugiyo a pagsaritaan ti leksion, wenno iyurnosyo nga aramiden dayta iti sumaganad a panagsarungkaryo.
“Iti laksid dagiti panagrang-ay iti moderno a kagimongan, ti sakit ken ipapatay agtultuloy a parparigaten ken pagladladingitenna ti sangatauan. Ammoyo kadi no anianto ti aramiden ni Jesus kadagiti masakit, lallakay wenno babbaket, ken uray kadagiti natay?” Palubosanyo a sumungbat. No kayatna a maammuan ti sungbat, ukagenyo ti leksion 5, sa basaenyo dagiti saludsod para iti parapo 5-6. Pagsaritaanyo dagiti parapo, wenno iyurnosyo nga aramiden dayta iti sumaganad a panagsarungkaryo.
Agdayawkayo iti Maymaysa a Pudno a Dios
“Siasino ti ammoyo a mabalin a pagpatulongantayo tapno masarangettayo dagiti pakarigatan iti biag? [Palubosanyo a sumungbat, sa basaenyo ti Roma 15:4.] Imutektekanyo ta ti naipaltiing a Kasuratan sursuruannatayo, ipaayannatayo pay iti liwliwa ken namnama a mangpabileg kadatayo a mangibtur kadagiti pakarigatan. Mangipaay daytoy a libro kadagiti makatulong a singasing no kasanotayo a magunggonaan a naan-anay iti panagbasa iti Biblia.” Itampokyo dagiti uppat a punto a naibalabala iti panid 30.
“Sipud kadagidi aldaw a kaadda ni Jesus ditoy daga, adu a tattao ti mangikarkararag nga umay koma ti Pagarian ti Dios. Napampanunotyo kadin no ania ti kaipapananna iti sangatauan ti iyaay dayta a Pagarian? [Palubosanyo a sumungbat, sa basaenyo ti Daniel 2:44.] Ilawlawag daytoy a libro no ania ti Pagarian ti Dios, anianto ti aramidenna, ken no kasano a magunggonaantayo iti nalinteg a panangiturayna.” Itampokyo ti ilustrasion iti panid 92-3.