Idulinyo

Dagiti Singasing a Presentasion iti Tay-ak ti Serbisio

No Kasano nga Usaren Daytoy a Suplemento

Kaaduan kadagiti sumaganad a presentasion ket nagparang kadagiti napalabas a ruar Ti Ministeriotayo iti Pagarian. Padasem amin dagitoy iti panangasabam aginggat’ kabaelam, ket kitaem no ania dagiti resulta a magun-odam. Idulinmo daytoy a suplemento, ken agkonsultaka iti dayta no agsagsaganaka para iti ministerio.

Mabalin a matukaymo ti interes ti maysa a tao iti Sao ti Dios no ibagam a dagus ti puntom. Mangibangonka iti espesipiko a saludsod, sa basaen ti ababa a Nainkasuratan a sungbat. Mabalinmo a padasen dagitoy a singasing:

“Bayat nga ut-utobenyo ti masanguanan, mangnamnamakayo kadi wenno agduaduakayo? [Palubosanyo a sumungbat.] Impadto ti Biblia dagiti nariribuk a pasamak a makitkitatayo ita ken ti pagbanaganda.”​—2 Tim. 3:1, 2, 5; Prov. 2:21, 22.

“Adda ti kasta unay a pannakaseknan ita maipapan iti salun-at. Ammoyo kadi nga inkari ti Dios a permanente a risutennanto amin a problema iti salun-at?”​—Isa. 33:24; Apoc. 21:3, 4.

“Ammoyo kadi nga impadto ti Biblia nga addanto laengen maymaysa a gobierno a mangituray iti intero a lubong?”​—Dan. 2:44; Mat. 6:9, 10.

“Panagkunayo, ania ngata ti kasasaad no ni Jesu-Kristo ti agturay ditoy daga?”​—Sal. 72:7, 8.

“Adu a tattao ita ti maidumduma gapu iti sekso, relihion, wenno pulida. Panagkunayo, kasano ngata ti panangmatmat ti Dios iti kasta a panangidumduma?”​—Ara. 10:34, 35.

“Ammotayo a nagaramid ni Jesu-Kristo iti adu a milagro idi kaaldawanna. No mabalinanyo koma ti agkiddaw kenkuana iti maysa pay a milagro, ania ti kiddawenyo?”​—Sal. 72:12-14, 16.

“Nauman ti kaaduan a tattao a makangkangngeg kadagiti problema. Kayatda a maammuan no kasano a marisut dagita. Ngem sadino ti pakasarakantayo kadagiti pudpudno a solusion dagiti problematayo?”​—2 Tim. 3:16, 17.

“Ammoyo kadi no ania ti Pagarian nga ikarkararagyo iti Kararag ti Apo (wenno, Amami)?”​—Apoc. 11:15.

Dagiti Pangirugi iti Saritaan

Ti listaan dagiti saludsod iti baba, a nagupgop manipud kadagiti topiko iti libro a Panakirinnason, ipakitana ti panid iti libro a pakasarakan iti sungbat ti tunggal saludsod:

Apay a lumakay ken mataytayo? (rs 167 IL)

Ania ti kasasaad dagiti natay? (rs 168 IL)

Adda kadi nainkalintegan a rason a mamatitayo iti Dios? (rs 113 IL)

Talaga kadi a maseknan ti Dios iti mapaspasamak kadatayo a tattao? (rs 114 IL)

Pudpudno aya a persona ti Dios? (rs 115 IL)

Mapan kadi idiay langit amin dagiti naimbag a tattao? (rs 207 IL)

Masapul kadi a mapan ti tao idiay langit tapno pudno a naragsak ti masakbayanna? (rs 208 IL)

Apay a nasken nga ammuen ken usaren ti personal a nagan ti Dios? (rs 182 IL)

Ni Jesu-Kristo aya a talaga ti Dios? (rs 187 IL)

Anianto ti aramiden ti Pagarian ti Dios? (rs 268 IL)

Ania ti panggep ti biag ti tao? (rs 64 IL)

Ania ti makatulong a mangpasayaat iti panagasawa? (rs 287 IL)

Akseptaren aya ti Dios dagiti amin a relihion? (rs 362 IL)

Kasano a maammuan ti maysa a tao no ania a relihion ti umiso? (rs 368 IL)

Kasanot’ kabileg ti impluensia ni Satanas iti agdama a lubong? (rs 390 IL)

Apay nga ipalubos ti Dios ti panagsagaba? (rs 295 IL)

Apay a nakaro unay ti kinadakes? (rs 89 IL)

Asino ti mangiturturay iti daytoy a lubong​—ti Dios wenno ni Satanas? (rs 214 IL)

Dagiti Singasing iti Panangiparang iti Broshur a Kalikaguman

“Awan duadua nga umanamongkayo nga adu a tao ti mamati iti Dios. Amin a mamati iti Dios umanamongda nga adda banag a kalikagumanna kadatayo. Ti saan a pagtunosan dagiti tattao ket, Ania ti kalikaguman ti Dios kadatayo?” Kalpasanna, iparangyo ti broshur a Kalikaguman, ipakitayo ti leksion 1, ket pagtungtonganyo dayta.

“Yantangay adu unay ti parikut iti biag ti pamilia ita, napanunotyo kadin no ania ti tulbek tapno agbalin a naragsak ti pamilia?” Kalpasan a sumungbat, ilawlawagyo nga iti Biblia, ipalgak ti Dios ti pudpudno a tulbek iti kinaragsak ti pamilia. Basaenyo ti Isaias 48:17. Kalpasanna, ipakitayo ti leksion 8 iti broshur a Kalikaguman, ket ipaganetgetyo ti sumagmamano a naisitar a teksto ti Biblia a mangipaay iti mapagtalkan a giya para iti tunggal miembro ti pamilia. Basaenyo dagiti saludsod iti rugi ti leksion. Imtuodenyo no kayat ti bumalay a basaen dagiti sungbat.

“Naglaon daytoy a broshur iti komprehensibo a kurso iti panagadal a mangsaklaw kadagiti pamunganayan a sursuro iti Biblia. Iti tunggal panid, makasarakkayo iti sungbat dagiti saludsod a mangburburibor kadagiti tattao iti sinigsiglo. Kas pagarigan, Ania ti panggep ti Dios iti daga?” Ipakitayo ti leksion 5, ket basaenyo dagiti saludsod iti rugi ti leksion. Saludsodenyo iti bumalay no ania ti kangrunaan a paginteresanna, ket kalpasanna basaenyo ti (wenno dagiti) katupagna a parapo, a kitaenyo dagiti maitutop a kasuratan. Ilawlawagyo a dagiti dadduma a saludsod ket nalaka met a sapulen ti makapnek a sungbatda kas iti saludsod a kalkalpas a nasungbatan. Isingasingyo nga agsublikayo manen tapno pagtungtonganyo ti sabali pay a saludsod.

“Ania ti ammoyo a pakaigapuan dagiti naranggas a krimen kadagiti agtutubo ita? Resulta ngata dayta ti nakurang a panangdisiplina dagiti nagannak? Wenno adda sabali a makagapu, kas iti impluensia ti Diablo?” Palubosanyo a sumungbat. No kunaen ti bumalay a dayta ket gapu iti impluensia ti Diablo, ibasayo ti Apocalipsis 12:9, 12. Ipaganetgetyo ti akem ti Diablo iti ikakaro ti riribuk ditoy lubong. Kalpasanna, ukagenyo ti broshur a Kalikaguman iti leksion 4, ket saludsodenyo no nautobna kadin no sadino ti nagtaudan ti Diablo. Ituloyyo a basaen ken ilawlawag ti umuna a dua a parapo. No pilien ti bumalay a ti “nakurang a panangdisiplina dagiti nagannak” ti makagapu iti kinaranggas kadagiti agtutubo, basaenyo ti 2 Timoteo 3:1-3 ket ilawlawagyo dagiti kababalin a nabatad a mangpakpakaro iti daytoy a parikut. Kalpasanna, ukagenyo ti broshur a Kalikaguman iti leksion 8, basaenyo ti parapo 5, ket ituloyyo ti saritaan.

“Panagkunayo rasonable kadi a namnamaen nga ipaayannatayo ti Namarsua iti pannakaammo a kasapulantayo a mangibangon iti naballigi a biag ti pamilia?” Kalpasan a sumungbat, ipakitayo ti broshur a Kalikaguman. Ukagenyo iti leksion 8, ket ilawlawagyo a naglaon dayta kadagiti prinsipio iti Biblia nga agpaay iti tunggal miembro ti pamilia. Itukonyo nga idemostra no kasano nga usaren ti broshur ken ti Biblia tapno naan-anay a magunggonaan.

“Nagadu dagiti parikut iti biag a sangsanguentayo ita. Panagkunayo talaga kadi a makatulong kadatayo ti panagkararag? [Palubosanyo a sumungbat.] Adu ti agkuna a bumileg ti pakinakemda no agkararagda. [Basaenyo ti Filipos 4:6, 7.] Ngem mabalin a marikna ti maysa a tao a di masungsungbatan dagiti kararagna. [Ukagenyo ti broshur a Kalikaguman iti leksion 7.] Ilawlawag daytoy a broshur no kasanotayo a naan-anay a magunggonaan iti kararag.”

“Makipatpatangkami kadagiti tattao maipapan kadagiti rason no apay a nakaad-adu ti relihion ditoy lubong, idinto ta maymaysa ti Biblia. Iti panagkunayo, apay ngata a di agtutunos dagiti relihion? [Palubosanyo a sumungbat. Ukagenyo ti broshur a Kalikaguman iti leksion 13, ket basaenyo dagiti panglukat a saludsod.] Maammuanyo ti makapnek a sungbat dagita a saludsod babaen ti panangbasayo iti daytoy a leksion.”

Kalpasan a maipaimayo ti magasin a Pagwanawanan ken Agriingkayo! iti maysa a tao, damagenyo no mabalinyo nga ibasa kenkuana ti maysa nga ababa a parapo. No palubosannakayo, ukagenyo ti broshur a Kalikaguman iti leksion 5. Ipakitayo dagiti saludsod iti rugi ti leksion, ket kiddawenyo a denggenna ti sungbat ti umuna a saludsod bayat a basaenyo ti panglukat a parapo. Kalpasan a mabasa ti parapo, ibasayo ti saludsod ket denggenyo ti sungbatna. Itukonyo ti broshur, ket no awatenna, itulagyo ti panagsubliyo tapno maammuanyo dagiti sungbatna kadagiti sumaganad a dua a saludsod.

Dagiti Singasing iti Panangiparang iti Libro a Pannakaammo

Bayat nga iggemyo ti Biblia, kunaenyo: “Ibasbasami ita ti maysa a kasuratan kadagiti tattao ditoy lugaryo. Kastoy ti kunana . . .” Basaenyo ti Juan 17:3, sayo iyimtuod: “Nasiputanyo kadi no ania ti naikari no umiso ti pannakaammotayo? [Palubosanyo a sumungbat.] Pakasapulan ti maysa a tao iti kasta a pannakaammo?” Kalpasan a sumungbat, ipakitayo ti libro a Pannakaammo, sayo kunaen: “Ipatuldo daytoy a libro ti pannakaammo a mangiturong iti biag nga agnanayon. Ipatuldona babaen ti panangsungbatna kadagiti kangrunaan a gagangay a saludsod dagiti tattao maipapan iti Biblia.” Ipakitayo dagiti linaonna, ket iyimtuodyo iti bumalay no napampanunotnan ti aniaman kadagita a suheto.

“Pinanunotyo kadin no talaga met laeng a maseknan ti Dios iti kinaawan hustisia ken panagsagaba a makitkita wenno mapaspasarantayo a mismo? [Palubosanyo a sumungbat.] Ipanamnama ti Biblia kadatayo nga ay-ayatennatayo ti Dios ket tulongannatayo iti tiempo ti pakarigatan.” Basaenyo ti dadduma a paset ti Salmo 72:12-17. Ukagenyo ti libro a Pannakaammo iti kapitulo 8, ket ipaganetgetyo a mangipaay dayta iti makaliwliwa a sungbat iti maysa a saludsod nga iyim-imtuod ti minilion a tattao, Apay nga ipalubos ti Dios ti panagsagaba? No mabalin, ilawlawagyo ti sumagmamano a Nainkasuratan a kapanunotan a saklawen ti parapo 3 agingga 5, wenno aramidenyo dayta inton agsublikayo.

“Napadasanen ti kaaduan kadatayo ti natayan iti patpatgen. Pinanunotyo kadi no makitatayonto pay ida? [Palubosanyo a sumungbat.] Pinaneknekan ni Jesus a mabalin a mapagungar dagiti patpatgentayo. [Basaenyo ti Juan 11:11, 25, 44.] Nupay napasamak daytoy sinigsiglon ti napalabas, ipakitana no ania ti inkari ti Dios nga aramidenna agpaay kadatayo.” Ipakitayo ti ladawan iti panid 85 ti libro a Pannakaammo, ket basaenyo ti kapsion. Kalpasanna, ipakitayo ti ladawan iti panid 86, ket komentuanyo dayta. Ipasdekyo ti panggapuanyo nga agsarungkar babaen ti panangyimtuodyo: “Kayatyo kadi a maammuan ti rason no apay a lumakay ken matay dagiti tattao?” Agsublikayo tapno ilawlawagyo ti kapitulo 6.

“Napanunotyo kadin no apay a tarigagayan dagiti tattao ti napapaut a biag?” Kalpasan a sumungbat, ukagenyo ti libro a Pannakaammo iti kapitulo 6, ket basaenyo ti parapo 3. Ilawlawagyo dagiti naisitar a kasuratan. Iturongyo ti atension kadagiti dua a saludsod iti ngudo ti parapo, ket iyimtuodyo iti bumalay no kayatna a maammuan dagiti sungbat. No umanamong, pagsaritaanyo ti sumaganad a sumagmamano a parapo.

“Salsaludsodanmi dagiti tattao no mamatida iti daytoy . . .” Basaenyo ti Genesis 1:1, sayo iyimtuod: “Umanamongkayo kadi iti dayta a sasao?” No umanamong ti bumalay, kunaenyo: “Kastaak met. Ngem iti panagkunayo, ti Dios kadi ti makinggapuanan iti kinadakes yantangay isu ti nangparsua iti amin a banag?” Apresiarenyo ti sungbat ti bumalay, sayo basaen ti Eclesiastes 7:29. Ukagenyo ti libro a Pannakaammo iti kapitulo 8, ket basaenyo ti parapo 2. No saan nga umanamong iti Genesis 1:1, gutugotenyo a mangsukimat kadagiti pammaneknek nga adda ti Namarsua.—Kitaenyo ti libro a Panakirinnason, panid 313-15.

“Umanamongkayo kadi a kasapulantayo ita ti mapagtalkan a giya iti biag gapu iti nakaparpartak a panagbaliw dagiti moral a prinsipio? [Palubosanyo a sumungbat.] Nupay ti Biblia ti kadaanan kadagiti libro, mangipaay daytoy iti praktikal a balakad no kasano ti agbiag ita ken maaddaan iti naragsak a biag ti pamilia.” Kalpasanna, ukagenyo ti libro a Pannakaammo iti kapitulo 2, sayo basaen ti parapo 10 ken ti umuna a sentensia ti parapo 11, agraman ti 2 Timoteo 3:16, 17.

“Kayatyo kadi a maammuan no ania ti ipaay ti masanguanan para kadatayo ken iti daga? [Palubosanyo a sumungbat.] Ginupgop ti Biblia ti masanguanan babaen ti maysa a sao​—Paraiso! Dita a pinagnaed ti Dios ti umuna a natauan a pagassawaan idi pinarsuana ida. Imutektekanyo daytoy a panangiladawan no ania ti paraiso.” Ukagenyo ti libro a Pannakaammo iti panid 8, sayo basaen ti parapo 9, iti sidong ti subtitulo a “Biag iti Paraiso.” Kalpasanna, ilawlawagyo dagiti punto iti parapo 10, sayo basaen ti naisitar a kasuratan, ti Isaias 55:10, 11. Itukonyo ti panagsubliyo tapno maitultuloy ti panagsaritayo maipapan iti kasasaad iti naisubli a Paraiso, a saklawenyo ti parapo 11-16.

No sarungkaranyo dagiti napaimaanyo iti magasin a Pagwanawanan ken Agriingkayo!, mabalinyo a kunaen ti kastoy:

“Iti naudi nga isasarungkarko, naipaimak kenka ti maysa a kopia ti magasin a Pagwanawanan. Nadlawmo siguro a ti kompleto a paulo dayta a magasin ket Ti Pagwanawanan Mangibumbunannag iti Pagarian ni Jehova. Kayatko nga ilawlawag ita no ania daytoy a Pagarian ken no ania ti kaipapananna kenka ken iti pamiliam.” Kalpasanna, ukagenyo ti broshur a Kalikaguman iti leksion 6, ket basaen ken pagsaritaanyo agingga nga adda tiempo ti bumalay.

“Simmarungkarak kenka itay nabiit ket nangibatiak kadagiti kopia ti magasin a Pagwanawanan ken Agriingkayo! Dagitoy a pagiwarnak parayrayenda ti panagraem dagiti tattao iti Biblia ken kadagiti moral a pagalagadanna. Ammok a napateg a matarusan ti tunggal maysa ti Sao ti Dios, isu a nagsubliak tapno ipakitak kenka ti maysa a banag a tumulong kenka a mangaramid iti dayta.” Ipakitayo ti broshur a Kalikaguman wenno ti libro a Pannakaammo, ket itukonyo ti panagadal iti Biblia.

No itampokyo ti aniaman kadagiti nadadaan a libro a 192 ti panidna, mabalin a kastoy ti kunaenyo:

“Maipagpaganetget a masapul ti de kalidad nga edukasion. Iti panagkunayo, ania a kita ti edukasion ti masapul a ragpaten ti maysa a tao tapno manamnamana ti naan-anay a kinaragsak ken balligi iti biag? [Palubosanyo a sumungbat. Sayo ibasa ti Proverbio 9:10, 11.] Daytoy a libro [dakamatenyo ti paulo ti libro nga ituktukonyo] ket naibasar iti Biblia. Ipakitana ti kakaisuna a gubuayan ti pannakaammo a mangiturong iti biag nga agnanayon.” Ipakitayo ti maysa a pagarigan iti libro, ket iparegtayo iti bumalay a basaenna dayta.

Dadduma a Publikasion

Dagiti singasing a presentasion para kadagiti kanayonan a libro ken broshur ket masarakan iti Watch Tower Publications Index iti babaen ti:

Presentations

List by Publication

Ti Direkta a Pamay-an

No mangirugikayo ti panagadal iti Biblia, padasenyo nga usaren ti maysa kadagitoy direkta a pamay-an:

“Ammoyo kadi nga iti sumagmamano laeng a minuto, maammuanyo ti sungbat ti maysa a napateg a Biblikal a saludsod? Kas pagarigan, . . .” Kalpasanna, iyimtuodyo ti saludsod nga agparang iti rugi ti maysa kadagiti leksion iti broshur a Kalikaguman ken ammoyo a makapainteres iti indibidual.

“Simmarungkarak tapno ipakitak kenka ti libre a programami a panagadal iti Biblia. Maidemostra daytoy iti lima a minuto. Maiwayaam kadi iti lima a minuto?” No ti sungbat ket wen, usarenyo ti leksion 1 iti broshur a Kalikaguman a mangidemostra iti panagadal, a basaenyo ti napili a maysa wenno dua laeng a kasuratan. Kalpasanna, iyimtuodyo: “Kaano a maiwayaam ti 15 a minuto tapno mapagsaritaanta ti sumaganad a leksion?”

“Adu a tao ti addaan iti Biblia, ngem saanda nga ammo a dayta ti makasungbat kadagiti napateg a saludsod nga im-imtuodentayo amin maipapan iti masanguanan. No usarenyo daytoy a katulongan iti panagadal [ti broshur a Kalikaguman wenno ti libro a Pannakaammo] iti maysa nga oras kada lawas, maaddaankayo iti pamunganayan a pannakaawat maipapan iti Biblia iti sumagmamano laeng a bulan. Pakaragsakak nga ipakita kenka no kasano a maaramid ti panagadal.”

“Simmarungkarak ta kayatko nga itukon kenka ti libre a panagadal iti Biblia ditoy pagtaenganyo. No ipalubosmo, kayatko nga ipakita iti sumagmamano laeng a minuto no kasano a dagiti tattao iti agarup 200 a pagilian ket ad-adalenda ti Biblia iti pagtaenganda kas pamilia. Mabalinta a pagsaritaan ti aniaman kadagitoy a topiko. [Ipakitayo dagiti linaon ti libro a Pannakaammo.] Ania ti nangruna a paginteresam?” Urayenyo a makapili ti bumalay. Ukagenyo iti kapitulo a napilina, ket irugiyo ti panagadal iti umuna a parapo.

“Mangisursuroak iti Biblia a diak agpabpabayad ket addaanak pay iti tiempo agpaay kadagiti kanayonan nga agpayadal. Daytoy a katulongan iti panagadal iti Biblia ti us-usarenmi. [Ipakitayo ti libro a Pannakaammo.] Sumagmamano laeng a bulan ti kurso ken masungbatanna dagiti saludsod a kas iti: Apay nga ipalubos ti Dios ti panagsagaba? Apay a lumakay ken mataytayo? Ania ti kasasaad dagiti ing-ingungotentayo a pimmusay? Ken kasanotayo a makaadani iti Dios? Mabalin kadi nga idemostrak ti maysa a leksion?”

No nakasarakkayo iti epektibo a presentasion a makatukay iti interes, itultuloyyo nga usaren dayta! Ibagayyo laeng dayta iti tukon a literatura iti agdama a bulan.