Agpannuray ken Jehova a Mangpadakkel Kadagiti Bambanag
1 “Iti kaunaan a gundaway nasagrapko ti naisangsangayan a rag-o ti pannakitinnulong a mangipasdek iti baro a kongregasion. Nagpaut daytoy iti nasurok a dua a tawen a naanep a panagtrabaho, naynay a panagkarkararag ken panagpannuray ken Jehova a ‘mangpadakkel kadagiti bambanag.’” Kasta ti insurat ti napasnek a payunir a nakasursuro iti kinapateg ti panagpannuray ken Jehova maipaay iti irarang-ay. (1 Cor. 3:5-9) Iti panagbiroktay kadagiti tattao nga agduyos iti naespirituan, kasapulantay met ti tulong ti Dios tapno agbunga ti ministeriotayo.—Prov. 3:5, 6.
2 Kasapulan ti Panangsukay Tapno Rumang-ay: Masapul a masukay ti bukel ti kinapudno tapno dumakkel. Masansan a nasayaat ti ibunga ti panagsarungkar kalpasan ti maysa wenno dua nga aldaw manipud iti damo nga ibibisita. Agbalinkay a nabara ken mannakigayyem. Pagbalinenyo a natalged ti rikna ti sabali a tao. Diyo bukbukodan ti agsao. Iyam-ammoyo ti bagiyo kenkuana, ket ipakitayo a maseknankayo kenkuana kas indibidual.
3 Kabayatan ti Agosto, itultuloytay nga itukon ti nadumaduma a broshur kadagiti tattao a makasaritatayo. Nupay kasta, masapul met a surnadantayo ti masarakan nga interes ken dagiti maipaima. Maaramidtay daytoy babaen ti panagsarungkar ken panangitukon iti panagadal iti Biblia. (Mat. 28:19, 20) Iti daytoy a panggep, mabalin a maaramat ti broshur a Kalikaguman a pangirugi kadagiti panagadal. Mabalin a makatulong dagiti sumaganad nga uppat a singasing.
4 No adda nakasaritayo a maseknan kadagiti dumakdakes a kasasaad ti lubong, mabalinyo a parayrayen daydi panagsaritayo babaen ti panangibagayo iti kastoy:
◼ “Panagkunak maseknankay met a kas kaniak iti panagpababa ti moralidad ti natauan a kagimongan. Makangngegtayo kadagiti makapadukot a damdamag maipapan iti kinaranggas iti uneg ti pagtaengan, nga agresulta iti pannakaabuso dagiti ubbing, nagannak, ken assawa. Ket agparang nga adu ti agulbod wenno agtakaw tapno mapennekda laeng ti bukodda a tarigagay. Panagkunayo maseknan ngata ti Dios iti wagas ti panagbiag dagiti tattao? [Palubosanyo a sumungbat.] Nangipasdek ti Dios kadagiti pagalagadan a suroten ti tao, ket talaga a saan a makapadagsen dagitoy kadatayo.” Basaenyo ti 1 Juan 5:3. Kalpasanna ipakitayo ti broshur a Kalikaguman, ket ukagenyo iti leksion 10. Basaenyo ti umuna a parapo. Ipakitayo dagiti italiko a sasao iti pangrugian dagiti parapo 2-6, sa pagsaludsodanyo ti bumalay no ania kadagita nga aramid ti pagarupenna a kadadaksan iti kagimongan. Basaenyo ti nainaig a parapo ket sukimatenyo ti maysa wenno dua a kasuratan no ipalubos ti gundaway. Ingudoyo babaen ti panangbasa iti parapo 7, kalpasanna iyurnosyo ti panagsubli para iti ad-adu pay a panagsasarita.
5 Kadagidiay nakasabaanyo a maseknan iti pamiliada, mabalinyo nga ibaga ti kastoy:
◼ “Panagkunayo nainkalintegan kadi a namnamaen nga ipaayannatayo ti Namarsua kadagiti alikamen a kasapulantayo tapno makaibangon iti naballigi a biag ti pamilia?” Palubosanyo a sumungbat. Ipakitayo ti broshur a Kalikaguman, iturongyo iti leksion 8, ken ilawlawagyo a naglaon dayta kadagiti prinsipio manipud iti Biblia agpaay iti kada miembro ti pamilia. Ibagayo a kayatyo nga idemostra no kasano nga usaren ti broshur ken ti Biblia tapno ad-adda a magunggonaan iti dayta. Surotenyo dagiti instruksion a masarakan iti panid 2 ti broshur. Iyurnosyo ti panagsubli tapno ituloyyo nga adalen dayta a leksion, wenno no maileppasyo, adalenyo ti sabali pay a leksion iti broshur a pilien ti bumalay.
6 Adtoy ti direkta a pamay-an a mabalinyo nga usaren a mangitukon iti programa a panagadaltayo iti Biblia. Ipakitayo ti broshur a “Kalikaguman,” sa kunaenyo:
◼ “Naglaon daytoy a broshur iti kompleto a kurso ti panagadal, a mangsaklaw kadagiti kangrunaan a pannursuro ti Biblia. Iti kada panid, masarakanyo ti sungbat kadagiti saludsod a pakaburiboran dagiti tattao iti adun a siglo. Kas pagarigan, Ania ti Panggep ti Dios iti daga?” Iturongyo iti leksion 5, sa basaenyo dagiti saludsod iti pangrugian ti leksion. Saludsoden iti bumalay no ania kadagita ti kangrunaan a paginteresanna, sa kalpasanna basaenyo dagiti katupagda a parapo, a sukimatenyo dagiti maitutop a kasuratan. Ilawlawag a mabalin a maammuan ti makapnek a sungbat kadagiti sabsabali pay a saludsod a kas met laeng iti kinalaka ti panangusigtay iti dayta a saludsod. Isingasingyo nga agsublikayto tapno pagsaritaanyo ti sabali pay a saludsod ken sungbat.
7 Wenno nalabit kayatyo a padasen ti napasimple a wagas a panangirugi iti panagadal iti Biblia babaen ti panangibagayo:
◼ “Ammoyo kadi nga iti sumagmamano laeng a minuto, maammuanyo ti sungbat ti maysa a napateg a saludsod iti Biblia? Kas pagarigan, . . .” Kalpasanna mangdakamat iti saludsod nga adda iti pangrugian ti maysa kadagiti leksion iti broshur, daydiay mapanunotyo a pakaguyugoyan ti indibidual. Para iti sumagmamano nga ideya kadagiti saludsod a mabalinyo nga usaren, kitaenyo ti parapo 15 ken 16 iti suplemento ti Marso 1997 a Ministeriotayo iti Pagarian, a napauluan: “Maaddaan iti Tured a Sumarungkar.”
8 Ti sirarag-o a panangsangotayo iti karit iti panagsarungkar ken panangyadal iti Biblia ket paset ti panagbalintayo a “katrabahuan” ti Dios. (1 Cor. 3:9) Bayat nga ikagumaantay a sukayen ti interes a masarakantayo sa agpannuraytay ken Jehova a mangpadakkel kadagiti bambanag, masagraptay ti pudpudno a pannakapnek a di maipaay ti aniaman a trabaho.