Repaso iti Teokratiko nga Eskuelaan ti Panagministro
Oral a mausig dagiti sumaganad a saludsod iti Teokratiko nga Eskuelaan ti Panagministro iti lawas a mangrugi iti Disiembre 26, 2005. Mangikondukta ti manangaywan iti eskuelaan iti 30-minuto a repaso a naibatay iti material a saklawen dagiti paset para iti lawas ti Nobiembre 7 agingga iti Disiembre 26, 2005. [Palagip: No awan dagiti reperensia kalpasan ti saludsod, dakayo a mismo ti agsukimat a mangbirok kadagiti sungbat.—Kitaenyo ti Eskuelaan ti Panagministro, p. 36-7.]
DAGITI KUALIDAD TI PANAGPALAWAG
1. Ania ti mabalintayo nga aramiden tapno masigurado a ti balakadtayo ket ‘naibatay iti ayat’? (Flm. 9) [be p. 266]
2. Kadagiti ania a pamay-an a ‘mamagbagatayo babaen iti sursuro a makapasalun-at’? (Tito 1:9) [be p. 267 par. 1-2]
3. Apay a napateg a pagbalinentayo a makapabileg ti palawagtayo, ken kasano a maaramidtayo daytoy? [be p. 268 par. 1-3, kahon]
4. Kas panangtulad ken ni Moises, kasano a makapakired ti panangtulongtayo iti sabsabali a manglagip kadagiti inaramid ni Jehova agpaay kadagiti adipenna? (Deut. 3:28; 31:1-8) [be p. 268 par. 5–p. 269 par. 2]
5. Apay a ti naragsak a panangisarsarita iti ar-aramiden ni Jehova ita ken iti aramidennanto pay iti masanguanan ket makaparegta kadagiti agdengdengngeg kadatayo? [be p. 270-1]
PASET NUM. 1
6. Ania ti Septuagint, ken apay a paginteresan dayta dagiti Kristiano? [si p. 307 par. 12–p. 310 par. 14]
7. Siasino dagiti Masorete, ket ania ti dakkel a naitulongda iti pannakaipatarus ti Biblia? [si p. 310 par. 18; p. 311 par. 20-1]
8. Ania ti nakaibatayan ti kangrunaan a teksto para iti Hebreo a paset ti Baro a Lubong a Patarus iti Ingles, ken apay a maikunatayo a daytoy a patarus ket naturay ken mapagtalkan? [si p. 312 par. 28, 30]
9. Kasano nga impakita dagiti nagkauna a Kristiano ti napasnek a tarigagayda a mangipablaak iti Sao ti Dios? [si p. 315 par. 1-5]
10. Ania ti ipalgak ti panangadal kadagiti adda a manuskrito ken teksto ti Nasantuan a Kasuratan maipapan iti Biblia? [si p. 320 par. 32]
LINAWAS A PANAGBASA ITI BIBLIA
11. Ti kadi saan a pannakaipalubos ni David a mangibangon iti templo ipasimudaagna a saan nga inanamongan ni Jehova dagiti gubat nga indauluan ni David? (1 Cron. 22:6-10)
12. Iti kararagna idi naidedikar ti templo, kasano a binigbig ni Solomon a saan laeng nga ipaay ni Jehova dagiti kasapulan dagiti adipenna kas grupo no di ket ammona met ti partikular a situasion ti tunggal indibidual nga agbuteng kenkuana? (2 Cron. 6:29, 30)
13. Ania dagiti “sukog-kalding a sairo” a nadakamat iti 2 Cronicas 11:15?
14. Yantangay nangrugi ti turay ni Baasa idi “maikatlo a tawen ni Asa” ken nagpaut laeng iti 24 a tawen, kasanotay a maitunos ti iyaay ni Baasa “maibusor iti Juda” idi “maikatallopulo ket innem a tawen ti panagturay ni Asa”? (1 Ar. 15:33; 2 Cron. 16:1)
15. Kasano a silalawag nga iyilustrar ti 2 Cronicas 20:22, 23 ti mapasamak iti lubong ni Satanas iti saanen a mabayag?