Epektibo a Pammagbaga

DAGITI Kristiano a panglakayen masapul a kabaelanda ti “mamagbaga babaen ti sursuro a makapasalun-at.” (Tito 1:9) No dadduma, masapul nga aramidenda daytoy iti sango dagiti narikut unay a kasasaad. Nasken a mangbalakadda a maitunos kadagiti Nainkasuratan a prinsipio. Gapuna, masapul nga ipangag dagiti panglakayen daytoy a balakad: “Itultuloymo nga igaed ti bagim . . . iti panangbagbaga.” (1 Tim. 4:13) Nupay ti masalsalaysay ditoy ket naiturong a nangnangruna kadagiti panglakayen wenno kadagidiay agtarigagay a mangragpat iti dayta a pribilehio, adda dagiti tiempo a masapul a bagbagaan dagiti nagannak ti annakda wenno nasken a bagbagaan dagidiay mangyad-adal iti Biblia dagiti iyad-adalanda. Kadagita a kasasaad, agaplikar dagiti isu met laeng a prinsipio.

Dagiti Kasasaad a Pakasapulan iti Pammagbaga. Tapno maikeddengtayo no kaano a kasapulan ti pammagbaga, makatulong no usigentayo dagiti kasasaad a nakaitedan ti pammagbaga kas nailanad iti Biblia. Binagbagaan ni apostol Pedro dagiti panglakayen nga asikasuenda ti responsabilidadda kas papastor ti arban ti Dios. (1 Ped. 5:1, 2) Binalakadan ni Pablo ni Tito a bagbagaanna dagiti ub-ubing a lallaki a “nasimbengda koma iti panunot.” (Tito 2:6) Indagadag ni Pablo kadagiti padana a Kristiano nga ‘agsaoda a sangsangkatunos’ ket liklikanda dagidiay mamagsisina kadagiti kakabsat. (1 Cor. 1:10; Roma 16:17; Fil. 4:2) Nupay kinomendaran ni Pablo dagiti kameng ti kongregasion idiay Tesalonica gapu kadagiti nasayaat a maar-aramidanda, binagbagaanna ida nga ipaspasnekda pay nga iyaplikar iti biagda dagiti nasursuroda. (1 Tes. 4:1, 10) Indawat ni Pedro kadagiti padana a Kristiano nga “itultuloy[da] ti umadayo kadagiti nainlasagan a tarigagay.” (1 Ped. 2:11) Binagbagaan ni Judas dagiti kakabsatna a “makidangadang[da] a sipipinget maipaay iti pammati” gapu iti impluensia dagiti di nadiosan a tattao a naigamer iti nalulok a kababalin. (Jud. 3, 4) Naidagadag kadagiti amin a Kristiano a bagbagaanda ti tunggal maysa tapno awan ti agbalin a nasukir babaen ti makaallilaw a pannakabalin ti basol. (Heb. 3:13) Binagbagaan ni Pedro dagiti Judio a di pay namati ken Kristo: “Maisalakankayo iti daytoy nakillo a kaputotan.”​—Ara. 2:40.

Ania dagiti kualidad a kasapulan tapno makaipaaytayo iti epektibo a pammagbaga kadagiti kasta a kasasaad? Kasano a daydiay mamagbaga maipariknana ti kinaganetget ti balakadna iti wagas a saan a nasabrak wenno nagubsang?

“Maibatay iti Ayat.” No ti pammagbagatayo ket saan a “maibatay iti ayat,” mabalin a nainget ti panagsaadna iti agdengdengngeg. (Flm. 9) Pudno a no kasapulan ti madagdagus a panagtignay, ti panagsao ti agpalawag masapul nga ipariknana ti kinaganetget ti kasasaad. Mabalin a kasla agpadpadispensar no naalumamay ti panagsaona. Kasta met, napasnek koma ken nabuyogan iti pannakipagrikna ti pammagbagana. Ti naayat a pammagbaga ket ad-adda a makagutugot kadagiti agdengdengngeg. Maipapan kenkuana ken kadagiti kakaduana, kinuna ni Pablo kadagiti taga Tesalonica: “Pagaammoyo unay no kasano, kas iti aramiden ti maysa nga ama iti annakna, a nagtultuloy a binagbagaanmi ti tunggal maysa kadakayo.” (1 Tes. 2:11) Nabuyogan iti ayat ti panagpakaasi dagita a Kristiano a manangaywan kadagiti kakabsat. Aggubuay koma dagiti ibagam iti napaypayso a pannakaseknan kadagiti agdengdengngeg kenka.

Agbalinka a nataktika. Dimo ruroden dagidiay ikagkagumaam a tignayen. Ngem dika bumdeng a mangibaga kadagiti agdengdengngeg iti “isuamin a pammatigmaan ti Dios.” (Ara. 20:27) Saan a masair wenno gumura kenka dagiti managyaman gapu iti naayat a panangidagadagmo kadakuada nga agaramid iti umiso.​—Sal. 141:5.

Sakbay a mamagbagaka, kaaduanna nasaysayaat no mangtedka iti espesipiko ken napasnek a komendasion. Panunotem dagiti nasayaat a magapgapuanan dagiti kakabsatmo​—bambanag a sigurado a pakaay-ayuan ni Jehova: ti pammati a maiparangarang iti trabahoda, ti ayat a mangtignay kadakuada a mangaramid iti amin a kabaelanda, ken ti panagibturda iti laksid dagiti narigat a kasasaad. (1 Tes. 1:2-8; 2 Tes. 1:3-5) Daytoy ti mangiparikna kadagiti kakabsatmo nga ipatpateg ken maawatam ida, ket tumulong dayta kadakuada a madadaan a mangipangag iti pammagbaga nga isarunom.

“Buyogen ti Isuamin a Mabayag a Panagitured.” Maited koma ti pammagbaga a “buyogen ti isuamin a mabayag a panagitured.” (2 Tim. 4:2) Ania ti ramanen daytoy? Ramanen ti mabayag a panagitured ti naanus a panangibtur iti di umiso wenno makaparurod a kasasaad. Ti tao a mabayag ti panagituredna ket mangnamnama a dagiti agdengdengngeg kenkuana aramidendanto ti ibagbagana. No nabuyogan ti pammagbagam iti kasta nga espiritu, saan a panunoten dagiti agdengdengngeg kenka a nagdakes ti pangipagarupam kadakuada. Magutugot dagiti kakabsatmo nga agaramid iti umiso no agtalekka a kayatda ti agserbi ken Jehova iti amin a kabaelanda.​—Heb. 6:9.

“Babaen iti Sursuro a Makapasalun-at.” Kasano a mabalinan ti maysa a panglakayen ti “mamagbaga babaen iti sursuro a makapasalun-at”? Babaen ti ‘ikakapetda a sititibker iti matalek a sao no maipapan iti arte ti panangisuro.’ (Tito 1:9) Imbes nga ibagam ti personal nga opinionmo, usarem a panggutugot ti Sao ti Dios. Ti Biblia koma ti tumulong kenka a mangpanunot no ania ti masapul nga ibagam. Ilistam dagiti pagimbagan ti panangyaplikar iti ibagbaga ti Biblia maipapan iti banag a pakaseknam. Panunotem a naimbag dagiti pagdaksan​—agpadpada iti agdama ken iti masanguanan​—​ti di panagbiag a mayannurot iti Sao ti Dios, ket usarem dagitoy a mangkombinsir kadagiti agdengdengngeg iti kinapateg ti panangaramid iti umiso.

Siguraduem a nabatad nga ilawlawagmo kadagiti agdengdengngeg no ania ti rumbeng nga aramidenda ken no kasanoda nga aramiden dayta. Ibatadmo a ti ibagbagam ket sititibker a naibatay iti Kasuratan. No ikkannatayo ti Kasuratan iti wayawaya nga agdesision maipapan iti maysa a banag, ipakitam no ania ti pagpatinggaan dayta a wayawaya. Kalpasanna, iti konklusionmo, mangtedka iti maudi a pammagbaga a mangpabileg iti determinasion dagiti agdengdengngeg nga agtignay.

Buyogen ti “Wayawaya nga Agsao.” Tapno epektibo a mabagbagaanna dagiti dadduma, masapul a ti maysa ket addaan “wayawaya nga agsao iti pammati.” (1 Tim. 3:13) Ania ti tumulong kenkuana nga agsao a siwayawaya? No ti ‘nasayaat nga ar-aramidna’ ket pudno a maitunos iti idagdagadagna nga aramiden dagiti kakabsatna. (Tito 2:6, 7; 1 Ped. 5:3) Iti kasta, dagidiay mabalbalakadan nga agtignay mabigbigda a daydiay mamagbaga kadakuada ket dina namnamaen nga aramidenda daydiay dina ar-aramiden a mismo. Makitada a mabalinda a tuladen ti pammatina no kasano nga ikagkagumaanna met a tuladen ni Kristo.​—1 Cor. 11:1; Fil. 3:17.

Adu ti naimbag a maaramidan ti pammagbaga a naibasar iti Sao ti Dios ken nabuyogan iti ayat. Dagidiay addaan iti rebbengen a mangipaay iti kasta a pammagbaga saysayaatenda koma nga aramiden dayta.​—Roma 12:8.