Naguguran ken Naregta kadagiti Naimbag nga Ar-aramid
‘Ni Jesu-Kristo inyawatna ti bagina tapno gugurannatayo a maipaay kenkuana met laeng ti maysa nga ili a kukuana, a naregta kadagiti naimbag nga ar-aramid.’—TITO 2:13, 14.
1. Apay a masapul a naregta dagiti saksi ken agbalinda a nadalus?
NI Jehova nasantuan, naimbag ken nalinteg. Isu ken ti Anakna ibanagda met ti nakatantan-ok a trabaho a buyogen iti kinalinteg. (Levitico 19:2; Salmo 25:8; Juan 5:17) Gapuna, amin dagiti saksi ni Jehova masapul a naguguran ken naregta a maipaay kadagiti naimbag nga ar-aramid.
2. (a) Kasano nga innaig ni apostol Pablo ti kinadalus iti kinaregta? (b) Aniada a salsaludsod ti usigentayo itan?
2 Ni apostol Pablo dinakamatna agpada ti kinadalus ken regta idi insuratna a babaen iti di-kaikarian a kinamanangngaasi ti Dios ni Jesus “inyawatna ti bagina gapu kadatayo tapno isalakannatayo iti amin a kinadakes ken manggugor a maipaay kenkuana met laeng ti maysa nga ili a kukuana, a naregta kadagiti naimbag nga ar-aramid.” (Tito 2:11-14) Ania ti kasapulan kadagidiay a ginuguran ni Jesus? Maipaay iti ania a naimbag nga ar-aramid ti masapul a pagregtaantayo? Ken aniada a bendision ti tagiragsaken dagiti naguguran ken naregta a saksi ni Jehova?
Nasken a Naespirituan a Kinadalus
3. (a) Aniada a pagalagadan iti kinadalus ti masapul a taginayonen dagiti ad-adipen ni Jehova? (b) Kasano a ti pannakasapul iti kinadalus naipaganetget idi a dagiti kayaw a Judio nawayawayaanda manipud Babilonia?
3 Dagiti ad-adipen ni Jehova masapul a taginayonenda ti nangato a pagalagadan iti pisikal, moral ken naespirituan a kinadalus. (Exodo 30:17-21; Deuteronomio 23:12-14; Efeso 5:25-27; 2 Corinto 7:1) Daytoy a kangrunaan a punto ti maipaganetget idi maikanem a siglo K.K.P., idi a dagiti kayaw a Judio nawayawayaanda manipud Babilonia. (Esdras 1:1-4) Din agbayag agturongdan iti ilida, a siraragsak nga awitda dagiti nasantuan nga al-alikamen nga innala ni Ari Nabucodonosor manipud iti templo ti Dios idiay Jerusalem. Anian a nasken a dagidiay nga alikamen iti santuario ti awiten laeng dagiti nadalus a managdaydayaw ni Jehova! Mainugot, ngarud, a naibaga kadakuada: “Pumanawkayo, pumanawkayo, rummuarkayo sadiay, dikayo mangsagid iti aniaman a banag a di nadalus; pumanawkayo iti tengngana; dalusanyo ti bagiyo dakayo nga agawit kadagiti al-alikamen ni Jehova.” (Isaias 52:11) Dagidiay a nangawit ti masapul nga agdalus kadagiti amin a pannakamulit manipud iti relihiuso a Babilonia ken ti moral a kinarugit.
4. Maitunos iti 2 Corinto 6:14-17, ania ti kasapulan kadagiti amin a saksi ni Jehova?
4 Ni apostol Pablo inyaplikarna dayta a kalikagum a maipaay iti kinadalus kadagiti napulotan a Kristiano a nangpanaw iti Dakkel a Babilonia, ti sangalubongan nga imperio iti ulbod a relihion. Isut’ nagsurat: “Saankay a makikadua iti sangol kadagiti saan a manamati. Ta ania ti pakikaduaan ti kinalinteg iti kinakillo? . . . ‘Gapuna pumanawkayo iti nagtetengngaanda, ket suminakayo,’ kuna ni Jehova, ‘ket saanyo a sagiden ti aniaman a di nadalus.’” (2 Corinto 6:14-17; Apocalipsis 18:4, 5; Jeremias 51:45) Kinapudnona, sapulen ni Jehova ti naespirituan a kinadalus dagiti napulotan a paspasurot ni Jesus ken dagiti kakaduada, ti “dakkel a bunggoy.”—Apocalipsis 7:4-9.
“Guraenyo ti Kinadakes ken dagiti Nailubongan a Tarigagay”
5. Sigun iti 2 Corinto 4:2, ania koma ti pudno iti ministeriotayo?
5 Mairaman kadagiti dadduma a bambanag, dagidiay nga agserserbi kas naespirituan a nadalus a saksi ni Jehova makalikagumanda a “manggura iti kinadakes ken dagiti nailubongan a tarigagay.” (Tito 2:11, 12) Kas kinuna ni apostol Pablo kadagiti dadduma: “No di ket nagpanawanmi dagiti nailemlemmeng a nakababain, a dikam agsiksikap ken saanmi a kiluen ti sao ti Dios, no di ket, iti panangiparangarang iti pudno, italekmi ti bagbagimi iti konsiensia dagiti amin a tattao, iti imatang ti Dios.” (2 Corinto 4:2) Kas ti apostol, dagiti agdama-aldaw a Kristiano masapul a paneknekanda ti bagbagida nga awan mulitna iti ministerioda, nga awan ti aniaman a pangpabasolan ti kinadakes wenno ti pannakaisiasi iti pannakilangenda. (2 Corinto 8:20, 21; Salmo 101:1-8) Masapul a saanda a maiwanwan babaen iti nailubongan a kinasirib ken kinaagum, managbasol nga espiritu, wenno pakatignayan a puersa.—1 Corinto 1:21; 2:12; 3:19; Efeso 2:1, 2.
6. Ania ti mabalin a maaramidan no makidangdangadangtayo a maibusor kadagiti pagannasayan a maisiasi ken di umiso a nainlasagan a tarigagay?
6 Tapno magun-odan ti panggepda, dagiti tattao nga addaan iti nailubongan nga espiritu masansan nga agturongda kadagiti mangisiasi a pamay-an. Ngem no ti maysa nga agkunkuna a Kristiano aramidenna daytoy, saanna a ‘gurguraen ti kinadakes’ ken tagtagiragsaken ti kinasinged ken Jehova. (Proverbio 3:31, 32) Ket no ti maysa a tao ti ringringbawan ti narugit a nainlasagan a tartarigagay, isu saanna a ‘gurguraen dagiti nailubongan a tarigagay.’ (Galacia 5:19-21; 1 Juan 2:15-17) Ngem ania ngay no ikagkagumaantayo ti makidangadang a maibusor kadagiti kakasta a saan a naespirituan a pagannayasan a mangisiasi ken dagiti di umiso a nainlasagan a tarigagay? Ngarud mainugot ti agkararag a kas ken David, isu a nagkuna: “Parsuaem kaniak ti nadalus a puso, O Dios, ket pabaruem ti maysa a nalinteg nga espiritu ditoy unegko. Dinak pagtalawen ita saklangmo; ket dika ikkaten kaniak ti nasantuan nga espiritum.” (Salmo 51:10, 11; Juan 15:19) No agkararagtayo iti kasta a pamay-an ket gundawayantayo a naan-anay ti tulong a magun-odan babaen iti Sao ti Dios, espirituna ken organisasionna, mabaelantayto a korehiren ti pampanunottayo ket mabaelantayo ti agserbi a simamatalek kas nadalus a managdaydayaw ni Jehova.
7. Apay a masapul a dagiti awanan panagbabawi a nakabasol mailaksidda?
7 No dadduma kadatayo ti awanan panagbabawi a mangitultuloy iti dakes unay a saan a nadalus a dalan, dagitoy ti masapul a mailaksid tapno ti nagan ni Jehova saan a malais, ket ti organisasionna ti mapagtalinaed a nadalus ken dagiti matalek nga ad-adipenna masalaknibanda ken maipaganetget kadakuada ti kinakaro ti panagbasolna. (Levitico 22:31-33; Deuteronomio 13:6-11) Adu a tawtawenen a napalabas, dagiti tattao ti Dios nabigbigda a ti awanan panagbabawi a nagbasol saanen a maikari iti pannakikaduada kenkuana. Kas pangarigan, idi 1904 ti umuna a presidente ti Watch Tower Society, ni Charles Taze Russell, nagsurat: “Ti Iglesia saanen a makilangen kenkuana ken maikkat ti aniaman ken amin a pakailasinan wenno pakaiparangarangan iti panagkakabsat.” (The New Creation, pinanid 290) Ita, met, dagiti tattao ni Jehova surotenda ti Nainkasuratan a balakad a “mangikkat iti dakes a tao” iti nagtetengngaanda.—1 Corinto 5:9-13.
8. Ania ti pakainaigan ti Lucas 3:8 ken Galacia 6:1 iti no kaaano ti pannakilangen dagiti panglakayen kadagiti nakabasol?
8 Ti panamagtalinaed iti organisasion ni Jehova a nadalus ket maysa a banag a dakkel a pakaseknan dagiti natudingan a panglakayen. Siempre, masapul a naasida no adda dagiti ‘bungbunga a maikari iti panagbabawi,’ a kas ni Jehova mangipaay iti asi no umiso daytoy. (Lucas 3:8; Salmo 86:15; 130:3, 4) Ket no ti padada a manamati agbiddut kasanguanan a mabigbigna dayta, dagidiay nga addaan ti naespirituan a kualipikasion padasenda ti mangbagbaga kenkuana “iti espiritu iti kinatakneng.”—Galacia 6:1.
Kasano a Makatulong dagiti Panglakayen
9. Aniada dagiti dua a pamay-an a dagiti panglakayen mabalin a tulonganda dagiti dadduma a Kristiano iti naespirituan?
9 Kasano a dagiti manangaywan matulonganda dagiti dadduma a Kristiano nga agtalinaed a nadalus iti naespirituan? Ti maysa a pamay-an isu ti panangipaay kadagiti makapabileg a diskurso. Ti sabali isu ti personal a pannakisarita ken panagsarungkar. (1 Pedro 5:1-4) Kadagiti kakasta a tiempo, siuumiso a dagiti panglakayen usarenda ti Biblia a mangisuro, mamagbaga, mamalakad ken uray pay mangtinggar kadagiti padada a manamati.
10. (a) Ania koma ti kababalin dagiti panglakayen maipapan iti panagsarita iti publiko? (b) Apay a napasnek koma nga estudiante iti Biblia dagiti naespirituan a papastor?
10 Ti pannakasapul ti panangisuro ti naipaganetget idi a ni Pablo pinaregtana ti kaduana a trabahador a ni Tito a “mangitultuloy nga agsao kadagiti bambanag a maipaay kadagiti nasayaat a sursuro.” (Tito 2:1) Ti napakumbaba a Kristiano a panglakayen saanna a sapsapulen ti dayaw a kas kadagiti managpalawag iti publiko no di ket sigagagar a mangusar iti Biblia a siuumiso iti panangisuro. (Proverbio 25:27) Makapainteres, iti naminsan ti presidente iti E.U. a ni John Quincy Adams kinunana: “Inaramidkon bayat dagiti adun a tawtawen nga ugali ti mangbasa nga interamente iti Biblia iti maminsan iti makatawen.” Tunggal ari iti Israel masapul a mangaramid iti kopia iti linteg ti Dios ket “basaenna dayta iti isuamin nga al-aldaw iti panagbiagna.” Sinurot ni Josue dayta met laeng a bilin. (Deuteronomio 17:14-20; Josue 1:7, 8) No awan ti pannakaammo a kasapulan, kasano koma ngarud a dagiti lallaki iti Israel idi ugma nakapagtignayda a sisisirib wenno nakatulong kadagiti dadduma iti naespirituan? Gapuna no dakayo ket natudingan a maysa a panglakayen, nabasayo kadin ti intero a Biblia, nalabit iti namin-adun a daras? Di pagduaduaan a daytoy parang-ayenna ti abilidadyo a mangbalakad kadagiti sabsabali, agraman dagiti dedikado a Kristiano a mabalin a nakabasan nga interamente iti Kasuratan a masansan. Dagidiay nga agserbi kas naespirituan a papastor masapul a napasnekda nga estudiante iti Sao ti Dios, ti pakaibatayan iti “nasalun-at a sursuro.”
11. (a) Ania a Nainkasuratan a balbalakad ti kasapulan idi dagiti immuna a Kristiano idiay Creta? (b) No maipapan kadagiti bilbilin iti Biblia, ania koma ti kualipikado nga aramiden dagiti natudingan a panglakayen?
11 Imbaga met ni Pablo ken Tito: “Itultuloymo nga ipalagip kadakuada a paiturayanda koma kadagiti agtuturay ken dagiti mannakabalin, agtulnogda ket sisisiglatda iti isuamin nga aramid a naimbag, a dida agsao iti dakes a maipapan iti uray siasino, saanda a mannakiringgor, naimbag koma ti awidda, nga ipakitada ti amin a kinaemma kadagiti isuamin a tattao.” (Tito 3:1, 2) Dagidiay nga espesipiko a bilbilin (reminders) ti kasapulan dagiti immuna-siglo a Kristiano iti isla ti Creta. Kasta met, no tumaud ti parikut ita, dagiti panglakayen masapul a kabaelanda ti mangitudo iti umiso a Nainkasuratan a bilbilin (reminders). Ket kanayon koma nga agyamantayo no maipalagip dagiti bilbilin (reminders) ni Jehova kadatayo.—Salmo 119:99, 129.
12. (a) Ania ti kaipapanan iti panangbalakad? (b) Iti ania koma a kababalin a maipaay iti panangbalakad?
12 Naibaga met ken Tito: “Balakadam met dagiti agtutubo a lallaki tapno managparbengda.” (Tito 2:6) Ti panangbalakad kaipapananna “ti panangparegta a sibibileg; panangbalakad wenno panangpakdaar a sigaganetget.” (The World Book Dictionary) Gapu iti napudno nga ayat ken pannakaseknan, saan nga inkedked ni Pablo ti kasapulan a panangbalakad. Kinapudnona, nabalinanna a kunaen kadagiti panglakayen iti Efeso: “Gapuna agsalukagkayo, a laglagipenyo nga iti bayat iti tallo a tawen, saanak a nagsardeng a namagbaga [namalbalakad] iti tunggal maysa iti rabii ken aldaw, a binuyogan dagiti lulua.” (Aramid 20:31; idilig iti The Riverside New Testament.) Dagiti agdama-aldaw a panglakayen a mangiparangarang iti isu met laeng a kababalin, ken mangipaay iti umiso a pammalakad wenno pammagbaga, ti pudno a bendision iti kongregasion!
13. (a) Ti panangbabalaw isu ti panangaramid iti ania? (b) Iti ania a kababalin a masapul nga ipaay dagiti panglakayen ti panangbabalaw?
13 Dinakamat met ni Pablo ti panangtubngar, a pinaregtana ni Tito: “Gapuna babalawem ida iti napinget, tapno nasalun-atda iti pammati, a dida ipangag dagiti parparbo a sarita dagiti Judio ken dagiti bilbilin dagiti tattao ket sumiasida iti pudno.” (Tito 1:13, 14) Ti panangbabalaw isu “ti panangipalagip iti di panangikankano iti [gagangay] a buyogen iti naasi a panggep a mangkorehir wenno mangtulong,” wenno “ti panangiyebkas iti di-pananganamong ti” maysa a tao gapu kadagiti sasao wenno ar-aramidna. (Webster’s New Collegiate Dictionary) Ni Pablo sinaritana ti panangbabalaw, ngem addaan iti natan-ok a panggep—“tapno agbalinda a nasalun-at iti pammati.” Kasta met ita, dagiti panglakayen liklikanda ti saan a Nakristianuan a kinauyong. Saan a kas kadagiti managreklamo nga apostata, ti pudno a Kristiano a panglakayen saanna a padasen ti agbalin nga “appo” kadagiti pammati ken biag dagiti dadduma a manamati no di ket agserbi a kas mananaywan ken kadua a trabahador a maipaay iti pagrag-oanda, a tumulong kadakuada a mangsalimetmet a sititibker iti pammatida.—2 Corinto 1:24; 1 Corinto 4:1, 2.
14. Ania ti mangtulong kadatayo nga agtalinaed a nadalus iti naespirituan?
14 Ti panangipangag kadagiti sursuro iti Biblia, bilbilin (reminders), pammalakad ken panangbabalaw tulongannatayonto nga agtalinaed iti naespirituan a kinadalus. Daytoy ti mamagbalin kadatayo a mainugot a maipaay iti sagrado a panagserbi iti Dios. Ngem iti ania nga espiritu a masapul nga aramidentayo dayta a panagserbi?
Maaddaan iti ‘Kinaregta iti Naimbag nga Ar-aramid’
15. (a) Kasano a madepinar ti kinalinteg? (b) Ania ti kasayaatan a trabaho a mabalin nga aramiden ti Kristiano?
15 Kas organisado a bagi dagiti dedikado a Kristiano, dagiti Saksi ni Jehova “naregtada a maipaay kadagiti naimbag nga ar-aramid.” Ti kinaregta ket “kinaganetget ken kinapinget iti panangaramid iti maysa a banag.” (Webster’s New Collegiate Dictionary) Sigun iti surat ni Pablo ken Tito, dagiti amin a Kristiano masapul ti panangaramidda kadagiti nasaknap saklawenna a “naimbag nga ar-aramid.” Kas pangarigan, dagiti agtutubo a babbai masapul a nadalusda, nga agtrabahoda iti pagtaengan ken agpaiturayda kadagiti assawada. Ni Tito masapul nga agbalin a “maysa nga ulidan kadagiti naimbag nga ar-aramid,” nga ipakitana ti saan a dakes a sursurona, nga usarenna dagiti nasasayaat a pagsasao, ken dadduma pay. (Tito 2:1-14) Siempre, ti kasayaatan a trabaho a mabalin nga aramiden ti Knstiano isu ti panangtulong kadagiti sabsabali a makaammo iti Dios ken agserbi Kenkuana. No maysakayo a saksi ni Jehova, pudno kadi a naregtakayo a mangararamid iti daytoy a ‘naimbag nga ar-aramid’? Dagiti immuna-siglo a Kristiano impakitada daytoy a regta iti panagebanghelio, uray pay iti sidong ti pannakaidadanes.—Aramid 11:19-21.
16. (a) Ania ti kangrunaan a rason iti kaadda ti kongregasion Kristiano? (b) Ania ti naikunan maipapan iti trabaho dagiti Saksi ni Jehova a panagebanghelio?
16 Nupay adda ti pannakaidadanes dagiti Saksi ni Jehova ita, ti espiritu ti Dios ti mangtigtignay kadakuada a mangibanag iti rebbengen a mangikasaba iti Pagarian—maysa a kangrunaan a rason iti kaadda iti kongregasion Kristiano. (Mateo 24:14; 28:19, 20; Isaias 61:1, 2) Kas kadagiti immuna a Kristiano, sireregtada a mangaramid kadagiti naimbag nga ar-aramid a panangiwaragawag iti “naimbag a damag” iti balaybalay ken iti dadduma a pamay-an. (Aramid 5:41, 42; 20:20, 21) Iti librona nga Evangelism, Inc., ni G. W. Target sinalaysayna dagiti pamay-an ti panangasaba agraman ti “panagebanghelio kadagiti ruruangan” ken kinunana a “dadduma a tattao awaganda pay dayta a ti gagangay unay a pamay-an—nangnangruna kalpasan ti kaudian a panagsarungkar dagiti Saksi ni Jehova. . . . Dadduma ti sumarsaruno met a sipapartak, ngem dagiti Saksi ni Jehova ti umun-una iti tay-ak.” Maipapan iti panangusar kadagiti literatura iti Biblia, inamin ni Target: “Maminsan pay, dagiti Saksi ni Jehova [ti] mangidadaulo iti tay-ak. . . . Iti panangidlig, . . . mammano a denominasion ti pudno a mangipabpablaak kadagiti bambanag a maipaay iti panagebanghelio.” Kinapudnona, dagiti Nakristianuan a literatura a mapatpataud babaen iti tulong ti nasantuan nga espiritu ti Dios ken magun-odan manipud kadagiti Saksi ni Jehova a maipaay iti kontribusion ti mangtultulong kadagiti marakarnero a tattao iti isuamin a daga a makaammo ken mangaramid iti nadiosan a pagayatan.
17. Kasano a mapaneknekan a pinarang-ay ni Jehova ti trabaho a panangasaba dagiti Saksi ni Jehova?
17 Pinarang-ay ni Jehova ti trabaho a panangasaba dagiti immuna a Kristiano. Gapuna naporma dagiti kongregasion iti nadumaduma a luglugar—Roma, Corinto, Efeso, Filipos, Colosas, Tesalonica ken dadduma pay a luglugar. Kasta met, parparang-ayen ni Jehova ti trabaho a panangasaba dagiti moderno-aldaw nga ad-adipenna, iti kasta unay ta nasuroken a 46,000 a kongregasion dagiti Saksi ni Jehova ti adda itan iti sangalubongan. Maiturong iti Dios ti dayaw a maipaay iti kasta a nakaskasdaaw nga irarang-ay.—Isaias 60:22; 1 Corinto 3:6, 7.
Dagiti Adu a Bendisiontayo
18-20. Aniada dagiti dadduma a bendision a tagtagiragsaken dagiti ad-adipen ti Dios?
18 Adu, kinapudnona, dagiti bendision ken gunggona iti nadalus ken naregta a panagserbi a tagtagiragsaken dagiti tattao ni Jehova ita. (Proverbio 10:22) Kas pangarigan, kas naguguran nga ad-adipen ti Dios, addaantayo ti pannakapnek a panangay-ayo kenkuana. (1 Pedro 1:13-16) Ti nadiosan a kinapudno ti nangwayawaya kadatayo manipud Dakkel a Babilonia, ti sangalubongan nga imperio iti ulbod a relihion. (Apocalipsis 18:4, 5) Saantayo a biktima dagiti an-anito, panagbuteng kadagiti natay ken dagiti pumada iti dayta. (Eclesiastes 9:5, 10; Juan 8:32) Ti ‘kappia iti Dios ti mangsaluad kadagiti puspusotayo ken pampanunottayo.’ (Filipos 4:6, 7, 13) Ti pannakitipon a kankanayon kadagiti nadalus a managdaydayaw ti mangipaay kadatayo iti pannakarikna iti kinatalged, a kas iti “maysa nga arban iti kulongan.” (Mikias 2:12) Ti panangikut iti nasantuan nga espiritu ti Dios ti mamagbalin kadatayo a mangiparangarang kadagiti bungbunga iti ayat, rag-o, talna, mabayag a panagitured, kinamanangngaasi, kinaimbag, pammati, kinaemma ken panagteppel. (Galacia 5:22, 23) Anian a panangparagsak dagitoy amin kadatayo!
19 Kas naregta a manangiwaragawag iti Pagarian, agserserbitayo iti soberano iti uniberso—ti kasasayaatan a pribilehio a magun-odan ti aniaman a tao. Ti trabahotayo isu “ti nasantuan a trabaho iti naimbag a damag.” Ta, awanen ti sabali pay a naindagaan a trabaho a mangiyeg iti dakdakkel a rag-o ngem ti panangiwaragawag iti mensahe “ti naragsak a Dios” ken panangtulong kadagiti sabsabali a mangammo kenkuana!—Roma 15:16; 1 Timoteo 1:11.
20 Ti nasinged a relasion iti Dios ti sabali pay kadagiti adu a bendisiontayo. Mabalintayo ti agkararag kenkuana a buyogen ti panagtalek a denggennatayo. (1 Juan 5:14, 15) Anian a nakaskasdaaw ti agbalin a nakasingsinged ken Jehova! Kas panangikuna ti salmista: “Ngem nasayaat ti umas-asidegak iti Dios. Pinagbalinko ti soberano nga Apo Jehova a kamangko, tapno maisaritak amin dagiti ar-aramidmo.”—Salmo 73:28.
21. Kas naguguran ken naregta a tattao ni Jehova, ania koma ti determinasiontayo?
21 Gapu kadagiti adu a bendisiontayo kas naguguran ken naregta a tattao ti Dios, ngarud, agbalintayo a determinado nga agtalinaed a nadalus iti naespirituan ken agraniag nga addaan iti nadiosan a kinaregta. No agtalinaedtayo a kasta, masiguradotayo nga itan-oknatayto ni Jehova ken iturongnatayo kas dagiti saksina. Kasta met, ti kinadalus ken kinaregta iti sagrado a panagserbi iti Dios kadagitoy maudi nga al-aldaw ket, babaen iti di kaikarian a kinamanangngaasina, luktannanto ti dalan a maipaay kadatayo a mangbusbos iti kinaagnanayon a mangar-aramid iti nadalus ken naregta nga ar-aramid a pakaidayawan ni Jehova.
Kasano Koma ti Isusungbatyo?
◻ Ania ti kasapulan iti maysa tapno agbalin a nadalusan a tattao ni Jehova?
◻ Kasano a dagiti natudingan a panglakayen tulonganda dagiti sabsabali nga agtalinaed a nadalus iti naespirituan?
◻ Maipaay iti ania a nasayaat a trabaho a dagiti tattao ti Dios nangnangruna koma a naregtada?
◻ Aniada dagiti dadduma a bendision a tagtagiragsaken dagiti nadalusan ken naregta a saksi ni Jehova?
[Ladawan iti panid 18]
Dagiti panglakayen masapul a napingetda nga estudiante iti Biblia ken usarenda dayta a mangisuro, mangipalagip, mangbalakad ken uray pay mangbabalaw kadagiti dadduma.