Mangbirokka Kadagiti Gundaway a Mangasaba
1 Ti kongregasion Kristiano ket buklen dagiti tattao nga addaan kadagiti nagduduma a kasasaad. Ngem, nagkaykaysatayo iti determinasiontayo a mangidayaw ken ni Jehova. (Sal. 79:13) No ti nakapuy a salun-at wenno dagiti dadduma pay a narikut a kasasaad kednganna ti pannakiramantayo a mangiwaragawag iti naimbag a damag, kasano a makabiroktayo kadagiti gundaway a mangasaba?
2 Kadagiti Inaldaw nga Aktibidad: Ginundawayan ni Jesus ti inaldaw a pannakilangenna kadagiti tattao tapno mangasaba. Kinasaritana ni Mateo bayat ti ilalabasna iti pagsingiran ti buis, ni Zaqueo bayat ti panagdaliasatna, ken ti Samaritana bayat ti panaginanana. (Mat. 9:9; Luc. 19:1-5; Juan 4:6-10) Kadagiti inaldaw nga aktibidadtayo, mabalintayo met nga iserrek ti panangasaba kadagiti ordinario a saritaan. No adda itugtugottayo a Biblia, agraman dagiti polieto wenno broshur, maparegtatayo a mangiranud iti namnamatayo iti aniaman a gundaway.—1 Ped. 3:15.
3 Limitado kadi ti pannakiramanyo iti trabaho a panagbalaybalay gapu ta saankayo unayen a makagunggunay? Alertokayo koma kadagiti gundaway tapno makasabaanyo dagiti bumisbisita a doktor ken nars ken dagiti sabsabali a makasaritayo. (Ara. 28:30, 31) No masansan a saan nga ipalubos dagiti kasasaad a mapankayo mangasaba, pinadasyo kadin ti mangasaba babaen ti telepono wenno babaen ti surat? Adda maysa a kabsat a babai a regular nga agsursurat kadagiti kameng ti pamiliana a saan a Saksi. Iramanna iti suratna dagiti makapabileg a sasao iti Biblia ken dagiti kapadasanna iti panangasaba.
4 Iti Pagtrabahuan Wenno Eskuelaan: Ti tarigagaytayo a mangidayaw ken ni Jehova tignayennatayo met a mangbirok kadagiti gundaway nga agimula iti bin-i ti kinapudno iti pagtrabahuan wenno eskuelaan. Maysa a walo ti tawenna nga agibumbunannag ti nangiranud kadagiti kaklasena iti nabasana iti Agriingkayo! maipapan iti bulan. Idi naammuan ti mannursurona no sadino ti nangalaanna iti dayta nga impormasion, kanayonen a mangala ti mannursuro iti Ti Pagwanawanan ken Agriingkayo! Iti pagtrabahuan, no mangikabiltayo iti kopia ti libro nga Isursuro ti Biblia iti lugar a makita dagiti sabsabali mabalin a matignayda nga agsaludsod ken mangted dayta iti gundaway kadatayo a mangasaba.
5 Kadagiti inaldaw nga aktibidadyo, adda kadi dagiti pamay-an a mapanunotyo tapno makabirokkayo kadagiti gundaway a mangasaba? Babaen ti pananggundawaytayo kadagiti kasasaadtayo, inaldaw koma nga ikagumaantay nga ‘idaton iti Dios ti sakripisio ti panagdaydayaw.’—Heb. 13:15.