Panangiparang ti Naimbag a Damag—Babaen ti Pananggundaway a Mangted iti Impormal a Panangsaksi
1 Inwardas ni Jesus dagiti disipulona a pagraniagenda dagiti silawda. (Mat. 5:14-16) Iti daytoy a banag, ni Jesus isu ti modelo, kas maipakita idi a ginundawayanna ti oportunidad a nakisao iti maysa a Samaritana idiay bubon ti Sicar. (Juan 4:5-30) Datayo met ngay? Aramidentayo met aya dagiti kakasta a gundaway a mangsaksi?
2 Adda dagiti okasion ti gistay kada aldaw a makasaksitayo. Iti ania a wagas? Babaen ti impormal a panangasaba. No naridamtayo a mangilasin kadagiti oportunidad ken ikagumaantayo dayta, adu pay a tattao dagiti pakaidanonantayo iti kinapudno.
SIASINO DAGITI MAKASABAANTAYO?
3 Mainayon iti pormal a panangsaksi, mabalintayo a kasabaan dagiti katrabaho, kaeskuela, kanegosio, kabagian ken kaam-ammotayo babaen iti impormal. No agbiahetayo babaen iti bus, tren ken eroplano, mabalintayo a luktan iti saritaan kadagiti kaluganantayo. No agbakasiontayo mabalin a maranudan iti naimbag a damag dagiti agtartrabaho ti hotel, estasion ti gasolina ken trabahador iti restauran. Mabalintayo ti makisao iti sabsabali bayat nga agur-uraytayo idiay opisina ti maysa a doktor. Bayat nga addatayo iti pagtaengantayo mabalin a makasabaantayo dagiti kaaruba, dagiti agtagtagilako, wenno kartero. Uray no addatayo idiay ospital, mabalintayo a kasabaan dagiti doktor, narses, ken dagiti dadduma a pasiente.
NO KASANO NGA IRUGI
4 No ammotayo a nalabit nga adda bassit napaut a tiempo a panaguray iti dayta nga aldaw, mabalintayo ti mangitugot kadagiti kaudian a magasina a kas basaran ti diskusion. Wenno mabalintayo nga usaren dagiti tract wenno broshur a pangirugi iti saritaan. Mangaramid dagiti dadduma iti makapataliaw a sasao a naibatay kadagiti agdama a paspasamak ket kalpasanna saludsoden no ania iti makuna daydiay tao. Nasarakan dagiti sabsabali a ti panangisaludsod kadagiti agdama a mapaspasamak ket mangiturong iti nasayaat a panangsaksi. Iti amin a kaso, kasapulan ti panangiyusuat tapno adda bambanag a maaramidan.
PANANGASABA IDIAY TRABAHO
5 Kadagidiay addaan iti sekular a panggedan ti mabalin a makagundaway a mangsaksi kadagiti katrabahoda. Dua a kabsat a babbai idiay Georgia ti nangilista kadagiti katrabahoda a pagarupenda nga aginteresadoda. Babaen ti pannakisaoda kadagitoy, nabalinanda ti nangipaima iti nasurok a 65 nga Apocalipsis a libro ken nakultibarda iti nawadwad nga interes.
6 Sabali a kabsat a lalaki ti nangeddeng a kasabaanna daydiay umuna a tao a makikatugaw kenkuana bayat iti 15-minutos a panagsarimadeng iti trabaho. Nakuna daydiay tao a nakasaona nga ammona maipapan iti kinapudno ngem saanna a kayat nga itultuloy agsipud ta saanna a matungpal dayta a banag. Nupay kasta, nangibati latta daytoy kabsat iti literatura iti lugar a nalakana a mapidut tapno basaenna. Las-ud ti innem a bulan daytoy a tao ken iti intero a pamiliana ket nabautisarandan amin.
7 No nasiglat ken natuloktayo a mangiranud iti namnamatayo, datayo, kas ken Jesus, ti saan a mangsaaw kadagiti oportunidad a mangted iti pannaksi kas ‘silsilaw daytoy lubong.’—Juan 8:12; Fil. 2:15, 16.