Nakasaganakayo Kadin a Mangasaba iti Di Pormal?
1. Ania a pagarigan ti mangipakita nga epektibo ti di pormal a panangasaba?
1 Mabalin nga epektibo unay ti di pormal a panangasaba. Naglaon ti Biblia iti adu a pagarigan ti di pormal a panangasaba a nagsayaat dagiti resultana. (Juan 4:7-15) Ania ti mabalintayo nga aramiden kas panagsagana para iti daytoy a kita ti panangasaba?
2. Ania ti maitulong ti panagkawkawes ken panaglanglangatayo iti panangasabatayo?
2 Panagkawkawes ken Panaglanglanga: No kanayon a sipapanunottayo iti panagkawkawes ken panaglanglangatayo, awan ti pakababalawantayo bayat nga iranranudtayo ti pammatitayo kadagiti sabsabali. (1 Tim. 2:9, 10) No mariknatayo a saan a maitutop ti panaglanglangatayo, mabalin a mabaintayo a mangasaba. Iti sabali a bangir, no nanakman ken nadalus ti panagkawkawestayo, mabalin a dayta ti mangtignay kadagiti sabsabali nga agimtuod. Kas pagarigan, idi agbibiahe ti agassawa a Saksi a nasayaat ti panagkawkawesna, nakatugawda ti maysa a Muslim a lalaki. Napaliiw ti lalaki a nasayaat ti panaglanglangada isu a dinamagna no Kristianoda. Kas resultana, tallo nga oras a nagsasaritada maipapan iti Biblia.
3. Kas panangtulad iti ulidan ni Jesus, kasanokayo a makairugi iti saritaan?
3 Panangiruangan iti Saritaan: Idi naam-ammo ni Jesus ti Samaritana idiay bubon ni Jacob, inrugina ti saritaan babaen ti panagkiddawna iti danum. Iti umasping a pamay-an, mabalintay met a rugian ti saritaan babaen ti ababa a sasao ken simple a saludsod. Nupay agkedkedtayo no dadduma, ‘makaurnongtayo iti tured’ no agpannuraytayo iti tulong ni Jehova iti panangirugi iti saritaan.—1 Tes. 2:2.
4. Kasanotayo a makapagsagana a mangasaba iti di pormal?
4 Panangbirok Kadagiti Gundaway: Adu nga agibumbunannag ti nangbirok iti gundaway a mangasaba iti di pormal. Tingitingem ti kasasaadmo, ken panunotem dagiti tattao a mabalin a makapulapolmo iti inaldaw. Mangitugotka kadagiti maitutop a literatura ken bassit a Biblia. Managpaliiw ken maseknanka koma kadagiti tattao. No sipapanunotka a kanayon kadagiti situasion a mabalin a pakaipasanguam iti agmalem, ad-adda a sisasaganaka a mangasaba.—Fil. 1:12-14; 1 Ped. 3:15.
5. Apay a ditay koma tagtagilag-anen ti panangasaba iti di pormal?
5 Adda dua a nasayaat a rasontayo a mangasaba iti di pormal—ayat iti Dios ken ayat iti pada a tao. (Mat. 22:37-39) Gapu ta naganat ti trabaho a panangasaba, saantay koma a tagtagilag-anen ti panangasaba iti di pormal. Sisasaganatayo koma iti tunggal maitutop a gundaway a mangiranud iti naimbag a damag maipapan iti Pagarian kadagiti sabsabali bayat nga adda pay tiempo.—Roma 10:13, 14; 2 Tim. 4:2.