Siaanep a ‘Mangsaksikayo a Naan-anay’
1, 2. Ania ti magustuanyo maipapan iti panangmatmat ni Pablo iti panangikasaba iti naimbag a damag, ken kasanotay a matulad ti ulidanna iti ‘naan-anay a panangsaksi’?
1 Kas ken ni Jesus ken ti adu a dadduma pay a matalek nga adipen idi ugma, maysa ni apostol Pablo a naregta a manangikasaba iti naimbag a damag, a ‘nangsaksi a naan-anay’ iti uray ania a kasasaad. Uray idi naipupok iti balay a bambantayan ti soldado, “siaayat nga awatenna amin dagidiay umay kenkuana, nga ikaskasabana kadakuada ti pagarian ti Dios ken isursurona ti bambanag maipapan ken Apo Jesu-Kristo buyogen ti dakkel unay a wayawaya nga agsao.”—Ara. 28:16-31.
2 Mabalintay met ti siaanep a ‘mangsaksi a naan-anay’ iti amin a gundaway. Ramanen daytoy ti panangasaba kadagiti tattao a makasaritatayo bayat nga agbibiahetayo a mapan kadagiti asamblea ken kombension wenno agbakasion.—Ara. 28:23; Sal. 145:10-13.
3. Kasano a maliklikan nga agbalin a naiparna laeng ti di pormal a panangasabatayo?
3 Ania ti Di Pormal a Panangasaba? Saan a naiparna laeng wenno di inggagara ti di pormal a panangasaba, a kas man la saan a naiplano wenno saan unay a napateg. Saan a kasta ti ministeriotayo. Kas ken Pablo, napateg kadatayo ti panangidaydayaw iti Dios babaen ti panangasaba, ket rumbeng a rantatayo ti mangasaba iti amin a maitutop a gundaway bayat nga agbibiahetayo. Nupay kasta, siuumiso a maikuna a di pormal ti wagastayo a makisarita kadagiti sabsabali—kayatna a sawen, kalmado, nainggayyeman, ken natural. Mabalin a nasayaat dagiti resulta ti kastoy a pamay-an.
4. Apay a nabalinan ni Pablo ti nangasaba iti paggigiananna?
4 Nakasagana a Mangasaba: Nasken a mangparnuay idi ni Pablo kadagiti gundaway a mangasaba idi adda idiay Roma bayat a nakapupok iti balay a bambantayan ti soldado. Manipud iti paggigiananna, inawisna iti balayna dagiti panguluen a Judio nga adda idiay Roma. (Ara. 28:17) Uray pay no adda kongregasion dagiti Kristiano idiay Roma, naammuan ni Pablo a bassit ti ammo dagiti Judio iti dayta a siudad maipapan iti pammati dagiti Kristiano. (Ara. 28:22; Roma 1:7) Saan a bimdeng a ‘nangsaksi a naan-anay’ maipapan ken ni Jesu-Kristo ken iti Pagarian ti Dios.
5, 6. Ania dagiti gundaway a mabalintay ti mangasaba iti di pormal a pamay-an, ken ania dagiti mabalintay nga isagana tapno sieepektibo a maaramidtayo dayta?
5 Panunotenyo amin dagiti tattao a mabalin a makasaritayo bayat nga agbibiahekayo. Nalabit bassit laeng ti ammoda maipapan kadagiti Saksi ni Jehova. Mabalin a dida pay ketdi ammo a mangituktukontayo iti libre a panagadal iti Biblia iti pagtaengan. Gundawayanyo a kasabaan dagidiay makasaritayo bayat nga agbibiahekayo, addakayo iti pagsardengan ti lugan, paggasolinaan, bayat a gumatgatangkayo, addakayo iti hotel, mangmangan iti restawran, adda iti pangpubliko a lugan, ken dadduma pay. Panunotenyo a nasaksakbay no ania ti mabalinyo nga ibaga a pangirugi iti saritaan ken tapno makakasabakayo iti apagbiit. Kadagiti sumarsaruno nga aldaw, mabalinyo ti agensayo babaen ti di pormal a panangasaba kadagiti kaarruba, kabagian, katrabahuan, ken dadduma pay nga am-ammoyo.
6 Masapul nga addaankayo kadagiti publikasion a mausaryo iti di pormal a panangasaba. Aniada a publikasion? Mabalinyo nga usaren ti tract a Kayatyo Kadi a Maammuan ti Ad-adu Pay Maipapan iti Biblia? Itampokyo ti lima nga umuna a parapo, a nakadakamatan dagiti nadumaduma a rason no apay a basaentayo ti Biblia. Ipakitayo ti kupon iti likud a mausar no adda agkiddaw iti libre a panagadal iti Biblia iti pagtaengan. No makasarakkayo iti interesado, itukonyo ti broshur a Kalikaguman. Gapu ta mabalin a makasarakkayo kadagiti tattao a sabali ti pagsasaoda, itugotyo ti bokleta a Good News for All Nations. Ilawlawag ti panid 2 no kasano nga usaren dayta iti panangasaba. No adda bukodyo a lugan, mabalinyo ti mangitugot iti sumagmamano a dadduma pay a simple a publikasion para kadagidiay pudpudno nga interesado iti mensahe ti Pagarian.
7, 8. Ania a panamagannad ti rumbeng nga ipangagtayo maipapan iti panaglanglanga ken konduktatayo bayat nga agbibiahe ken agpalpaliwatayo?
7 Kitaenyo ti Panaglanglanga ken Konduktayo: Masapul a siguraduentayo a ti kondukta, agraman ti panagkawkawes ken panaglanglangatayo, ket saan a mangted iti di umiso nga impresion kadagiti sabsabali wenno ‘pangsupiatanda’ iti organisasion ni Jehova. (Ara. 28:22) Agaplikar daytoy saan laeng a no tumabunotayo kadagiti asamblea wenno kombension no di pay ket bayat nga agbibiahe ken agpalpaliwatayo. Pinagannadnatayo ti Agosto 1, 2002, a Pagwanawanan, panid 18, parapo 14: “Ti panaglanglangatayo ket saan koma a naparammag, nakadidillaw, makagargari, wenno naestilo. Maysa pay, agkawestayo koma iti wagas a mangyanninaw iti ‘panagraem iti Dios.’ Saan kadi a rumbeng a pagpanunotantayo dayta? Saan koma laeng a no addatayo kadagiti gimong ti kongregasion [wenno asamblea] a nanakman ti panagkawkawestayo. Kanayon koma a nadayaw ken natakneng ti panaglanglangatayo agsipud ta Kristiano ken ministrotayo iti amin a tiempo.”—1 Tim. 2:9, 10.
8 Naemma ken nanakman koma ti panagkawkawestayo. No ti panaglanglanga ken konduktatayo kanayon nga iyanninawna ti pammatitayo iti Dios, pulos a ditay bumdeng a mangasaba iti di pormal gapu ta makaay-ayo ti panaglanglangatayo.—1 Ped. 3:15.
9. Ania ti nasayaat a resulta ti panangaskasaba ni Pablo idi adda idiay Roma?
9 Nabunga ti Di Pormal a Panangasaba: Kabayatan ti dua a tawen a pannakaipupok ni Pablo idiay Roma iti maysa a balay a bambantayan ti soldado, nakitana dagiti nasayaat a resulta ti panangaskasabana. Impadamag ni Lucas a “ti sumagmamano nangrugida a mamati iti bambanag a naisao.” (Ara. 28:24) Tiningiting ni Pablo a mismo ti kinaepektibo ti “naan-anay a panangsaksina” idi insuratna: “Dagiti aramidko nagbanagda a pakaparang-ayan ti naimbag a damag imbes nga iti sabali, iti kasta dagiti parautko nagbalinda a publiko a pannakaammo a mainaig ken Kristo iti nagtetengngaan dagiti amin a Guardia a Pretorio ken iti amin a sabsabali; ket kaaduan kadagiti kakabsat iti Apo, yantangay nariknada ti panagtalek maigapu kadagiti parautko iti pagbaludan, mangipakpakitada iti ad-adda pay a tured tapno awanan buteng a sawenda ti sao ti Dios.”—Fil. 1:12-14.
10. Ania ti nasayaat a resulta ti panangasaba ti maysa a pagassawaan idi napalabas a kalgaw?
10 Idi napalabas a kalgaw, kalpasan ti agmalem nga itatabunoda iti kombension distrito, nasayaat ti resulta ti di pormal a panangasaba ti maysa a pagassawaan iti maysa a serbidora a nagsaludsod kadakuada maipapan kadagiti badge card-da iti kombension. Inlawlawagda kenkuana ti maipapan iti kombension ken kasta met ti ibagbaga ti Biblia a masakbayan ti sangatauan. Inikkanda iti tract a Kayatyo Kadi a Maammuan ti Ad-adu Pay Maipapan iti Biblia? ken inlawlawagda ti urnos a libre a panagadal iti Biblia iti pagtaengan. Kinuna ti babai a kayatna ti masarungkaran, insuratna ti nagan ken address-na iti likud ti tract, ken kiniddawna iti agassawa nga adda sumarungkar kenkuana. Ania met ngata ti mabalin a nasayaat a resulta ti siaanep a ‘naan-anay a panangsaksiyo’ iti amin a gundaway?
11. Aniada a galad ti rumbeng a patanorentayo tapno maipakaammotayo ti naimbag a damag babaen ti ‘naan-anay a panangsaksi’?
11 Naan-anay nga Ipakaammoyo ti Naimbag a Damag: Panunotenyo no kasano ti ragsak ni Pablo idi nadamagna a dagiti padana a Kristiano tultuladenda ti kinaregtana! Aramidentay koma ti amin a kabaelantayo a mangipakaammo iti naimbag a damag babaen ti panangusar iti amin a maitutop a gundaway a mangasaba iti di pormal a pamay-an maipapan kadagiti naibatay-Biblia a patpatientayo.
[Kahon iti panid 3]
Dagiti Publikasion a Kasapulan iti Di Pormal a Panangasaba
■ Kayatyo Kadi a Maammuan ti Ad-adu Pay Maipapan iti Biblia? (tract)
■ Ania ti Kalikaguman ti Dios Kadatayo? (broshur)
■ Good News for All Nations (bokleta)
■ Dadduma pay a simple a publikasion