Eskediul ti Gimong ti Serbisio
Lawas ti Hulio 14
10 min: Lokal a pakaammo. Usaren dagiti singasing iti panid 4 wenno ti dadduma pay a presentasion a maitutop iti teritoriayo a mangidemostra no kasano nga itukon ti Hulio 1 a Pagwanawanan ken ti Hulio nga Agriingkayo!
15 min: Addaankayo Kadi iti “Wayawaya nga Agsao”? Palawag a naibatay iti Mayo 15, 2006 a Pagwanawanan, panid 13-16. Ipaganetget ti kinapateg ti panangasaba a situtured.
20 min: “Agbiagka a Silalagip iti Aldaw ni Jehova.”a Itampokyo dagiti naisangsangayan a paset ti publikasion. Repasuenyo ti eskediul ti panangadal iti libro ken dagiti instruksion a masarakan iti panid 3 daytoy a ruar Ti Ministeriotayo iti Pagarian. Paregtaenyo ti amin a tumabunoda a regular ken makiramanda a naan-anay iti panagkomento. Kaumanyo iti apagbiit ti maysa wenno dua nga agibumbunannag a pagaammo nga agsagsagana a naimbag para kadagiti gimong, ken saludsodenyo no ania ti mangtigtignay kadakuada a mangaramid iti dayta.
Lawas ti Hulio 21
10 min: Lokal a pakaammo. Dagiti napili a Pakaammo manipud iti Ti Ministeriotayo iti Pagarian. Ipalagip iti tallaong nga itugotda ti Agosto 1 a Pagwanawanan ken ti Agosto nga Agriingkayo! para iti Gimong ti Serbisio inton sumaganad a lawas ken nakasaganada no mapagsasaritaan dagiti maitutop a presentasion a planoda nga usaren iti lokal a teritoria.
15 min: Lokal a kasapulan.
20 min: “Panagsagana—Tulbek ti Epektibo a Panagsarungkar.”b Iraman ti uppat a minuto a monologo (soliloquy) ti maysa nga agibumbunannag nga agsagsagana para iti panagsarungkar. Repasuenna ti notana sa ikeddengna a dua ti sarungkaranna inton ngudo ti lawas. Kalpasanna, lagipenna no ania ti napagsaritaanda idi kadagiti dua a sarungkaranna, ikeddengna no ania ti panggepna nga aramiden, sa agsagana no kasano nga ibanagna dayta a panggep. Para iti umuna a sarungkaranna, agsagana a mangitukon iti panangyadal iti Biblia. Para iti maikadua, agsagana no kasanona a parayrayen ti interes dayta babaen ti panangusarna iti singasing iti parapo 5.
Lawas ti Hulio 28
10 min: Lokal a pakaammo. Ipalagip iti amin nga iteddan ti reportda iti serbisio iti tay-ak iti Hulio. Basaen ti report ti kuenta ken ti panagyaman kadagiti donasion. Dakamaten ti literatura a tukon iti Agosto ken paidemostra ti maysa a presentasion.
15 min: Panangtaginayon iti Kinaganattayo. Narayray a palawag a naibatay iti Disiembre 15, 2006 a Pagwanawanan, panid 18-19, parapo 17-21.
20 min: Agsaganakayo a Mangitukon Kadagiti Agdama a Magasin. Pagsasaritaan ti tallaong. Dakamatenyo iti apagbiit ti linaon ti Agosto nga Agriingkayo! ken ti Agosto 1 a Pagwanawanan sa isaludsodyo iti tallaong no ania kadagiti artikulo ti mabalin a paginteresan dagiti tattao iti teritoriayo ken apay. Awisenyo ti tallaong a mangdakamat kadagiti espesipiko a punto iti artikulo a planoda nga itampok. Ania a saludsod ti mabalin a pangirugi iti saritaan? Ania a teksto iti artikulo ti mabalin nga ibasa? Usaren ti maysa kadagiti pagtuladan a presentasion iti Ti Ministeriotayo iti Pagarian wenno ti presentasion nga insingasing ti tallaong a mangidemostra no kasano nga itukon ti tunggal magasin.
Lawas ti Agosto 4
10 min: Lokal a pakaammo.
15 min: Nakasagana Kadin Dagiti Annakyo Para iti Naisangsangayan a Teritoriada? Palawag ken pagsasaritaan ti tallaong. Dakamatenyo ti sumagmamano kadagiti karit a pakaipaspasanguan dagiti Kristiano nga agtutubo idiay eskuelaan. Ilawlawagyo no kasano nga usaren dagiti nagannak ken annak ti Watch Tower Publications Index a mangbirok iti makatulong nga impormasion. Mangtedkayo iti sumagmamano a pagarigan. (Kitaenyo ti titulo a “Schools,” ken ti subtitulo nga “experiences.”) Awisenyo dagiti agtutubo iti tallaong a napadakkel iti Kristiano a sangakabbalayan nga agkomento no kasano ti panangisagana kadakuada dagiti dadakkelda a mangsango kadagiti karit ken mangyaplikar kadagiti prinsipio ti Biblia idiay eskuelaan. Mabalinda met a dakamaten dagiti insaganada a report idiay eskuelaan maipapan kadagiti topiko a masarakan iti Agriingkayo! Pailawlawagyo no kasano a nagserbi kas proteksion ti panangasabada idiay eskuelaan.
20 min: “Balbalintuagentayo Dagiti Natibker ti Pannakasarikedkedna a Bambanag.”c Awisenyo ti tallaong nga agkomento no kasano a siaanus a tinulongan ida ti nangyadal kadakuada iti Biblia a mangiwaksi kadagiti palso a narelihiosuan a patpatienda.
[Dagiti Footnote]
a Limitaran ti introduksion iti awan pay maysa a minuto sa isaruno ti saludsod-ken-sungbat a panangusig.
b Limitaran ti introduksion iti awan pay maysa a minuto sa isaruno ti saludsod-ken-sungbat a panangusig.
c Limitaran ti introduksion iti awan pay maysa a minuto sa isaruno ti saludsod-ken-sungbat a panangusig.