Mapalawayo Kadi ti Serbisioyo?
1. Ania ti naganat a panagkasapulan iti ministerio iti tay-ak, ken apay?
1 Gapu ta nakita ni Jesus nga adu a tattao ti interesado iti naimbag a damag maipapan iti Pagarian, binilinna dagiti adalanna nga ‘ipakaasida iti Apo ti panagani a mangibaon kadagiti trabahador iti panaganina.’ (Mat. 9:37, 38) Ad-adda a naganat ita ti trabahotayo yantangay dandanin malpas ti panawen ti panagani. Kayat a sawen daytoy a masapul nga usigentayo buyogen ti kararag no kasanotayo a makiraman a naan-anay iti ministerio.—Juan 14:13, 14.
2. Kasano a nagtignay dagiti dadduma iti awis maipapan kadagiti ad-adu a trabahador iti tay-ak?
2 Panangpalawa iti Serbisio: Adu ti nakapagpayunir babaen ti tulong ken panangiwanwan ni Jehova. (Sal. 26:2, 3; Fil. 4:6) Adda dagidiay nangikagumaan nga agserbi kas auxiliary pioneer maysa wenno ad-adu pay a bulan kabayatan ti tawen. Kas resultana, napalawada ti ministerioda. Gapu iti ragsakda a makiraman iti daytoy a pribilehio, adu kadakuada ti natignay a mangikabilangan iti panagserbi kas regular pioneer.—Ara. 20:35.
3. No maysaka idi payunir, ania ti mabalinmo nga ikabilangan itan?
3 Mabalinmo Kadi ti Agpayunir Manen?: No maysaka idi a payunir, awan duadua nga adu dagiti naragsak a kapadasan a dimo malipatan. Inkarkararagmo kadin no mabalinmo ti agpayunir manen? Dagiti kasasaad a nakaigapuan ti panaglusulosmo idi kas payunir ket mabalin a saan itan a makalapped kenka. Nalabit panawen manen a sumrekka iti daytoy a pribilehio ti panagserbi.—1 Juan 5:14, 15.
4. Ania a naisangsangayan nga oportunidad ti silulukat kadatayo amin?
4 Katibok ita ken dandanin mairingpas ti trabaho a panagani. (Juan 4:35, 36) Sapay koma ta usigentay amin ti agdama a kasasaadtayo tapno maikeddengtayo no adda maaramidantayo a panagbalbaliw iti inaldaw nga aktibidadtayo iti kasta ad-adu ti panawentayo a makiraman iti tay-ak. Wenno no awanen ti maaramidantayo a mangpalawa iti serbisiotayo, mabalintayo kadi ti mangbirok iti pamay-an tapno agbalintayo nga ad-adda nga epektibo iti ministerio? (Mar. 12:41-44) Anian a nagsayaat a pribilehio ti silulukat kadagiti amin a nawaya nga agpausar ken Jehova iti daytoy a naisangsangayan nga aktibidad!—Sal. 110:3.