Panagpayunir—Agpaay Kadi Kadakayo?
1 “Awanen ti sabali a mapanunotko nga aramiden. Talaga nga awanen ti ammok a makaiyeg iti kasta met laeng a rag-o.” Siasino ti nangibaga iti daytoy? Maysa kadagiti ginasut a ribu a Saksi ni Jehova a namagbalin iti amin-tiempo a ministerio kas makaparagsak a kursoda iti biag. Inusigyo kadin a buyogen ti kararag no mabalinyo ti agpayunir? Yantangay indedikartayon a naan-anay ti bagitayo ken Jehova, masapul koma nga usigentayo no mabalintay ti makiraman nga ad-adda pay iti panangisaknap iti naimbag a damag ti Pagarian. Buyogen ti panangpampanunot iti dayta a kalat, pangngaasiyo ta usigenyo ti sumagmamano nga isalsaludsod dagiti adu maipapan iti panagpayunir.
SALUDSOD 1: “Kuna ti dadduma a ti panagpayunir ket saan a para iti amin. Kasanok nga ammo no para kaniak dayta?”
2 Ti sungbat agpannuray iti kasasaadyo ken kadagiti Nainkasuratan nga obligasionyo. Adu ti di makabael a mangipaay iti 90 nga oras iti makabulan iti ministerio gapu iti salun-at wenno iti agdama a kasasaadda iti biag. Alaenyo a maysa a pagarigan dagiti adu a matalek a kakabsat a Kristiano nga assawa a babbai ken inna. Aramidenda ti amin a kabaelanda a makiraman a masansan iti ministerio sigun iti ipalubos ti kasasaadda. No ipalubos ti gundawayda, ag-auxiliary pioneer-da iti makabulan wenno ad-adu pay iti kada tawen, nga apitenda ti rag-o nga iyeg ti ad-adda pay a pannakiramanda iti serbisio. (Gal. 6:9) Nupay dida makapagserbi kas amin-tiempo a payunir iti agdama gapu iti kasasaadda, itantandudoda ti espiritu ti kinapayunir ket maibilangda a bendision iti kongregasion kas nareregta nga agibumbunannag iti naimbag a damag.
3 Iti sabali a bangir, adu dagiti kakabsat a gapu ta saan unay a nadagsen dagiti obligasionda, naiwayaanda ti agpayunir babaen ti panangbaliwda kadagiti ipangpangrunada iti biag. Dakayo ngay? Agtutubokay kadi a nakapagturposen iti sekular nga eskuelaan? Maysakay kadi nga asawa a babai nga addaan iti asawa a makabael a mangsustento iti pamilia? Naasawaankay kadi ken awan ti supsuportaranyo nga annak? Nagretirokay kadin iti sekular a trabahoyo? Ti panagpayunir wenno di panagpayunir ket banag a masapul nga ikeddeng ti tunggal tao. Ti saludsod ket, Maiwayaanyo kadi ti agpayunir?
4 Us-usaren ni Satanas ti nailubongan a sistema dagiti bambanag a mangsinga iti biagtayo ken manglapunos kadatayo iti managimbubukodan a panagbiag. No determinadotayo nga agtalinaed a naisina iti lubong, tulongannatayo ni Jehova a mangipangpangruna kadagiti interes ti Pagarian ken mangragpat ken mangawat iti amin a pribilehio iti teokratiko a serbisio a mabalintay a ragpaten. No maibagayyo ti kasasaadyo tapno makapagpayunirkayo, apay a diyo aramiden?
SALUDSOD 2: “Kasanok a masigurado a masuportarak ti bagik iti amin-tiempo a serbisio?”
5 Pudno nga iti adu a pagilian, iti panaglabas ti tawtawen, immadu ti makalikaguman nga oras iti sekular a trabaho kada lawas tapno magun-od dagiti maibilbilang a kas napapateg iti biag. Nupay kasta, adu ti nagpayunir iti adun a dekada, ket agtultuloy a tultulongan ida ni Jehova. Tapno makapagballigi kas payunir, kasapulan ti pammati ken espiritu ti panagsakripisio. (Mat. 17:20) Ipasigurado kadatayo ti Salmo 34:10 a “dagiti mangbirok ken Jehova saandanto a makurangan iti aniaman a naimbag.” Asinoman nga agpayunir rumbeng nga aramidenna dayta buyogen ti naan-anay a panagtalek nga ipaay ni Jehova dagiti kasapulanna. Kasta ti ar-aramidenna kadagiti matalek a payunir iti sadinoman! (Sal. 37:25) Siempre, maitunos kadagiti prinsipio iti 2 Tesalonica 3:8, 10, ken 1 Timoteo 5:8, di mangnamnama dagiti payunir a dagiti sabsabali ti mangsuporta kadakuada iti pinansial.
6 Asinoman nga agpalplano nga agpayunir aramidenna koma ti kinuna ni Jesus: “Agtugaw nga umuna ket patta-pattaenna ti magastos.” (Luc. 14:28) Ti panangaramid iti daytoy ipakitana ti praktikal a sirib. Makisarita kadagidiay sibaballigi a nagpayunir iti adun a tawen. Saludsoden no kasano a tinulongan ni Jehova ida. Ti manangaywan iti sirkitoyo ket adun ti kapadasanna a payunir a maragsakan a mangted kadagiti singasing no kasano nga agballigikayo iti amin-tiempo a ministerio.
7 Nalabit saan a pulos a mapasaran a naan-anay ti maysa a tao ti kinapudno ti kari ni Jesus iti Mateo 6:33 agingga a dina italek ti bagina kadagiti ima ni Jehova. Kinuna ti maysa a matalek a payunir: “Idi simmangpetkami iti kaduak iti baro a destino kas payunir, adda laeng bassit a natengmi, sangkabassit a mantekilia, ken awan kuartami. Nakapangrabiikami ket kinunami, ‘Awanen ti pammigatta.’ Inkararagmi dayta, sakami naturog. Kinabigatanna, nasapa a dimteng ti maysa a Saksi a taga sadiay ken nakiam-ammo, a kunana, ‘Inkararagko a mangibaon koma ni Jehova kadagiti payunir. Ita makaduakayo iti agmalmalem, ngem tangay agnanaedak iti away, masapul a makipangaldawak kadakayo, isu a nagbalonak iti kanentay amin.’ Nakaad-adu a karne ti baka ken nateng.” Di pakasdaawan nga impasiguro ni Jesus kadatayo a mabalintay nga ‘isardeng ti maringgoran maipapan kadagiti kararuatayo’! Sana innayon: “Asino kadakayo a babaen iti panagbalin a maringgoran manayonanna iti maysa a kasiko ti kaatiddug ti biagna?”—Mat. 6:25, 27.
8 Kumarkaro ti kinamaterialistiko ti lubong iti aglikmuttayo. Kumarkaro ti panangpilitna kadatayo a makitunos. Nupay kasta, ti nasayaat a panangapresiar iti amin-tiempo a ministerio pagbalinennatayo a kontento nupay saantay a nabaknang. (1 Tim. 6:8) Dagiti payunir a simple ken naurnos ti panagbiagda ad-adu ti tiempoda nga agserbi ket magun-odda ti dakdakkel a rag-o ken naespirituan a bileg iti panangisuroda iti kinapudno kadagiti sabsabali. Nupay dida agbibiag a kas ermitanyo, ti natimbeng a panangmatmatda iti biagda ti nangtulong kadakuada a mangtagiragsak kadagiti bendision iti panagpayunir.
9 No matarusanyo a naimbag nga agbibiagtayon kadagiti maudi nga al-aldaw ken dandanin agpatingga daytoy dakes a lubong, matignaykayo iti naespirituan a mangaramid kadagiti nasken a sakripisio a mangikasaba iti naimbag a damag iti tunggal oportunidad. Babaen iti napabaro a panangmatmatyo iti kasasaadyo iti biag ken panangitaklinyo iti dayta a banag kadagiti ima ni Jehova, mabalin a mautobyo a makapagserbikayo kenkuana iti amin-tiempo. Uray masapul a baybay-anyo dagiti dadduma a namaterialan a tarigagay tapno makapagpayunirkayo, tagiragsakenyonto dagiti nabaknang a pamendision ni Jehova.—Sal. 145:16.
SALUDSOD 3: “Kas maysa a tin-edyer, apay a rumbeng nga ibilangko ti panagpayunir kas kasayaatan a karera?”
10 Bayat a turposenyo ti maudi a sumagmamano a tawen a panageskuela, natural a panunotenyo ti masanguanan. Kayatyo a natalged, naragsak, ken makapnek dayta. Mabalin nga idagadag dagiti guidance counselor iti eskuelaan a ragpatenyo ti naluho a karera a mangikalikagum iti adu a tawen a panagkolehio. Ti nasayaat-pannakasanayna a Nakristianuan a konsiensiayo ibagana kadakayo a masapul nga agsaganakayo nga agserbi a naan-anay ken Jehova iti inggat’ kabaelanyo. (Ecl. 12:1) Mabalin a panunotenyo met ti pannakiasawa ken panagpamilianto iti kamaudiananna. Anianto ti aramidenyo?
11 Dagiti desisionyo iti daytoy a tiempo iti biagyo mabalin a sukogenna ti intero a masakbayanyo. No maysakayon a dedikado, bautisado a Saksi ni Jehova, impaayyo ti amin a kararuayo ken Jehova. (Heb. 10:7) Ti umuna nga oportunidad para kadakayo, padasenyo ti ag-auxiliary pioneer iti makabulan wenno ad-adu pay. Babaen iti daytoy maramananyo dagiti rag-o ken responsabilidad a nainaig iti panag-regular pioneer, ket awan duadua a lumawagto ti panangmatmatyo no aniat’ rumbeng nga aramidenyo iti biagyo. Kalpasanna, imbes nga agtrabahokayo iti amin-tiempo kalpasan ti panageskuela, apay a dikay irugi ti ag-regular pioneer? Dagiti dadduma a naladaw a nagpayunir agbabbabawida ta dida nangrugi a nasapa.
12 Kas maysa nga agtutubo, gundawayanyo ti kinaawan asawayo, ket tagiragsakenyo dagiti gunggona nga ipaay ti amin-tiempo a panangasaba. No tarigagayanyonto ti makiasawa, awanen ti nasaysayaat a pundasion a pangisaadan iti panagasawa no di ti panag-regular pioneer nga umuna. Bayat a rumang-aykayo iti kinanataengan ken iti naespirituan, mabalin a pilienyo ti kinapayunir kas karera a kaduayo ti asawayo a kasta met laeng ti kapanunotanna. Dadduma a pagassawaan a nagpaypayunir ti nagserbi iti sirkito wenno nagmisionero. Pudno a makapnek a panagbiag!
13 Kasano man kabayag ti panagtultuloyyo a payunir, maan-anayyo ti edukasionyo ken magun-odyo ti di magatadan a pannakasanay a di maipaay ti aniaman a trabaho ditoy daga. Ti kinapayunir isurona ti disiplina, personal nga organisasion, no kasano ti makilangen kadagiti tattao, panagpannuray ken Jehova, ken no kasano a patanoren ti anus ken kinamanangngaasi—galgalad a tumulong kadakayo a mangibaklay kadagiti dakdakkel a responsabilidad.
14 Awanen ti masnup a turongen ti biag ti sangatauan. Manmano ti masnup a banag, malaksid iti inkari ni Jehova. Tangay naipasango a nabatad kadakayo ti masakbayanyo, kaanonto pay ti nasaysayaat a tiempo no saan nga ita a panunotenyo a naimbag no aniat’ aramidenyonto iti biagyo kadagiti sumaganad a tawen? Tingitingenyo a naimbag ti pribilehio a panagpayunir. Diyonto pulos pagbabawyan ti panangpiliyo iti serbisio a kinapayunir kas karerayo.
SALUDSOD 4: “Saan kadi a kanayon a narigat a ragpaten ti makalikaguman nga oras? No ngay diak maabut ti orasko?”
15 No suratanyo ti aplikasion para iti regular pioneer, masapul a sungbatanyo daytoy a saludsod: “Naorganisaryo kadin dagiti personal nga aramidyo tapno nainkalintegan a manamnamayo a maabutyo ti makalikaguman a 1,000 nga oras iti tinawen?” Tapno maabutyo dayta, masapul nga agpromediokayo iti agarup tallo nga oras kada aldaw iti serbisio. Nalawag, nasken iti daytoy ti nasayaat nga eskediul ken disiplina. Kaaduan a payunir makapatanorda iti praktikal, realistiko a rutina iti las-ud ti sumagmamano a bulan.
16 Nupay kasta, umiso ti kuna ti Eclesiastes 9:11 (NW), ‘Ti panawen ken di mapakpakadaan a pasamak mapagteng kadatay amin.’ Mabalin a di maabut ti maysa a payunir ti orasna gapu iti grabe a sakit wenno dadduma pay a di mapakpakadaan a kasasaad. No saan nga agpaut ti parikut ken mapasamak iti rugi ti tawen serbisio, mabalin a kasapulan laeng ti nasaysayaat nga eskediul tapno masulnitan ti nababa nga oras. Ngem ania ngay no tumaud ti nakaro a parikut a sumagmamano laengen a bulan sakbay nga agngudo ti tawen serbisio ket di maabut ti maysa a payunir ti orasna?
17 No diyo maabut ti makalikaguman nga oras gapu ta agsakitkayo iti sumagmamano a bulan wenno gapu iti dadduma pay a nakaro a rason a diyo kabaelan a risuten, mabalinyo nga asitgan ti maysa a kameng ti Congregation Service Committee ket ilawlawagyo ti parikut. No pagarupen dagitoy a panglakayen a mabalinyo ti agtultuloy nga agpayunir a diyon pakarikutan ti panangsulnityo iti nababa nga oras, isuda ti mangikeddeng iti dayta. Markaan ti sekretario ti Congregation’s Publisher Record card a mangipakita a di kasapulan a sulnitanyo ti nababa nga oras. Saan a bakasion daytoy, imbes ketdi, naisangsangayan a konsiderasion gapu iti kasasaadyo.—Kitaenyo ti suplemento ti Setiembre 1986 a Ti Ministeriotayo iti Pagarian, parapo 18.
18 Dagiti aduan kapadasan a payunir kaaduenda ti orasda iti apagtapog ti tawen serbisio. Ipangpangrunada ti serbisioda kas payunir, isu a pasaray nasken a kissayanda dagiti saan unay a napateg nga aramid. No nababa ti oras ti maysa a payunir gapu iti di nasayaat nga eskediul wenno awan disiplinana a mangsurot iti dayta, mariknana koma a rebbengenna a sulnitan ti nababa nga orasna ket saan a mangnamnama iti naisangsangayan a konsiderasion.
19 Addada tiempo a mapasaran ti maysa a payunir ti di maliklikan a panagbaliw dagiti kasasaadna. Mabalin a dinan maabut ti makalikaguman nga oras iti naunday a tiempo gapu iti agtultuloy a parikut iti salun-at, immadu a rebbengenna iti pamilia, ken dadduma pay. Iti daytoy a kaso, nainsiriban nga agsubli iti ranggo dagiti agibumbunannag ken makiraman no posible iti panag-auxiliary pioneer. Awan regular a probision a mangipalubos iti asinoman nga agtalinaed iti listaan dagiti payunir no saanen nga ipalubos ti kasasaadna ti panangragpat iti makalikaguman nga oras.
20 Namnamaenmi a ti probision a panangipaay iti naisangsangayan a konsiderasion kadagidiay maikari paregtaenna koma ti ad-adu pay tapno agpasalistada a payunir nga awan rumbeng a pagdanaganda. Mangparegta met koma dayta kadagidiay addan iti amin-tiempo a serbisio tapno agtultuloyda nga agpayunir. Kayatmi nga agballigi dagiti payunir iti amin-tiempo a serbisioda.
SALUDSOD 5: “Kayatko nga adda koma magapuanak ken pagragsakak nga aramiden. Rumagsakak ngata no agpayunirak?”
21 Ti pudno a kinaragsak ket agpannuray a nangnangruna iti kaadda ti nadekket, personal a pannakirelasion ken Jehova ken kombiksion nga agserserbitayo a simamatalek kenkuana. Inibturan ni Jesus ti kayo a pagtutuokan “gapu iti rag-o a naikabil iti sanguananna.” (Heb. 12:2) Ti kinaragsakna nagtaud iti panagaramidna iti pagayatan ti Dios. (Sal. 40:8) Iti agdama a sistema ti bambanag, masagraptayo ti pudno a kinaragsak no ti kaaduan nga aktibidadtayo iti biag ket nainaig iti panagdayawtayo ken Jehova. Dagiti naespirituan nga aramid ipaayandatay iti pannakapnek gapu ta iti kaunggan ti pusotayo ammotay nga ar-aramidentayo ti naimbag. Ti kinaragsak ket agtaud iti panangted, ket ammotayo nga awanen ti nasaysayaat a wagas a panangipaaytay iti bagitayo no di ti panangisuro kadagiti sabsabali no kasano a gun-oden ti biag nga agnanayon iti baro a lubong ti Dios.—Ara. 20:35.
22 Kastoy ti panangilawlawag ti payunir a nadakamat iti panglukat a parapo: “Adda pay kadi sabali a makaiyeg iti dakdakkel a rag-o ngem ti pannakakita iti iyad-adalam nga agbalin nga aktibo nga agdaydayaw ken Jehova? Makaparagsak ken makapabileg-pammati a makita no kasano kabileg ti Sao ti Dios a manggutugot kadagiti tattao a mangbalbaliw iti biagda tapno maay-ayo ni Jehova.” (Kitaenyo ti Oktubre 15, 1997, a Pagwanawanan, panid 18-23.) Gapuna, aniat’ makaited kadakayo iti ragsak? No ipategyo dagiti permanente, makagunggona a kalat, imbes a ti temporario a ragsak nga ituktukon ti lubong, ipaayannakayo ti kinapayunir iti nakaskasdaaw a pannakapnek a mamagbalin kadakayo a pudno a naragsak.
SALUDSOD 6: “No saan a dayta ti pakagun-odan iti biag nga agnanayon, saan kadi a siak ti makaammo a mangeddeng no kayatko ti agpayunir wenno saan?”
23 Pudno, masapul a dakayo ti agdesision no kayatyo ti agpayunir. Ni laeng Jehova ti mabalin a mangukom kadagiti personal a kasasaadyo iti biag. (Roma 14:4) Adda karbenganna a mangnamnama nga agserbikay kenkuana iti amin a puso, kararua, panunot, ken pigsayo. (Mar. 12:30; Gal. 6:4, 5) Ayatenna ti naragsak a manangted, daydiay agserbi kenkuana a sirarag-o, saan a maigapu iti dakes a nakem wenno mapilpilit. (2 Cor. 9:7; Col. 3:23) Masapul a ti rason iti panagserbiyo iti amin-tiempo ket ti ayatyo ken Jehova ken kadagiti tattao iti teritoriayo. (Mat. 9:36-38; Mar. 12:30, 31) No kastoy ti panagriknayo, mayanatup ngarud nga usigenyo a naimbag ti panagpayunir.
24 Namnamaenmi a ti naibalabala ditoy ket tumulong kadakayo a mangutob iti inanamayo a makapagpayunir. Maibagayyo kadi dagiti kasasaadyo tapno makapag-regular pioneer-kayo? Naimaldit iti baba ti maysa a kalendario a napauluan “Ti Linawas nga Eskediulko iti Panagpayunir.” Kitaenyo no mabalinyo ti mangaramid iti praktikal nga eskediul tapno maabutyo ti promedio a 23 nga oras iti kada lawas iti ministerio. Kalpasanna, isadagyo ti naan-anay a pammati ken panagtalekyo ken Jehova. Babaen ti tulongna makapagballigikayo! Inkarina: “Siak . . . ibuyatkonto kadakayo ti bendision, nga awanto ti lugar a makalaon nga umawat.”—Mal. 3:10.
25 Gapuna iyimtuodtayo, “Panagpayunir—agpaay kadi kadakayo?” No “Wen” ti sungbatyo, iyurnosyo a dagus ti petsa a panangrugiyo nga ag-regular pioneer ket masiguradoyo a bendisionannakayo ni Jehova iti naragsak a biag!
[Tsart iti panid 6]
(Para iti aktual a pannakaurnosna, kitaem ti publikasion)
Ti Linawas nga Eskediulko iti Panagpayunir
LUNES Agsapa tay-ak ti serbisio
MARTES Agsapa tay-ak ti serbisio
MIERKOLES Agsapa tay-ak ti serbisio
HUEBES Agsapa tay-ak ti serbisio
BIERNES Agsapa tay-ak ti serbisio
SABADO Agsapa tay-ak ti serbisio
DOMINGO Agsapa tay-ak ti serbisio
LUNES Malem tay-ak ti serbisio
MARTES Malem tay-ak ti serbisio
MIERKOLES Malem tay-ak ti serbisio
HUEBES Malem tay-ak ti serbisio
BIERNES Malem tay-ak ti serbisio
SABADO Malem tay-ak ti serbisio
DOMINGO Malem tay-ak ti serbisio
LUNES Rabii tay-ak ti serbisio
MARTES Rabii tay-ak ti serbisio
MIERKOLES Rabii tay-ak ti serbisio
HUEBES Rabii tay-ak ti serbisio
BIERNES Rabii tay-ak ti serbisio
SABADO Rabii tay-ak ti serbisio
DOMINGO Rabii tay-ak ti serbisio
Suratanyo iti lapis ti eskediulyo iti kada aldaw ti lawas.
Mangyeskediul iti pakadagupanna nga agarup 23 nga oras iti kada lawas iti tay-ak ti serbisio.
Dagup ti nayeskediul nga oras iti linawas ․․․․․․․․․․․․․․․․․․․․