Saludsod
◼ Kasano a makatulong ti amin tapno mataginayon ti naannayas a panagadal bayat dagiti gimong ti kongregasion?—Deut. 31:12.
Maigapu iti nauneg a panagraem ken Jehova ken kadagiti inyurnosna a gimong ti kongregasion, maparegtatayo amin a sumangpet a nasapa ken sisasagana nga agpaisuro kenkuana. Napateg nga okuparantayo dagiti makinsango a tugaw iti Kingdom Hall tapno dagiti makinlikud a tugaw ti okuparen dagidiay addaan kadagiti babassit nga annak ken dagidiay maladaw. Sakbay a mangrugi ti gimong, nabaliwan koman ti setting dagiti elektroniko nga alikamen tapno saanto a mangpataud iti pakasingaan dagiti tumabuno. Manmano ken saan a nakaro dagiti pakasingaan no taginayonen ti amin a tumabuno ti panagraem kabayatan ti gimong.—Ecl. 5:1; Fil. 2:4.
No tumabunon dagiti kabbaro, nasayaat no katugaw ida ti kabsat a makaam-ammo kadakuada. Nangnangruna a makatulong dayta no adda kaduada a babassit nga ubbing a nasken a sanayen. Mabalin nga agdadamo ti pamilia a tumabuno kadagiti gimong. No kasta, apresiaren la ketdi dagiti nagannak no dagiti makinlikud a tugaw ti okuparenda tapno saanda unay a makapataud iti pakasingaan no nasken a rummuarda tapno aywananda dagiti babassit nga annakda. (Prov. 22:6, 15) Saan koma a maisina dagiti ubbing iti sabali a siled tapno saanda a nawaya nga agariwawa. No disiplinaen wenno asikasuen dagiti nagannak dagiti annakda, kaaduanna a nasaysayaat no aramidenda dayta iti ruar ti main hall sada agsubli a kaduada dagiti annakda.
Dagiti paraasistir taginayonenda koma ti kasasaad a maitutop iti pasdek a pagdayawan. Tulonganda dagidiay maladaw ken dagiti pamilia nga agsapul iti mayanatup a pagtugawanda. Tapno maliklikan dagiti di kasapulan a pakasingaan, kanayon koma a nataktika ken naannad dagiti paraasistir iti panangtulongda kadagiti tumabuno a maaddaan iti komportable a pagtugawan. Nainsiriban a tamingenda dagiti di ninamnama a pakasingaan. No makasinga ti tigtignay ti maysa nga ubing, siaasi a tumulong dagiti paraasistir.
Adda maitulong ti amin a makigimong tapno mataginayon ti naannayas a panagadal maipapan ken Jehova ken iti panggepna maipaay iti natalna ken nalinteg a baro a lubong.—Heb. 10:24, 25.